ەلگە ورالۋ ويىمدا جوق. قازاق قىزى ا ق ش- تاعى ءومىرى تۋرالى ايتتى
اتىراۋلىق جانسايا قازىر ا ق ش- تىڭ كاليفورنيا شتاتىنداعى سان-فرانتسيسكو قالاسىندا تۇرىپ جاتىر.
Massaget.kz ءتىلشىسى جانسايامەن تىلدەسىپ، ا ق ش- قا قالاي بارعانىن، ەكى ەلدىڭ اراسىندا قانداي ايىرماشىلىقتار بارىن، بولاشاققا قۇرىپ وتىرعان جوسپارلارىن سۇرادى.
جانسايا سارمانوۆا 1993-جىلى اتىراۋ وبلىسى دوسسور كەنتىندە دۇنيەگە كەلگەن. ول حالەل دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىن بيولوگ ماماندىعى بويىنشا ءتامامداعان. ستۋدەنت كەزىنەن اعىلشىن ءتىلىن جەتىك مەڭگەرۋدى كوزدەگەن جانسايا ارنايى كۋرستارعا ەرەكشە قۇلشىنىسپەن بارعان ەكەن. ال ماماندىعى بويىنشا ديپلوم العان سوڭ 2 جىل ISKER Consortium construction كومپانياسىندا اكىمشى بولىپ قىزمەت اتقارعان، كەيىن سول جەردەن وقۋعا ءتۇسۋ ماقساتىندا مۇحيت اسقان.
«بارلىعى قىمبات». ا ق ش- تاعى العاشقى ايلار
جانسايا ا ق ش- تا قاي جوعارى وقۋ ورنىندا وقىعانىن ايتىپ بەردى.
«العاش 2017-جىلعى قىركۇيەكتە ا ق ش- قا تابان تيگىزدىم. بيىل Intercultural institute of California وقۋ ورنىن اياقتادىم. كوروناۆيرۋسقا بايلانىستى ماگيستراتۋراعا ءوزىم قالاعان ۋاقىتتان كەشىگىپ ءتۇستىم. بۇل جاقتا وقۋ وقىپ جۇرسەڭ دە جۇمىس ىستەمەسەڭ ءومىر ءسۇرۋ قيىن. بارلىعى قىمبات»، - دەيدى ول.
جانسايا وزگە ەلگە قالاي بەيىمدەلگەنىن دە اڭگىمەلەدى.
«باسىنداعى 3 اي بويى قينالدىم دەسەم بولادى. 6 جىل از ۋاقىت ەمەس. قازىر ابدەن ۇيرەنىسىپ، ناعىز «امەريكالىق تۇرعىن» اتانىپ كەتتىم. ەندى ماعان ەلگە ورالۋ قيىن ءتيۋى مۇمكىن»، - دەيدى ول.
«دوستار تاپتىم». ءتىلدى قالاي مەڭگەرگەن؟
قازاقستاندىق ءتىلدى جاقسى مەڭگەرۋ ءۇشىن وزگە ۇلت وكىلدەرى اراسىنان دوستار تاۋىپتى.
«جايلى ايماقتان» شىعىپ، اعىلشىن ءتىلىن تولىق يگەرىپ الۋ ءۇشىن قازاقستاندىقتاردان گورى وزگە ۇلت وكىلدەرى اراسىنان دوستاردى تاپقاندى ءجون كورەمىن. بىرەن-ساران عانا قازاق قىزدارىن تانيمىن. جانىمدا تۋعان اپكەم بار»، - دەيدى ول.
«جاپون، كورەي دەپ شاتاستىرادى»
جانسايانىڭ سوزىنشە، كوبىنە ادامدار ونى جاپون نەمەسە كورەي دەپ شاتاستىرادى ەكەن. الايدا امەريكالىقتار قازاقستان دەسە، ەڭ الدىمەن ديماش قۇدايبەرگەن مەن گەننادي گولوۆكيندى بىلەدى ەكەن.
