سيريادا كىندىگى كەسىلمەگەن نارەستە ءۇيىندى استىنان قۇتقارىلدى
نارەستە تابىلعاندا ونىڭ كىندىگى دە كەسىلىپ ۇلگەرمەگەن ەدى. قاسىنداعى اناسى قيراعان ءۇيىندى اراسىندا كوز جۇمعان.
«ۇيىندىلەردى قازىپ جاتقاندا، داۋىس ەستىدىك جانە كىندىگى كەسىلمەگەن ءسابيدى تاپتىق. كىندىگىن ءوزىمىز كەستىك، نەمەرە قارىنداسىم قىزدى اۋرۋحاناعا اپاردى»، - دەدى اناسىنىڭ نەمەرە اعاسى حاليل ءال- سۋۆادي AFP اگەنتتىگىنە.
قۇتقارىلعان نارەستە قازىر افرين قالاسىنداعى بالالار اۋرۋحاناسىندا جاتىر. دارىگەرلەر ونىڭ جاعدايى تۇراقتى ەكەنىن ايتۋدا، ءبىراق ونىڭ دەنەسى كوگەرگەن، جاراقان العان جانە دەنەسى سۋىپ قالعان.
ءسابيدىڭ وتباسىنان ەشكىم ءتىرى قالمادى. ولار تۇرعان بەس قاباتتى ۇيدە جەرمەن- جەكسەن بولعان.
سونىمەن بىرگە، سيريالىق قۇتقارۋشىلار تۇتاس وتباسى مۇشەلەرىن ءۇيىندى استىنان الىپ شىقتى. ونداعى بالالار ەكى بەتون پليتانىڭ اراسىندا 36 ساعات بويى كومەك كۇتكەن. ءماريام ەسىمدى قىز قۇتقارۋشىلار كەلگەنشە ءىنىسىن قولىمەن جاۋىپ، مۇمكىندىگىنشە قورعاعان. قازىر بالالار اۋرۋحاناعا جەتكىزىلىپ، مەديتسينالىق كومەك كورسەتىلىپ جاتىر.
ايتا كەتەيىك، سيريانىڭ ءتۇرلى ايماقتارىندا ەكى جويقىن جەر سىلكىنىسى قۇرباندارىنىڭ سانى 2802-گە دەيىن ءوستى. زارداپ شەككەندەردىڭ سانى - 5035.
اۆتور
ايجان سەرىكجان قىزى
