قازاقستاننىڭ ۆيزاسىز ساياساتى قىتايلىق تۋريستەردى قىزىقتىرۋدا - شەتەلدەگى قازاق باسپا ءسوزى

استانا. قازاقپارات - «قازاقپارات» ح ا ا شەت ەلدە قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

قازاقستاننىڭ ۆيزاسىز ساياساتى قىتايلىق تۋريستەردى قىزىقتىرادى - People.cn

2022 -جىلعى 8-شىلدەدەن باستاپ قازاقستان قىتاي سياقتى ەلدەردىڭ ازاماتتارى ءۇشىن ەڭ ۇزاق مەرزىمى 14 كۇن بولاتىن ءبىرجاقتى ۆيزاسىز جۇيەنى ەنگىزگەن بولاتىن. سوعان بايلانىستى قىتايلىق تۋريستەردىڭ نازارى قازاقستانعا اۋا باستاعان. بۇل تۋرالى وسى اپتادا قىتايدىڭ People.cn اقپارات پورتالى حابارلادى.

اتالعان باسىلىمنىڭ مالىمەتىنشە، قازاقستانعا ۆيزاسىز بارۋعا بولاتىنىن بىلگەننەن كەيىن گۋاڭجوۋلىق سياويان ەسىمدى ساياحاتشى شىڭجاڭدا شاڭعى تەۋىپ جۇرگەندە بيىلعى كوكتەمگى فەستيۆالدى قازاقستاندا وتكىزۋ تۋرالى وي كەلگەن. ءسويتىپ ول مەرەكەنى قازاقستاندا وتكىزەدى.

ونىڭ ايتۋىنشا، باسىندا شەتەلگە شىعۋ ويىندا بولماعان. شاڭعى تەبۋدى شىڭجاڭنىڭ سولتۇستىگىندە جوسپارلاعان. قازاقستانعا ۆيزاسىز بارۋعا بولاتىنىن بىلگەننەن كەيىن، سونداي-اق شىڭجاڭنان قازاقستانعا جول ءجۇرۋ ىڭعايلى بولعاندىقتان وسى ساپاردى قاراستىرعان.

تۋريست قورعاس قۇرلىق شەكاراسى ارقىلى ءوتىپ، الماتىعا بارادى.

قىتايدىڭ People.cn اقپارات پورتالىنىڭ دەرەگىنشە، سياويان شاڭعى سپورتىن جاقسى كورگەندىكتەن الماتىعا دەگەن كوزقاراسى ەرەك. «مۇندا ازياداعى ەڭ بيىك جانە ەڭ ۇزدىك تاۋ شاڭعىسى كۋرورتتارى بار. الماتىداعى تاۋ شاڭعىسى كۋرورتتارىنىڭ قۇرىلعىلارى مەن جابدىقتارى ساپالى، قار جولدارى ەرەكشە ءارى وعان ءدامدى تاماقتى قوسىڭىز. سونداي-اق جىلى اۋا رايى مەن اسەم تابيعاتتا دەمالىپ، تاماشا سەزىمگە بولەندىم»، - دەيدى تۋريست سياويان.

سياويانعا قازاقستاننىڭ بۇرىنعى استاناسى الماتىنىڭ تاريحي تامىرى تەرەڭدە جاتۋىمەن قاتار، الماتىدا تاۋار باعاسى ەل ىشىمەن سالىستىرعاندا تومەندىگىمەن ۇناعان...

سونداي-اق People.cn اقپارات پورتالىندا «شىڭجاڭ قاناس: تابيعات تۋدىرعان تاڭعاجايىپ كەسكىندەمە» دەگەن تاقىرىپتاعى سۋرەتتى اقپارات جارىق كوردى.

اتالعان باسىلىمنىڭ مالىمەتىنە قاراعاندا، شىڭجاڭنىڭ التاي ءوڭىرى مۇز بەن قاردىڭ ەرەكشە رەسۋرستارىمەن تانىمال. سوڭعى جىلدارى كوركەم قاناس اۋماعى ەكوتۋريزمدى، مادەني جانە اۋىلدىق ءتۋريزمدى ينتەگراتسيالاۋ مەن دامىتۋعا كوپ كۇش جۇمساعان. سونىمەن قاتار قار-مۇز تۋريزمىنىڭ جاڭا قىرىن اشۋ، وزدەرىنىڭ نەگىزگى قىزمەتتەرىن ۇنەمى جەتىلدىرىپ وتىرۋ شارالارىن ىسكە اسىرىپ كەلەدى.

