مەملەكەتتىك قىزمەتتەر سالاسىنداعى جۇمىسكەرلەردىڭ كاسىبي مەرەكەسى بەكىتىلمەك
بۇل تۋرالى «اشىق» ن ق ا پورتالىندا جاريالانعان ۇكىمەت قاۋلىسىندا جازىلعان، دەپ حابارلايدى قازاقپارات ءتىلشىسى.
«ق ر مەرەكەلىك كۇندەردىڭ تىزبەسىن بەكىتۋ تۋرالى» ق ر ۇكىمەتىنىڭ قاۋلىسى - «مەملەكەتتىك كورسەتىلەتىن قىزمەتتەر سالاسىنداعى قىزمەتكەرلەر كۇنى – 15-ءساۋىر» دەگەن 5-1-تارماقپەن تولىقتىرىلسىن»، - دەلىنگەن قۇجاتتا.
قاۋلىعا قوسىمشا بەرىلگەن تۇسىندىرمەدە بۇل باستاما مەملەكەتتىك قىزمەتتەر سالاسىندا ەڭبەك ەتەتىن جۇمىسكەرلەر اراسىندا كورپوراتيۆتىك مادەنيەتتى دامىتۋعا ىقپال ەتەتىنى كورسەتىلگەن.
«مەملەكەتتىك كورسەتىلەتىن قىزمەتتەر سالاسىنداعى قىزمەتكەرلەردىڭ جالپى سانى 20 مىڭنان استام ادامدى قۇرايدى. الايدا، بۇگىنگى كۇنى مەملەكەتتىك قىزمەتتەردى كورسەتۋ سالاسىنداعى قىزمەتكەرلەردىڭ وزدەرىنىڭ كاسىبي مەرەكەلەرىن اتاپ ءوتۋ مۇمكىندىگى جوق جانە وسىنداي مەرەكە بولماعاندىقتان، ءبىرىڭعاي كاسىبي قوعامداستىق سالاسىنا وزدەرىنىڭ تيىستىلىگىن سەزىنبەيدى. اتالعان كاسىبي مەرەكەنى تىزىمگە ەنگىزۋ كاسىبي قوعامداستىقتىڭ ءبىرىڭعاي سالاسىنا جاتاتىنىن سەزىنۋگە مۇمكىندىك بەرىپ، كورپوراتيۆتىك مادەنيەتتىڭ ودان ءارى دامۋىنا ىقپال ەتەدى»، - دەپ تۇسىندىرمە بەرىلگەن قاۋلىعا.
قاۋلىنى اشىق تالقىلاۋ 1-ناۋرىزعا دەيىن جالعاسادى.
