كوشەدە قايىر سۇراعان اتانىڭ ءتۇرى ادام تانىماستاي وزگەردى
ۆيدەونىڭ اۆتورى - سىرت كەلبەتىن وزگەرتۋگە قاراجاتى جەتپەيتىن ادامدارعا كومەك كورسەتىپ جۇرگەن بلوگەر ءجاميلا سەرىك قىزى، - دەپ حابارلايدى Massaget.kz ءتىلشىسى.
بلوگەر، سۇلۋلىق سالونىنىڭ يەسى ءجاميلا سەرىك قىزى Instagram-پاراقشاسىندا جوباسىنداعى جاڭا كەيىپكەرىن تانىستىردى. ول - كوشەدە قايىر سۇراپ وتىرعان ۆلاديمير ۆلاديميروۆيچ. بلوگەردىڭ ايتۋىنشا، ەر ادام وتباسىنان ايىرىلعانىنا كوپ بولعان، ال بالالارى گەرمانياعا كوشىپ كەتكەن. كەيىن كۇزەتشى بولىپ جۇمىس ىستەگەن، ءبىراق اياعى اۋىرعان سوڭ، جۇمىسىنان شىعىپ قالعان. قازىر ەر ادام يتىمەن جالعىز تۇرادى.
«ۇيدەن جۇمىسقا شىققاندا وسى اعانى كۇندە كورەمىن! قالتامدا اقشا بولعاندا ساداقا بەرىپ تۇرامىن. سوسىن «نەگە وسى اعانى جوباما الماسقا؟» دەگەن وي كەلدى. نە دەگەنمەن ەر ادام ءوز ەموتسياسىن قاتتى كورسەتە المايدى عوي. ءبىراق اياعىندا قۇشاقتاپ، كوزى جاسقا تولىپ، راحمەتىن ايتتى. «دەمەك، قۇداي مەنى جاقسى كورەدى» دەپ كۇلدى»، - دەپ جازعان بلوگەر.
بلوگەر ەر ادامعا كيىم، اياق كيىم الىپ بەرگەن، كەيىن ءتىس ەمحاناسىنا اپارىپ، ءتىسىن ەمدەتكەن. سۇلۋلىق سالونىنىڭ يەسى مونشاعا اپارىپ، تاماعىن اپەرگەن. كەيىن ءوز سالونىنا كەلىپ، ەر ادامنىڭ شاشىن الىپ، ساقالىن رەتكە كەلتىرگەن. وعان قوسا، ەر ادامعا ءۇي گۇلىن سىيعا تارتقان.
بۇدان باسقا ول وقىرماندارىنان جينالعان قارجىدان 10 مىڭ تەڭگە سىيلاعان.
جەلى قولدانۋشىلارى كەيىپكەردىڭ ادام تانىماستاي وزگەرگەنىنە تاڭعالىپ، پىكىر قالدىرعان.
View this post on Instagram
«ادام وزىنە قاراپ جۇرسە، سونداي سىمباتتى بولادى ەكەن عوي. كومەكتەسكەن بارلىق جانعا راحمەت»، «قانداي كەرەمەت! وزىڭنەن كەيىنگى ۇرپاققا تاربيەلىك ءمانى بار ءىس ىستەپ جاتقانىڭا راحمەت»، «قانداي كۇشتى! ادام كوركى شۇبەرەك دەمەي مە؟ جاساعان جاقسىلىعىڭ ەسەلەپ قايتسىن»، «اتانىڭ بالالارى قاسىندا بولعاندا عوي»، «قانداي كۇشتى وزگەرىس»، - دەپ جازعان پىكىر قالدىرعاندار.
ەسكە سالايىق، بۇعان دەيىن كاسىپكەردىڭ كوشە سىپىرۋشىسىن ادام تانىماستاي وزگەرتكەن ۆيدەوسىن ءبولىسىپ ەدىك.
