گازيانتەپتەن ورالعان قازاقستاندىقتار ءزىلزالا تۋرالى ەستەلىكتەرىن ايتتى
جويقىن ءزىلزالا كۋاگەرلەرى وقيعانىڭ ءمان-جايىن ايتىپ بەردى، دەپ حابارلايدى قازاقپارات.
جولاۋشىلاردىڭ ءبىرى - الماتىلىق مارينا فارگەيەۆا تۇركيادا ءبىلىم الىپ جاتقان نەمەرەسىنە قىدىرىپ بارعان. ونىڭ ەكىنشى نەمەرەسىنىڭ اياعىنا زاقىم ءتيىپ، ەلگە بالداقپەن جەتتى.
«ارينە، جەر سىلكىنىسى قورقىنىشتى نارسە، قازىر ۇيىمىزگە امان جەتكەنىمىزگە قۋانىشتىمىز. مەنىڭ نەمەرەم تۇركياداعى مەديتسينالىق ۋنيۆەرسيتەتتە وقيدى. ەكىنشى نەمەرەمدى الىپ، قوناققا بارعانبىز. ينستيتۋتتا نەمەرەمە قازاقستان ەلشىلىگىنە جۇگىنۋ كەرەكتىگى ايتىلدى. سوندىقتان ءبىز ەلشىگە وتە ريزامىز. ول بارلىق سۇراقتارىمىزعا جاۋاپ بەردى، ءبارىن تەز جاسادى. قازىر وتانىمىزعا كەلدىك. كومەك ءۇشىن راحمەت ايتامىز»، - دەدى مارينا فارگەيەۆا ەلوردا اۋەجايىندا تىلشىلەرگە بەرگەن سۇحباتىندا.
تاعى ءبىر وتانداسىمىز اسادۋللا ارىستانوۆ گازيانتەپ قالاسىنا جەكە جۇمىسىمەن، بيزنەسپەن اينالىسۋعا كەلگەن. ول يران مەن تۇركيادان توقىما بۇيىمدار مەن كىلەمدەر اكەپ ساتادى.
«بىرىنشىدەن، مەن ەلىمىزدىڭ پرەزيدەنتى قاسىم-جومارت توقايەۆقا العىسىمدى بىلدىرەمىن. قازاقستاننىڭ تۇركياداعى ەلشىسى ەركەبۇلان ساپيەۆكە دە العىس ايتقىم كەلەدى. ءبىز راسىندا دا قيىن جاعدايدا قالدىق. كونسۋلدىقتىڭ رەسمي سايتىنا كىرىپ، ديپلوماتيالىق وكىلدىك قىزمەتكەرىنىڭ ءنومىرىن تاپتىق. ولار بىزگە بىردەن جاۋاپ بەردى. ءبىر قوڭىراۋدان كەيىن قازاقستاننىڭ تۇركياداعى ەلشىلىگىنىڭ قىزمەتكەرلەرى حابارلاسىپ، ەۆاكۋاتسيانى ۇيىمداستىردى. بىزگە جول كورسەتىپ، قايدا كۇتەتىنىن ءتۇسىندىردى. ازاماتتارىن قيىنشىلىقتا قالدىرماي، ەلىنە امان-ەسەن جەتكىزگەنى ءۇشىن پرەزيدەنت پەن ەلشىلىككە العىسىمىزدى بىلدىرەمىز»، - دەيدى اسادۋللا ارىستانوۆ.
الماتىلىق رايحان نابيەۆا گازيانتەپتە تۇراتىن تۋىستارىنا قوناققا بارعان جانە سوندا ءۇش اي تۇرۋدى جوسپارلاعان.
«الايدا جەر سىلكىنىسى مەنىڭ جوسپارلارىمدى وزگەرتتى. ماعان كومەكتەسكەن تۇركيانىڭ قازاقستانداعى ەلشىلىگىنىڭ قىزمەتكەرلەرىنە راحمەت، امان-ەسەن ەلىمە جەتتىم. جيەنىم الماتىدا پوليتسيادا جۇمىس ىستەيدى. ول ماعان كومەكتەستى، قىزمەتكەرلەرمەن، قۇتقارۋشىلارمەن حابارلاستى. بارشا قازاقستاندىقتارعا راحمەت. ءبارى جاقسى، ۋاقىتىندا قۇتقارىلدى، جاقسى ۇشتى. جەر سىلكىنىسى بولعان كەزدە قوناقتا وتىر ەدىم. ەستىگەن بويدا كوشەگە جۇگىرىپ شىعىپ، تاڭعا دەيىن كولىكتەردە وتىردىق. قۇربان بولعاندار كوپ بولدى. اللا بارلىعىنا جاردەم بەرسىن»، - دەدى رايحان نابيەۆا.
