تۇركيانىڭ كەيبىر اۋداندارىندا قۇتقارۋشىلار ىزدەستىرۋ جۇمىسىن توقتاتۋعا ءماجبۇر
ءتىرى قالعانداردى ىزدەستىرۋ جۇمىستارى جالعاسىپ جاتىر، ءبىراق نەمىس جانە اۆستريالىق قۇتقارۋشىلار توناۋ مەن اتىس سالدارىنان اپات اۋماعىندا جۇمىسىن توقتاتتى. بۇل تۋرالى قازاقپارات BBC-گە سىلتەمە جاساپ حابارلايدى.
قۇتقارۋشىلاردىڭ وزدەرىنە قاۋىپ ءتوندى
ەكى نەمىس ۇيىمى - گەرمانيانىڭ حالىقارالىق ىزدەستىرۋ جانە قۇتقارۋ قىزمەتى (ISAR) جانە گەرمانيانىڭ تەحنيكالىق كومەك كورسەتۋ جونىندەگى فەدەرالدىق اگەنتتىگى (THW)، ودان كەيىن تاعى بىرنەشە ۇيىم تۇركيانىڭ وڭتۇستىگىندە قۇتقارۋ جۇمىستارىن توقتاتتى.
«ءارتۇرلى توپتار اراسىنداعى قاقتىعىس تۋرالى حابارلار كوبەيىپ كەلەدى، سونىمەن قاتار وق اتقان دىبىستار دا ەستىلەدى»، - دەپ ءتۇسىندىردى ISAR وكىلى شتەفان حاينە.
ISAR جانە THW تۇركيانىڭ ازاماتتىق قورعانىس قىزمەتى تۇركيا توتەنشە جاعدايلار باسقارماسى (AFAD) ولارعا قاۋىپ سەيىلگەنىن حابارلاعان جاعدايدا ىزدەستىرۋ جۇمىسىنا قايتا كىرىسۋگە دايىن ەكەنىن جەتكىزدى.
بۇعان دەيىن اۆستريا اسكەريلەرى تۇركياداعى قۇتقارۋ جۇمىسىن توقتاتقان بولاتىن. ولاردىڭ وكىلىنىڭ ايتۋىنشا، كەيبىر توپتار اراسىنداعى اتىس- شابىس پەن مورادەرلىك قۇتقارۋشىلارعا ۇلكەن قاۋىپ تۋدىرىپ وتىر.
تۇرىك بيلىگى قاقتىعىستار نەمەسە اتىس تۋرالى حابارلاپ جاتقان جوق، ءبىراق ەل پرەزيدەنتى رەجەپ تاييپ ەردوعان سەنبى كۇنى جەر سىلكىنىسىنەن زارداپ شەككەن ايماقتا توناۋ فاكتىلەرى بار ەكەنىن مويىنداپ، بيلىك شارا قولداناتىنىنا سەندىردى.
ەسكە سالايىق، تۇركياداعى الاپات ءزىلزالا 6-اقپان كۇنى كاحرامانماراش- پازاردجيك اۋدانىندا 7,7 بالل قۋاتىمەن جانە ەلبيستاندا 7,6 بالل قۋاتىمەن باستالعان ەدى. ارتىنان 648 افتەرشوك تىركەلدى. جەراستى ءدۇمپۋى ەلدىڭ 10 پروۆينسياسىندا، سونداي-اق كورشىلەس ەلدەردە، سونىڭ ىشىندە سيريادا سەزىلدى.
وسى كۇندەرى زارداپ شەككەن حالىقتى قۇتقارۋعا قازاقستان ماماندارى دااتسالىسىپ جاتىر.
