قازاقستاندىق وليمپيادا چەمپيونى كاسىبي سپورتتان كەتتى

استانا. قازاقپارات - وليمپيادا چەمپيونى ءارى كۇمىس جانە قولا جۇلدەگەرى، قازاقستاندىق جەڭىل اتلەت ولگا رىپاكوۆا كاسىبي مانسابىن رەسمي تۇردە اياقتادى، دەپ حابارلايدى قازاقپارات ءتىلشىسى.

قازاقستان جەڭىل اتلەتيكا فەدەراتسياسىنان ءمالىم ەتكەنىندەي، اتاقتى اتلەت بۇل تۋرالى استانادا جەڭىل اتلەتيكادان وتكەن جابىق كەشەندەگى X ازيا چەمپيوناتىندا حابارلادى.

«ەلىمە ريزامىن! پرەزيدەنت پەن سپورت جەتەكشىلەرىنەن باستاپ مەنىڭ ەڭ جاس جانكۇيەرلەرىمە دەيىن ءبىر عانا، ءبىراق وتە ماڭىزدى نارسە - ماعان سەنىمدەرى ءۇشىن العىس ايتامىن. مەنى تۇلعا رەتىندە، كاسىبي سپورتشى رەتىندە تانىتۋعا مۇمكىندىك بەرگەن تاعدىرعا جانە قۇدايعا العىس ايتامىن»، دەدى و. رىپاكوۆا.

وتاندىق سپورتتىڭ دامۋىنا ۇلكەن ۇلەس قوسقانى ءۇشىن ق ر پرەمەر-ءمينيسترى سپورتشىعا العىسحات جولدادى.

«ءسىزدىڭ جارقىن جەڭىستەرىڭىز قازاقستاندىق جانكۇيەرلەردىڭ جۇرەگىندە ماڭگى قالادى. ءبىز ءسىزدىڭ سپورتقا جانە پرينتسيپتەرگە دەگەن ادالدىعىڭىزدى باعالايمىز. ەل بويىنشا مىڭداعان بالا سىزدەن ۇلگى الادى جانە وتاندىق جەڭىل اتلەتيكا ءداستۇرىن جالعاستىرادى. وتاندىق سپورتتى دامىتۋعا قوسقان ۇلەسىڭىز ءۇشىن زور العىسىمىزدى بىلدىرەمىز.

قۇرمەتپەن، ق ر پرەمەر ءمينيسترى ءاليحان سمايىلوۆ»، دەلىنگەن العىسحاتتا.

سالتانات سوڭىندا سپورتشى جانكۇيەرلەر الدىندا قۇرمەت شەڭبەرىن جۇگىرىپ ءوتتى.

ەسكە سالا كەتەيىك، بۇدان بۇرىن جەڭىل اتلەتيكادان ازيا چەمپيوناتىندا قازاقستان قۇراماسىنىڭ ەستافەتادان چەمپيون اتانعانىن جازعان بولاتىنبىز.

سونداي-اق قازاقستاندىق جەڭىل اتلەتتەر بەسىنشى التىن مەدال الدى.

قازاقستان قورجىنىنا 6-التىن مەدال ءتۇستى.

فوتو - قازاقستان جەڭىل اتلەتيكا فەدەراتسياسى