«ءبىرازدان بەرى كوركەم قاناس اۋدانى كۇمىسپەن كومكەرىلدى. نەفريت بەلدەۋى سياقتانعان قاناس وزەنى قار مەن مۇزدىڭ اراسىندا شيىرشىق اتىپ، كوز الدىڭىزعا تاڭعاجايىپ سۋرەتتى ەلەستەتەدى. تاۋ ەتەگىنە دەيىن شوككەن بۇلتتار الىستاعى تاۋدى ءدال الدىڭىزعا اكەلىپ قويعانداي اسەر بەرەدى»، دەپ جازادى People.cn.

ەلشى قازاقستان مەن يران ۋنيۆەرسيتەتتەرى اراسىندا ارىپتەستىكتى دامىتۋ كەرەگىن ايتتى - Parstoday

يرانداعى قازاقستان ەلشىسى اسقات ورازباي مەن ونىڭ كەڭەسشىسى داۋىربەك دۇيسەباي شاريف تەحنولوگيا ۋنيۆەرسيتەتىنە بارىپ، وسى جوو مەن قازاقستانداعى بەدەلدى وقۋ ورىندارى اراسىندا عىلىم مەن تەحنولوگيا سالاسىندا ارىپتەستىكتى دامىتۋ كەرەگىن باسا ايتتى، دەپ حابارلايدى Parstoday اقپارات اگەنتتىگى.

اتالعان ۋنيۆەرسيتەت پەن قازاقستاننىڭ ۇزدىك ج و و-لارى اراسىندا ىنتىماقتاستىقتى دامىتۋ ماقساتىندا ۋنيۆەرسيتەت رەكتورى راسۋل دجاليلي ءبىر توپ پەداگوگتىڭ قاتىسۋىمەن جينالىس وتكىزگەن.

يران باسىلىمىنىڭ دەرەگىنشە، جينالىستا ۇستاز جانە ستۋدەنتپەن الماسۋ، قازاقستانداعى بەدەلدى وقۋ ورىندارىمەن بىرلەسە جوبانى ىسكە اسىرۋ جانە كيش حالىقارالىق وقۋ ورتالىعىندا ەكى ەلگە جارامدى سەرتيفيكات بەرىلەتىن كۋرستاردى وتكىزۋ سياقتى تاقىرىپتار تالقىلاندى.

ايماق اكىمىنە ارمان قۋانعان ۇلىنىڭ كانديداتۋراسىن قولدادى - Kaznews

9-اقپان كۇنى بايان- ولگي ايماعىنىڭ ازاماتتىق وكىلدەرى ءماسليحاتىنىڭ كەزەكتى XII وتىرىسى ءوتتى. ايماق دەپۋتاتتارى ءبىراۋىزدان ايماقتىڭ جاڭا اكىمىنە ارمان قۋانعان ۇلىنىڭ كانديداتۋراسىن قولداپ، موڭعوليا پرەمەر-مينيسترىنە ۇسىندى، دەپ حابارلايدى موڭعوليانىڭ Kaznews اقپارات پورتالى.

اتالعان ب ا ق-تىڭ مالىمەتىنشە، ايماق اكىمىنە تاعايىنداۋ تۋرالى وكىمدى موڭعوليا پرەمەر-ءمينيسترى شىعاراتىن بولادى.

ايتا كەتەيىك، ارمان قۋانعان ۇلى 1983 -جىلى تۋعان. گۋمانيتارلىق ۋنيۆەرسيتەتتى «بيزنەس، ەكونوميست» ماماندىعىمەن اياقتاپ، 2007 -جىلى بيزنەس باسقارۋ سالاسىنىڭ ماگيسترى اتاندى.

ايماقتىق اقپاراتتىق- كوممۋنيكاتسيا جەلىسى مەملەكەتتىك كاسىپورنىندا ديرەكتور، 2021 -جىلدان بايان-ولگي ايماعى اكىمىنىڭ ورىنباسارى قىزمەتىن اتقارعان.

سونداي-اق وسى اپتادا موڭعوليالىق ب ا ق-تا «ۇلانباتىردا قاجىمۇرات شەشەنقۇل ۇلىنىڭ ءان كەشى وتەدى» دەگەن اقپارات جاريالاندى.

Kaznews-تىڭ دەرەگىنشە، قازاقستاندىق تانىمال ءانشى قاجىمۇرات شەشەنقۇل ۇلى اقپاننىڭ 8-كۇنى ۇلانباتىر قالاسى «HOLIDAY INN» مەيرامحاناسىندا شىعارماشىلىق كەش وتكىزەدى.

