قاڭتار ايىندا باسپانا باعاسى قالاي وزگەردى

استانا. قازاقپارات - قازاقستاندا وتكەن قاڭتار ايىندا ءۇيدى ساتۋ جانە جالعا الۋ قۇنى ءوستى. بۇل تۋرالى ۇلتتىق ستاتيستيكا بيۋروسىنان ءمالىم ەتتى، دەپ حابارلايدى قازاقپارات.

تۇرعىن ءۇي نارىعىندا باعا ءبىر اي ىشىندە (2022 -جىلعى جەلتوقسان - 2023 -جىلعى قاڭتار) جاڭا ۇيگە - %0,7، قولدانىستاعى ۇيگە %0,3 ءوستى. جالعا بەرۋ قۇنى %2,5 قىمباتتادى.

قاڭتاردا باسپانانىڭ 1 شارشى مەترىنىڭ ورتاشا باعاسى كەلەسىدەي بولدى:

- جاڭا ءۇي – 481891 ت گ؛

- قولدانىستاعى ءۇي - 515019 ت گ؛

- جالعا بەرىلەتىن ءۇي - 4671 ت گ

ايتا كەتەيىك، ءبىر جىلدا (2022 -جىلعى قاڭتار - 2023 -جىلعى قاڭتار ارالىعىندا) قولدانىستاعى پاتەردى قايتا ساتۋ باعاسى - %18,7، جاڭا باسپانانى ساتۋ %14 قىمباتتادى. ال اباتتاندىرىلعان تۇرعىن ءۇيدى جالعا الۋ قۇنى %34,3 ارتتى.

وڭىرلەر بويىنشا ءبىر جىلدا جاڭا پاتەرلەر كەلەسى قالالاردا ەداۋىر قىمباتتادى: اقتاۋ -%28,2، اقتوبە - %25,4، پەتروپاۆل - %20,9.

قولدانىستاعى پاتەرلەر ەڭ كوپ قىمباتتاعان قالالار: سەمەي %46,8، قىزىلوردا %38,8، اقتوبە (%37,3)، اقتاۋ (%35,4)، تالدىقورعان (%32,9)، قوستاناي %31.

باسپانا ارەنداسى ەڭ كوپ قىمباتتاعان قالالار: قوستاناي %55,6، كوكشەتاۋ %55,1 ، الماتى %50,7.