تۇركيادان ارنايى ۇشاقپەن كەلگەن قازاقستان ازاماتتارىنىڭ اراسىندا فارماتسيەۆت ەرمەك بيسەنبايەۆ پەن ەلەنا لي دە بولدى. ولار گازيانتەپكە ىسساپارمەن بارعان.
«ءبىز فارماتسيەۆتيكالىق كومپانيادانبىز. گازيانتەپكە ىسساپارمەن باردىق. بارلىعى كوز الدىمىزدا بولدى، مۇنداي جەر سىلكىنىسىن ومىرىمىزدە ءبىرىنشى رەت كوردىك. قۇدايعا شۇكىر، وسى ۋاقىت ىشىندە ەلشىلىك قىزمەتكەلەرىمەن بايلانىستا بولدىق. ولار بىزگە جان-جاقتى قولداۋ كورسەتتى. قازاقستاننىڭ تۇركياداعى ەلشىلىگىنە العىسىمىزدى بىلدىرگىمىز كەلەدى. گازيانتەپكە ەلشى ەركەبۇلان ساپيەۆتىڭ ءوزى كومەكشىسىمەن بىرگە كەلدى. ولار ءبىزدىڭ توتەنشە جاعدايلار مينيسترلىگىنىڭ دەلەگاتسياسىمەن بىرگە بولدى، ولاردى قارسى الدى، ءبىزدى ەۆاكۋاتسيالاۋدى ۇيىمداستىردى. ول جەردە رەيستەر توقتاتىلدى. ءبىز سوندا قانشا بولاتىنىمىزدى بىلمەدىك. ءبىراق ەلشىلىگىمىزدىڭ ارقاسىندا ارنايى ۇشاقپەن ۇشا الدىق»، - دەدى فارماتسەۆت ەرمەك بيسەنبايەۆ.
ەلەنا ليدىڭ ايتۋىنشا، جەر استى ءدۇمپۋىن سەزگەننەن كەيىن بەس فارماتسەۆتتەن تۇراتىن توپ دەرەۋ قۇجاتتارىن جيناپ، كيىنىپ، كوشەگە جۇگىرىپ شىققان.
«ءبىز قوناق ۇيدە بولدىق. شىندىعىندا، ءبىز تۇندە كەلگەندىكتەن، احۋالدى بىردەن تۇسىنە قويمادىق. ءبىزدىڭ كوماندانىڭ ءبىر بولىگى الماتىدان، ءبىر بولىگى امىرلىكتەن ۇشىپ كەلدى. قاتتى شارشادىق. كوپتەگەن ادامدار سابيلەرىمەن جالاڭاياق دالادا ءجۇردى. قار ەكى ساعاتتان استام ۋاقىت جاۋدى. بارلىعى سىرتتا تۇرىپ، جەر استى ءدۇمپۋىنىڭ باسىلۋىن كۇتىپ تۇردى»، - دەپ ءبولىستى ەلەنا لي.
سونداي-اق، قازاقستاننىڭ ارنايى ۇشاعىمەن قىرعىزستاندىق ەرلى-زايىپتى جانات پەن ايبوبەك كەلدى. ولار گازيانتەپتە تۇرادى جانە جۇمىس ىستەيدى. ونىڭ ايەلى شىمكەنتتە تۋىپ-وسكەن. سوندىقتان ەرلى-زايىپتىلار استاناعا ارنايى بورتپەن كەلدى. سودان كەيىن ولار شىمكەنتكە، ءارى قاراي بىشكەككە بارۋدى جوسپارلاپ وتىر.
«بۇل مەنىڭ العاشقى تاجىريبەم، ءزىلزالانى ءبىرىنشى رەت كورۋىم. ءبىزدىڭ ەلدە جەر سىلكىنىسى 3-5 سەكۋندقا سوزىلاتىن، ال وندا ءبىر جارىم مينۋت بويى قوزعالىپ تۇردى. ونىڭ ۇستىنە تاڭعى تورتتە شىرت ۇيقىدا جاتقان ەدىك. ۇيىمىزدە جارىقشاق پايدا بولدى، تولىق قيراعان جوق، ويتكەنى سالىستىرمالى تۇردە جاڭا عيمارات ەدى»، - دەپ ەسكە الدى جانات.
فوتو: انادولۋ اگەنتتىگى