ايتا كەتەيىك، «قارا جورعا»، «ماقپالجان»، «بۇلدىرگەن قىز»، «سەنى عانا» اندەرىمەن تانىمال بولعان ق. شەشەنقۇل ۇلى - قىتاي حالىق رەسپۋبليكاسى، التاي ايماعى قابا اۋدانىنىڭ تۋماسى. ول بۇگىندە ءوزىنىڭ انشىلىك، سازگەرلىك دارىنىمەن تىڭدارماننىڭ جۇرەگىنە جول تاۋىپ، ونەرسۇيەر قاۋىمنىڭ ىستىق ىقىلاسىنا بولەنىپ ءجۇر.

الەمدەگى ەڭ ۇلكەن بالشىقتى جانارتاۋدىڭ ءبىرى اتقىلاي باستادى - «ءوز ا»

تۇركىمەنستاننىڭ وڭتۇستىك- باتىسىندا الەمدەگى ەڭ ۇلكەن بالشىقتى جانارتاۋدىڭ ءبىرى اكپوتلوۆۋك اتقىلاي باستادى. جەر استىنان توپىراق، سۋ، مۇناي جانە شوگىندى جىنىستاردىڭ قوسپاسىنان قۇرالعان بالشىق اتقىلاپ، كۇكىرتتى سۋتەگىنىڭ ءيىسى اۋاعا تارالىپ جاتىر، دەپ حابارلايدى ءوزا اقپارات اگەنتتىگى.

اتالعان باسىلىمنىڭ كەلتىرگەن مالىمەتىنە سۇيەنسەك، ەكولوگ مەرەتدۋردي كيچيموۆتىڭ ايتۋىنشا، جانارتاۋ ءارتۇرلى سەبەپپەن ويانۋى مۇمكىن. گازداردىڭ ءبىر جەردە جينالۋىنان جەراستى سۋلارى جانارتاۋعا جىلدام ەنىپ جاتقان بولۋى مۇمكىن ولار تاستى جۇمسارتادى، ونى سازعا اينالدىرادى. ازىرگە بۇل اتقىلاۋ - قاۋىپسىز. ونىڭ قانشا ۋاقىتقا سوزىلاتىنىن بولجاۋ قيىن. ءبىراق ادەتتە ول بىرنەشە كۇنگە جالعاسادى.

ايتا كەتەيىك، اكپوتلوۆۋك جانارتاۋىنىڭ بيىكتىگى شامامەن 80 م، ال ورتالىق بولىگىندە ديامەترى شامامەن 150 مەتر بولاتىن بەلسەندى گازدى- بالشىقتى كول بار. جانارتاۋدان شىققان بالشىق ەمدىك ماقساتتا قولدانىلادى.

قازاقستاننان قۇتقارۋشىلاردىڭ ەكىنشى توبى كەلەدى - TRT

ق ر پرەزيدەنتى قاسىم-جومارت توقايەۆ تۇركيا رەسپۋبليكاسىنىڭ قازاقستانداعى ەلشىلىگىنە بارىپ، باۋىرلاس ەلدىڭ وڭتۇستىك- شىعىسىندا بولعان الاپات ءزىلزالا سالدارىنان مىڭداعان ادامنىڭ قازا تابۋىنا بايلانىستى كوڭىل ايتتى.

بۇل تۋرالى وسى اپتادا تۇركيا راديو تەلەۆيزيا پورتالى حابارلاعان بولاتىن.

«سونداي-اق قازاقستاننىڭ جان-جاقتى قولداۋ كورسەتەتىنىن جەتكىزدى. پرەزيدەنت كوڭىل ايتۋ كىتابىنا جازبا قالدىردى»، دەپ جازادى TRT.

اتالعان باسىلىمدا سونىمەن قاتار، «قازاقستاننان تۇركياعا قولداۋ كەلىپ جەتتى» دەگەن تاقىرىپتا اقپاراتتا جاريالاندى.

TRT- نىڭ دەرەگىنشە، قازاقستاننان تۇركياداعى جەر سىلكىنىسىنەن زارداپ شەككەن ايماقتاردا ىزدەستىرۋ-قۇتقارۋ جۇمىستارىنا قاتىساتىن 41 ادامنان تۇراتىن ىزدەۋ- قۇتقارۋ توبى كەلىپ جەتكەن. بورتىندا كەرەكتى قۇرال-جابدىقتار مەن ارنايى كولىكتەرى بار ۇشاق گازيانتەپ اۋەجايىنا قونعان.

