وليمپيادا مەدالىن جەڭىپ العان تۇڭعىش قازاق

استانا. قازاقپارات - عۇسمان قوسانوۆتىڭ ەسىمى قازاق سپورتىنىڭ شەجىرەسىندە ەرەكشە ارداقتالىپ، ايرىقشا قۇرمەتتەلەدى. ويتكەنى، ول - وليمپيادا ويىندارىنىڭ مەدالىن موينىنا تاققان تۇڭعىش قازاق! عۇسمان قوسانوۆتىڭ ەسىمى سونىسىمەن قىمبات، سونىسىمەن قادىرلى.

قازاقتىڭ داڭقتى جەلاياعى 1935 - جىلدىڭ 25 - مامىرىندا سەمەي وبلىسى، بەسقاراعاي اۋدانىنىڭ يزاتوللا اۋىلىندا دۇنيەگە كەلگەن. ورتا مەكتەپتى ءتامامداعان سوڭ، سەمەي قالاسىنداعى №13 تەمىر جول ۋچيليششەسىنە وقۋعا تۇسەدى. كەيىننەن كيشينەۆتەگى (مولدوۆا) دەنە تاربيەسى تەحنيكۋمىن، الماتى دەنە تاربيەسى ينستيتۋتىن بىتىرگەن.

عۇسمان قوسانوۆ 1960 - جىلعى ريم وليمپياداسىندا كەڭەس وداعىنىڭ قۇراماسىندا باق سىناپ، ل.بارتەنەۆ، يۋ.كونوۆالوۆ جانە ە. وزولين سىندى جەلاياقتارمەن بىرگە 4х100 مەترلىك ەستافەتالىق بايگەدە (ك س ر و قۇراماسىنىڭ ناتيجەسى - 40,1 سەكۋند) كۇمىس جۇلدەگەر اتانعان. حالقىمىزدىڭ ماقتان تۇتار جەلاياعى يتاليا استاناسىندا وتكەن وليمپيادادا 100 مەترلىك قاشىقتىقتا دا جارىس الاڭىنا شىققان بولاتىن. ول بۇل سىندا 10،7 سەكۋند ناتيجەسىمەن جالپى ەسەپتە 6-ورىنعا تابان تىرەدى.

عۇسمان قوسانوۆ 1964 - جىلعى توكيو وليمپياداسىنا دا قاتىستى. جاپون جەرىندەگى الاماندا عۇسمان اعامىز 100 مەتردى 10،9 سەكۋندتا قيىپ ءوتىپ، جالپى كورسەتكىشتە 6- ورىننان كورىندى. ال، ەستافەتالىق جارىستا ە.وزولين، ب.زۋبوۆ، ب.ساۆچۋكپەن بىرگە بەسىنشى ورىنعا تۇراقتادى.

قازاق ۇلتىنىڭ اتىن جەر-جاھانعا ءماشھۇر ەتكەن قوسانوۆتىڭ باسقا اتاقتارى دا ءبىر باسىنا جەتىپ ارتىلادى. ماسەلەن، ول - ەۋروپا چەمپيونى، ك س ر و چەمپيوناتىنىڭ كۇمىس جۇلدەگەرى، قازاقستاننىڭ بىرنەشە دۇركىن چەمپيونى، ك س ر و حالىقتارى سپارتاكياداسىنىڭ جەڭىمپازى. ءتىپتى، جەڭىل اتلەتيكادان قازاق جاستارى اراسىنان شىققان تۇڭعىش سپورت شەبەرى دە وسى عۇسمان اعامىز.

عۇسمان قوسانوۆ سپورتتىق عۇمىرى اياقتالعان سوڭ جاس شاكىرتتەردى تاربيەلەپ، باپكەرلىككە دەن قويدى. جەڭىل اتلەتيكا بويىنشا رەسپۋبليكالىق جوعارى سپورتتىق شەبەرلىك مەكتەبىنىڭ ديرەكتورى قىزمەتىن ابىرويلى اتقاردى.

ول 1993 - جىلى ومىردەن وزدى. بۇگىنگى تاڭدا جەڭىل اتلەتيكادان عۇسمان قوسانوۆ اتىنداعى ءىرى حالىقارالىق مەموريال تۇراقتى تۇردە وتكىزىلىپ كەلەدى. ءبىر اتاپ وتەرلىگى، بۇل تۋرنيردە وليمپيادا ويىندارىنىڭ جولدامالارى ساراپقا سالىنادى.

ءسوز رەتى كەلگەندە ايتا كەتەيىك، ەلىمىزدىڭ جەڭىل اتلەتيكاسىنىڭ ارعى-بەرگى تاريحىنا كوز سالىپ قاراساق، وليمپيادا ويىندارىندا عۇسمان قوسانوۆتىڭ جەتىستىگىنە يەك ارتقان بىردە-ءبىر قازاق سپورتشىسى ءالى كۇنگە دەيىن شىققان جوق. بۇل - بولاشاق قازاق جەلاياقتارىن دايىندايتىن باپكەرلەردىڭ جۇمىسىنا ۇلكەن سىن بولۋى ءتيىس!