قازاقستاندىق قۇتقارۋشىلار تۇرىك ارىپتەستەرىمەن بىرگە ءۇيىندى استىنان ايەلدى شىعارىپ الدى

استانا. قازاقپارات - تۇركياعا كومەككە بارعان قازاقستاندىق قۇتقارۋشىلار باسقا ارىپتەستەرىمەن بىرلەسىپ ءۇيىندى استىنان زارداپ شەككەن ايەلدى شىعارىپ الدى، دەپ حابارلايدى قازاقپارات ت ج م سىلتەمە جاساپ.

«تۇركياعا كەلگەن قازاقستاندىق قۇتقارۋشىلار كۇردەلىلىگى جوعارى وبەكتىلەرگە بەكىتىلگەن بولاتىن. وتكەن تاۋلىكتە ءبىرىنشى توپ وتە كولبەۋ كەلگەن التى قاباتتى ءۇيدى زەرتتەدى، ءۇي شوگىپ جاتىر، قۇتقارۋشىلار قيىن جاعدايدا جۇمىس ىستەۋدە. بلوكتان شىعارۋ جانە ۇيگە كىرۋ جۇرگىزىلدى، ىزدەستىرۋ كەزىندە قازا تاپقان 3 ايەلدىڭ دەنەسى تابىلىپ شىعارىلدى، ۇيىندىلەردى تازارتۋ، قۇرىلىس كونسترۋكتسيالارىن شىعارۋ ءجۇرىپ جاتىر»، - دەلىنگەن حابارلامادا.

ەكىنشى توپ تولىعىمەن قيراعان 9 قاباتتى ەكى ءۇيدى تەكسەرۋگە الدى. سونىمەن قاتار جەرگىلىكتى قۇتقارۋشىلارمەن بىرگە ءتىرى ادامدى - زارداپ شەككەن ايەلدى شىعارىپ الدى.

وسى وبەكتىدە قۇتقارۋشىلار ءبىر ادامنىڭ دەنەسىن تاپتى. قيراۋ ورنىندا كۇردەلى جاعداي قالىپتاسۋدا. قۇتقارۋشىلار ۇيىندىلەر اراسىنان ادامداردى جىلدام ىزدەستىرۋ ءۇشىن بارلىق قاجەتتى شارالاردى قابىلداۋدا.

جۇمىستار تاۋلىك بويى جۇرگىزىلۋدە.

ايتا كەتسەك، قازاقستان توتەنشە جاعدايلار مينيسترلىگىنىڭ قۇتقارۋشىلارى جەر سىلكىنىسى سالدارىن جويۋعا كومەك كورسەتۋ ءۇشىن الماتىدان تۇركياعا اتتاندى.

ونىڭ قۇرامىندا قازاقستاننىڭ رەسپۋبليكالىق جەدەل قۇتقارۋ جاساعىنىڭ قۇتقارۋشىلارى، مەديتسينالىق قىزمەتكەرلەر جانە قۇتقارۋشى يتتەر بار.

ءتيىستى تاپسىرمانى قازاقستان پرەزيدەنتى قاسىم- جومارت توقايەۆ بەردى. قازاقستان تۇركياعا شۇعىل كومەك رەتىندە 1 ميلليون دوللار بەرەدى.

تۇركيا پرەزيدەنتى رەجەپ تايىپ ەردوعان ەلدىڭ وڭتۇستىك- شىعىسىندا بولعان جويقىن جەر سىلكىنىسىنە بايلانىستى 12-اقپانعا دەيىن جەتى كۇندىك ۇلتتىق ازا تۇتۋ جاريالادى.

سوڭعى مالىمەت بويىنشا تۇركيادا ءزىلزالا قۇرباندارىنىڭ سانى 6,2 مىڭنان استى.