تۇركيادا جەر سىلكىنىسىنەن قيراعان عيماراتتارعا جاۋاپتىلار جازالانادى - مينيستر

ديارباكىر. انادولى- قازاقپارات - جەر سىلكىنىسىنە ۇشىراعان پروۆينتسيالارداعى عيماراتتاردى سالعان جانە قابىلداپ العان جاۋاپتى ادامدارعا قاتىستى تەرگەۋ باستالدى.

بۇل جايىندا تۇركيانىڭ ادىلەت ءمينيسترى بەكير بوزداع مالىمدەدى، دەپ حابارلايدى قازاقپارات انادولى اگەنتتىگىنە سىلتەمە جاساپ.

مينيستر بوزداع ديارباكىردىڭ باعلار اۋدانىنداعى قۇتقارۋ جۇمىستارىمەن تانىستى.

ونىڭ سوزىنە سەنسەك، قازىر كەلگەن شىعىندى ەسەپتەۋ جۇمىسى ءجۇرىپ جاتىر. كىنالىلەر جاۋاپقا تارتىلادى.

بۇگىنگى كۇنگە دەيىن سۋديالار مەن پروكۋرورلار كەڭەسى جەر سىلكىنىسى ايماقتارىنداعى سوت پروتسەستەرىن باسقارۋ ءۇشىن 206 پروكۋروردى تاعايىنداعان.

بەكير بوگزداعتىڭ ايتۋىنشا، تۇركياداعى عيماراتتاردىڭ قۇلاۋىنا نەمقۇرايدىلىق اكەلۋى مۇمكىن، سوندىقتان بارلىق جاۋاپتى ادامدار جازالانادى.

«ءبىز بۇل سوت پروتسەستەرىن بۇكىل حالىق بولىپ مۇقيات قاداعالايمىز. نەمقۇرايلىق تانىتقاندار جاۋاپقا تارتىلادى»، - دەدى مينيستر.

AFAD دەرەگىنە سايكەس، 6-اقپان كۇنى تۇركيانىڭ كاحرامانماراش- پازاردجيك اۋدانىندا 7,7 بالل قۋاتىمەن جانە ەلبيستاندا 7,6 بالل قۋاتىمەن جەر سىلكىنگەننەن كەيىن 648 افتەرشوك بولعان.

جەراستى ءدۇمپۋى ەلدىڭ 10 پروۆينسياسىندا، سونداي-اق كورشىلەس ەلدەردە، سونىڭ ىشىندە سيريادا سەزىلدى.

8-اقپاندا تۇرىك ەلىندە 5,4 ماگنيتۋداسىمەن تاعى ءبىر سىلكىنىس تىركەلدى.

ەسكە سالايىق، قازاقستان قۇتقارۋشىلارى مىنگەن بورت 7-اقپان كۇنى گازيانتەپكە اتتانعان بولاتىن. ماماندارىمىزدىڭ ەكىنشى توبى گازيانتەپكە كەشكە كەشقۇرىم جەتتى.

قازىر تۇركياداعى جەر سىلكىنىسى كەزىندە جوعالىپ كەتكەن قازاقستاندىقتاردىڭ ەكەۋىنىڭ دەنەسى تابىلدى. ال سابينا مامادياروۆا 8-اقپان كۇنى كەشكە امان-ەسەن تابىلعان ەدى.