اپتا سوڭىندا «قازاقستاننان قۇتقارۋشىلاردىڭ ەكىنشى توبى كەلەدى» دەگەن اقپاراتتى تۇركيالىق باسىلىم «قازاقپارات» حالىقارالىق اقپارات اگەنتتىگىنە سىلتەمە جاساپ حابارلادى.

ەسكە سالا كەتەيىك، ءتيىستى تاپسىرمانى قازاقستان پرەزيدەنتى قاسىم-جومارت توقايەۆ بەرگەن بولاتىن.

قازاقستان ت ج م قۇتقارۋشىلارىنىڭ تاعى ءبىر بورتى جويقىن جەر سىلكىنىسىنىڭ سالدارىن جويۋعا كومەك كورسەتۋ مۇمكىندىكتەرىن كەڭەيتۋ ءۇشىن تۇركياعا ۇشادى.

ەكىنشى ەشەلون قۇرامىندا جەكە قۇرامنان 60 ادام، ولاردىڭ ىشىندە ت ج م قۇتقارۋشىلارى، اپاتتار مەديتسيناسى ورتالىعىنىڭ دارىگەرلەرى، كينولوگيالىق ەسەپتەر بار. ت ج م جەدەل ارەكەت ەتۋ كۇشتەرىندە اۆاريالىق-قۇتقارۋ قۇرالدارى مەن جابدىقتاردىڭ 150 گە جۋىق جانە ءدارى-دارمەكتەردىڭ 160-تان استام ءتۇرى بار.

ايتا كەتەيىك، 6-اقپان كۇنى تۇركيادا بولعان جويقىن ءزىلزالادا زارداپ شەككەندەرگە كومەك كورسەتۋ ءۇشىن الەمنىڭ كوپتەگەن ەلى جۇمىلىپ جاتىر.

قازىرگى ۋاقىتتا قۇلاعان عيماراتتاردىڭ ۇيىندىلەرى استىندا قالعان ادامداردى قۇتقارۋ جۇمىستارى توقتاۋسىز جالعاسۋدا.

قازاقستان پارلامەنتى وزبەكستانمەن تۇتقىنداردى الماسۋ تۋرالى كەلىسىمدى راتيفيكاتسيالادى – «ءوز ا»

قازاقستان رەسپۋبليكاسىنىڭ پارلامەنتى وزبەكستانمەن تۇتقىنداردى الماسۋ تۋرالى كەلىسىمدى راتيفيكاتسيالادى. سەنات سايتىنداعى حابارعا سايكەس ق ر سەناتىنىڭ سپيكەرى ماۋلەن اشىمبايەۆتىڭ توراعالىعىمەن 9-اقپاندا پالاتا وتىرىسى ءوتىپ، وندا دەپۋتاتتار ءبىرقاتار زاڭدى قاراپ، ماقۇلدادى.

بۇل تۋرالى وسى اپتادا وزبەكستاندىق ءوزا اقپارات اگەنتتىگى دە حابارلادى.

اتالعان ب ا ق-تىڭ دەرەگىنشە، سەنات دەپۋتاتتارى «قازاقستان رەسپۋبليكاسى مەن وزبەكستان رەسپۋبليكاسى اراسىنداعى باس بوستاندىعىنان ايىرۋعا سوتتالعان ادامداردى جازاسىن ودان ءارى وتەۋ ءۇشىن بەرۋ تۋرالى شارتتى راتيفيكاتسيالاۋ تۋرالى» زاڭدى قاراپ، ماقۇلدادى.

«بۇل شارتتىڭ ماقساتى - سوتتالعانداردىڭ جازاسىن ءوز ەلدەرىندە وتەۋىنە، تۇزەلىپ، قوعامدىق ومىرگە قايتا بەيىمدەلۋىنە جاردەمدەسۋ. سەنات ءتوراعاسى اتاپ وتكەندەي، زاڭ باۋىرلاس ەكى ەل اراسىندا قۇقىق قورعاۋ سالاسىنداعى سەرىكتەستىكتى ودان ءارى نىعايتۋعا مۇمكىندىك بەرەتىنى ايتىلعان اقپاراتتا»، دەپ تۇيىندەيدى وزبەكستاندىق باسىلىم.

اۆتور

بەيسەن سۇلتان ۇلى