جەر سىلكىنىسى كەزىندە قالاي قورعانۋ كەرەك

استانا. قازاقپارات - جەر سىلكىنىسى بولعان كەزدە ادامداردىڭ قالاي قورعانعانى ءجون.

وسى ورايدا قازاقپارات ءتىلشىسى ءزىلزالانىڭ الدىن الۋ جانە امان قالۋ جولىندا قاۋىپسىزدىك ەرەجەلەرىن ءتىزىپ شىقتى.

الدىمەن ۇيدەگى گاز، سۋ مەن ەلەكتر قۋاتىن ءسوندىرۋ كەرەك. ەگەر جەر سىلكىنىسىنىڭ كۇشى از بولسا، وندا تۇرعان جەرىڭىزدە سوڭىنا دەيىن كۇتكەن ابزال.

ەگەر جەردىڭ ءدۇمپۋى كۇشەيسە جانە ءۇيدىڭ جوعارى قاباتىندا بولساڭىز عيماراتتان تەزىرەك شىعۋ قاجەت. شىعۋ مۇمكىن بولماسا ءۇيدىڭ قابىرعاسى، بۇرىشى جانە ەسىك جاقتاۋىنىڭ قاۋىپسىز جەرىنە تۇرىڭىز نەمەسە ۆانناعا جاتا قالىڭىز. كەرەۋەت نەمەسە ۇستەلدىڭ استىنا كىرىڭىز، ول ءۇيىندى استىندا قالۋدان قورعايدى. سول سياقتى مۇمكىندىگىنشە تەرەزە مەن اۋىر جيھازدان الىس بولىڭىز جانە ءليفتىنى پايدالانباعان ءجون.

ەگەر كوشەدە بولساڭىز، عيماراتتار مەن ەلەكتر جەلىسى جانىنان اۋلاق بولىڭىز، سەبەبى ەلەكتر سىمدارىنىڭ ءۇزىلۋ قاۋپى بار. سونىمەن قاتار عيمارات ىشىنە كىرمەگەن دۇرىس. ەگەر اۆتوموبيلدە بولساڭىز، ءدۇمپۋ باسىلعانشا سىرتقا شىقپاڭىز.

جەر سىلكىنىسى كەزىندە بولاتىن قايعىلى وقيعالاردىڭ باستى سەبەپتەرى:

• عيماراتتاردىڭ تولىقتاي نەمەسە جەكەلەگەن بولىكتەرىنىڭ قيراۋى؛

• ۇزىلگەن ەلەكتر سىمدارى؛

• پاتەردەگى اۋىر زاتتاردىڭ قۇلاۋى؛

• ءورت.

جەر سىلكىنىسى كەزىندە عيماراتتار كەنەتتەن قۇلاعاندا قانداي ارەكەت ەتۋ كەرەك

جەر سىلكىنىسىن ەستىگەندە جانە عيمارات تەڭسەلە باستاعاندا قۇجاتتار مەن ءبىرىنشى كەزەكتە قاجەتتى زاتتاردى الىپ ول جەردەن تەز شىعۋ قاجەت.

عيماراتتان باسپالداقپەن ءتۇسىڭىز، ويتكەنى ءليفتى كەز كەلگەن ۋاقىتتا ىستەن شىعۋى مۇمكىن. ەۆاكۋاتسيا كەزىندە مۇمكىندىگىنشە ۇرەيگە بوي الدىرماعان ءجون.

كوشەدە عيماراتتارعا جاقىن تۇرماي، اشىق كەڭىستىككە ءوتىڭىز. ەگەر عيمارات ىشىندە بولساڭىز جانە ودان شىعۋ مۇمكىن بولماسا، وندا ءقاۋىپسىز ورىندى پانالاڭىز. ياعني عيمارات قابىرعاسىنىڭ بۇرىشى نەمەسە ەسىكتىڭ قاسى.

ەگەر بالامەن بولساڭىز ولارعا ءوز دەنەڭىزبەن توسقاۋىل بولۋعا تىرىسىڭىز. سىرتقا تەز شىعۋ ءۇشىن ءۇيدىڭ ەسىگىن الدىن الا اشىپ قويعان دۇرىس. ۇيدەگى ەلەكتر قۇرالدارىنان تەرەزە ماڭىنان اۋلاق ۇستاڭىز، ەگەر ءورت شىقسا، ونى وزدىگىڭىزدەن سوندىرۋگە تىرىسپاڭىز.

قاۋىپ تونگەن جاعدايدا 102، 101، 103 جانە 112 قىزمەتىن كومەككە شاقىرىپ، جۇگىنىڭىز. بالكونعا شىقپاي، سىرىڭكەنى پايدالانباڭىز، سەبەبى گازدىڭ شىعۋ قاۋپى بولۋى مۇمكىن.

ءۇيىندى استىندا قالعان جاعدايدا قانداي ارەكەت جاساعان دۇرىس

تەرەڭ دەمالىڭىز، ۇرەيگە بوي الدىرماڭىز، باستىسى ويىڭىزدى جيناقتاڭىز. قالايدا بولسا ءتىرى قالۋعا تىرىسىپ، كومەكتىڭ مىندەتتى تۇردە كەلەتىنىنە سەنىڭىز.

مۇمكىندىگىنشە وزىڭىزگە العاشقى مەديتسينالىق كومەك كورسەتىڭىز. بولعان جاعدايعا يكەمدەلۋگە تىرىسىڭىز جانە جان- جاعىڭىزعا قاراپ شىعۋ جولىن جولىن ىزدەستىرىڭىز.

ءوزىڭىزدىڭ قاي جەردە ەكەنىڭىزدى جانە سىزدەن باسقا ادامداردىڭ بار- جوعىن انىقتاۋعا تىرىسىڭىز. تىڭداپ، بارىڭىزدى ايتىپ دىبىس بەرىڭىز. كومەك كەلەم دەگەنشە اشتىققا، شولگە توتەپ بەرۋ ءۇشىن ەنەرگيانى بەكە شىعىنداماعان ءجون.

جاقىن ماڭنان جارىق جانە دىبىس سيگنالدارىن بەرۋشى زاتتاردى ىزدەستىرىپ كورىڭىز.

ەگەر ءۇيىندى استىنان جولى تابىلسا مۇمكىندىكتى پايدالانىڭىز. ول ءۇشىن ءوزىڭىزدى ەركىن ۇستاپ، شىنتاعىڭىزدى دەنەڭىزگە بۇركەپ قيمىلداڭىز.

جەر سىلكىنىسى سالدارىنان زارداپ شەككەن جانە قۇلاعان عيماراتتارعا جاقىنداماڭىز جانە وعان كىرمەڭىز. جەردىڭ قايتالاما دۇمپۋىنە دايىن بولىڭىز. ويتكەنى، جەر سىلكىنىسىنەن كەيىن 2-3 ساعاتقا دەيىن ءقاۋىپ سەيىلمەيدى. ياعني ءزىلزالا اراعا بىرنەشە ساعات، تاۋلىك، ءتىپتى اي سالىپ قايتالانۋى مۇمكىن. ءبىرىنشى جەر سىلكىنىسىنەن كەيىن ۋاقىت وتكەن سايىن، سوعۇرلىم قايتالانۋ ىقتيمالدىعى از.