پرەزيدەنت سەرگەي تەرەشەنكونىڭ وتباسىنا كوڭىل ايتۋ جەدەلحاتىن جولدادى

استانا. قازاقپارات - قاسىم-جومارت توقايەۆ كورنەكتى مەملەكەت جانە قوعام قايراتكەرى سەرگەي تەرەشەنكونىڭ قايتىس بولۋىنا بايلانىستى ونىڭ وتباسى مەن جاقىندارىنا كوڭىل ايتتى، دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.

- سەرگەي الەكساندروۆيچ ەڭبەك جولىندا كولحوز ينجەنەرىنەن باستاپ قازاقستان رەسپۋبليكاسى ۇكىمەتىنىڭ ءبىرىنشى ءتوراعاسىنا دەيىنگى كاسىبي بەلەستەردەن ءوتتى. ونىڭ باسشىلىعىمەن قازاقستان تاۋەلسىزدىك العان جىلدارى اۋقىمدى الەۋمەتتىك-ەكونوميكالىق رەفورمالار ازىرلەنىپ، جۇزەگە اسىرىلدى. بەلسەندى قوعام قايراتكەرى جانە كاسىپكەر رەتىندە س. تەرەشەنكو ەلىمىزدىڭ دامۋىنا، بەيبىتشىلىك پەن كەلىسىمدى نىعايتۋعا ولشەۋسىز ۇلەس قوستى. ەرەكشە سىڭىرگەن ەڭبەگى ءۇشىن «قازاقستاننىڭ ەڭبەك ەرى» جوعارى اتاعىمەن، باسقا دا مەملەكەتتىك ناگرادالارمەن ماراپاتتالدى، - دەلىنگەن جەدەلحاتتا.

وسىعان دەيىن قازاقستاننىڭ ءبىرىنشى پرەمەر-ءمينيسترى سەرگەي تەرەشەنكو ومىردەن وزعانى حابارلاندى.