پەش پەن مۇرجانى ۋلانىپ قالماۋ ءۇشىن قانشالىقتى ءجيى تازارتۋ كەرەك

وسكەمەن. قازاقپارات - شىعىس قازاقستان وبلىسىنىڭ قۇتقارۋشىلارى كومىرقىشقىل گازىمەن ۋلانىپ قالماس ءۇشىن پەش پەن مۇرجانى قانشالىقتى ءجيى تازارتۋ كەرەكتىگىن ءتۇسىندىردى، دەپ حابارلايدى قازاقپارات ءتىلشىسى.

ش ق و ت ج د باسپا ءسوز قىزمەتىنىڭ مالىمەتىنە سۇيەنسەك، وڭىردە جىلىتۋ ماۋسىمى باستالعالى بەرى پەش جاعىپ وتىرعان جەر ۇيلەردە 80-گە جۋىق ءورت بولدى. كومىرتەگى توتىعىنان 13 ادام ۋلانىپ، اۋرۋحاناعا جاتقىزىلعان. وسى رەتتە، قۇتقارۋشىلار پەش پەن ءتۇتىن مۇرجاسىن قانشالىقتى ءجيى تازالاۋ قاجەتتىگىن ءتۇسىندىردى.

«قازاقستان رەسپۋبليكاسىنىڭ ءورت قاۋىپسىزدىگى قاعيدالارىنا سايكەس، ءتۇتىن مۇرجالارى مەن پەشتەردى تازارتۋ جىلىتۋ ماۋسىمى باستالعانعا دەيىن جانە ءۇش ايدا ءبىر رەت جۇرگىزىلۋى ءتيىس. جالپى مۇرجا پەن پەشتىڭ تازالاۋدى قاجەت ەتەتىنىن ءتۇسىنۋ اسا قيىن ەمەس. ءتۇتىن مۇرجاسى بىتەلىپ قالعاندىعىن، وت جاققان كەزدە جالىننىڭ ناشار تارتىلۋىنان نەمەسە وزدىگىنەن سونۋىنەن بايقاۋعا بولادى. سونداي- اق پەشتەگى جالىننىڭ ءتۇسى قىزعىلت سارى بولىپ، وت جانعاندا جاعىمسىز ءيىس سەزىلۋى مۇمكىن. پەشتى اكپەن ۇنەمى اعارتىپ وتىرۋ قاجەت. اق فوندا ءتۇتىن شىعىپ جاتقان قاۋىپتى جەر بىردەن كورىنەدى»، - دەيدى دەپارتامەنتتىڭ مەملەكەتتىك ءورت باقىلاۋ باسقارماسىنىڭ باستىعى نۇرجان ءومىرجانوۆ.

قۇتقارۋشىلار بيىلعى جىلىتۋ ماۋسىمىندا قاۋىپسىزدىك ماقساتىندا 168000 ءۇيدى ارالاپ شىقتى. ناتيجەسىندە، جىلىتۋ جۇيەلەرىن پايدالانۋ كەزىندە ءورت قاۋىپسىزدىگى تالاپتارىن بۇزۋدىڭ 21000 فاكتىسى تىركەلدى. مامانداردىڭ ءتۇسىندىرۋ جۇمىستارىنىڭ ارقاسىندا پەش جاعىپ وتىرعان 7900-دەن استام ۇيدە بۇزۋشىلىقتار جويىلدى.

اۆتور

تالعاتجان مۇحامەتبەك ۇلى