تۇركيانىڭ كاحرامانماراش قالاسىندا قازاقستاندىقتار كيىز ءۇي تىگە باستادى

استانا. قازاقپارات - جەر سىلكىنىسىنە بايلانىستى تۇركيا حالقىنا كومەك كورسەتۋ ماقساتىندا كاحرامانماراش قالاسىندا قازاقستاندىقتار بىرنەشە كيىز ءۇي ورناتا باستادى، دەپ حابارلايدى قازاقپارات ءتىلشىسى.

«كيىز ءۇي العاش بولىپ كاحرامانماراش قالاسىندا ورناتىلا باستادى. بۇل كيىز ۇيلەردىڭ تۇركياعا جەتكىزىلگەنىنە بىرنەشە كۇن بولدى. بۇگىن تاعى 84 كيىز ءۇي اكەلەدى»، - دەدى قازاقستاندىق ءتىلشى نۇربەك بەكباۋ Instagram پاراقشاسىندا.

ونىڭ ايتۋىنشا، تۇركيا حالقىنا قول ۇشىن سوزۋعا قازاقستاننان 12 ەرىكتى كەلدى. جالپى سانى 100-گە جۋىق كيىز ءۇي جەتكىزىلدى.

سونداي- اق، جەرلەسىمىز كيىز ءۇيدىڭ بىرىندە تۇنەپ شىققانى ۆيدەودان بايقالادى.

«جەر سىلكىنىسىنەن كەيىن كۇن تەز سۋىتىپ كەتەدى. كاحرامانماراش قالاسىنداعى جاعدايدى بايقادىق. دالا سۋىق. ءبىز الدىمەن كيىز ۇيدە ءوزىمىز تۇنەپ كوردىك، جىلىلىعىن تەكسەرۋ ءۇشىن. جىلۋ قۇرىلعىسى، كورپە- توسەك جانە ەلەكتر پليتا كەرەك. ءبىر كيىز ۇيگە 20 ادامعا دەيىن سيادى»، - دەيدى ول.

ودان بولەك، «ەلىم- اي» فۋتبول كلۋبى دا تۇرىك حالقىنا كيىز ۇيلەر جەتكىزدى.

قازاقستاندىقتار كيىز ۇيلەر ساتىپ الۋعا 20 ميلليون تەڭگەدەن استام قارجى جينادى. 17 ميلليون 300 مىڭ تەڭگەگە 45 كيىز ءۇي ساتىپ الىندى. قالعان سوماعا تۇرمىسقا قاجەتتى زاتتار الىندى.

تۇركياعا قولداۋ كورسەتۋ جاعىنان وتاندىق كاسىپكەرلەر دە قالىس قالمادى. ولار 50-گە جۋىق كيىز ءۇي ساتىپ الدى. وسىلايشا قازاقستاندىقتار تۇركياعا 100-گە جۋىق كيىز ءۇي جەتكىزدى.

تۇركيا ەلىنە كومەك كورسەتۋ ماقساتىندا جەرلەسىمىز نۇربەك بەكباۋ شوت اشقان. 7- اقپاننان باستاپ اتالعان شوتقا قازاقستاندىقتار قايىرىمدىلىق جاساپ جاتىر.

ەسكە سالايىق، قازاقستاندىقتار تۇركيا حالقىنا 100-گە جۋىق كيىز ءۇي جىبەرەتىنى تۋرالى حابارلاعان ەدىك.

اۆتور

داۋلەت ىزتىلەۋ