«كاليفورنيالىقتار قازاقستان تۋرالى حاباردار بولسا دا مەنى جاپون نەمەسە كورەي قىزدارىمەن ءجيى شاتاستىرادى. قازاقستاندى گەننادي گولوۆكين مەن ديماش قۇدايبەرگەنوۆ ارقىلى تانيتىندار بار»، - دەيدى وتانداسىمىز.
«مىسىق پەن يتكە الدانىپ ءومىر سۇرەدى». ا ق ش- تاعى ءومىر قانداي؟
ونىڭ ايتۋىنشا، ەكى ەلدىڭ حالقىندا، بولمىسىندا ەرەكشەلىك جەتەرلىك.
«قازاقستانمەن سالىستىرعاندا مۇندا ورگانيكالىقتان گورى حيميكات قوسىلعان تاماقتاردىڭ ۇلەسى كوپ. حالقى شىدامسىز، تەز تاعامعا اۋەس. جالعىزباستى ادامدارى مىسىق پەن يتكە الدانىپ ءومىر سۇرەدى. ءبىزدىڭ ەلدەگىدەي قوناقجايلىق جوق. اۋىر زات كوتەرگەن ۇلكەن كىسىگە كومەكتەسپەك بولساڭ، ول ساعان ۇركە قاراۋى مۇمكىن، ياعني ءار ادام «جەكە كەڭىستىك» دەگەندى قاتاڭ ساقتايدى. سونداي-اق، ا ق ش- تا بالالاردى كىشكەنتايىنان مۇعالىمدەرى «سەن اتا-اناڭنان تاياق جەۋگە مىندەتتى ەمەسسىڭ» دەپ ۇيرەتكەندىكتەن، ولار وسە كەلە ۇلكەندەرگە مويىنسىنا بەرمەيدى. جاس ءوسپىرىم كەزىنەن قۇقىقتارىن قورعاۋعا قۇمار. ال جاقسى جاقتارىنا كەلەتىن بولساق، ا ق ش- تا زاڭنىڭ كۇشى زور. ءسوز بوستاندىعى بار. قوعامداعى ەر مەن ايەلدىڭ ءرولى تەڭ»، - دەيدى ول ەكى ەلدىڭ ەرەكشەلىگى تۋرالى.
«باستى ماقسات ءتىل ۇيرەنۋ بولدى»
جانسايا ا ق ش- قا بارىپ، ءبىلىمىن جەتىلدىرگىسى كەلەتىندەرگە، جۇمىس ىستەيمىن دەيتىندەرگە كەڭەس بەردى.
«بۇرىنعىعا قاراعاندا دوللاردىڭ ءباسى كوتەرىلگەنىنە بايلانىستى بۇل جاققا كەلۋ قيىنداپ كەتتى. ءوزىم ءۇشىن باستى ماقسات ءتىل ۇيرەنۋ بولعان. وسىنشا ۇزاق ۋاقىت قالامىن دەپ ويلامادىم. مولىراق اقشا تاۋىپ كەتەمىن دەيتىندەر بولسا، اعىلشىن تىلىندە ەركىن سويلەي المايتىنداردىڭ تابىسى ەداۋىر تومەن بولاتىنىن ايتار ەدىم. كوپ وتانداسىمىز ستۋدەنتتىك ۆيزامەن ءتىل كۋرستارىن وقۋعا كەلىپ جاتقانىن بىلەمىن»، - دەيدى ول.
«ەلگە ورالۋ ويىمدا جوق». قازاق قىزىنىڭ بۇلاي دەۋىنە نە سەبەپ؟
ول تۋعان جەرگە دەگەن ساعىنىش بولسا دا ەلگە قايتقىسى كەلمەيتىنىن ايتتى.
«ارينە، كوپتەن جىراقتا جۇرگەندىكتەن، تۋىستارىمدى، وتباسىمدى ساعىناتىن كەزدەر بولادى. ۇلتتىق تاعامدارىمىزدىڭ قادىرىن ءتۇسىندىم. مەن كەتكەلى اتىراۋ جىلدان-جىلعا كوركەيىپ جاتقان شىعار. ءبىراق ەندىگى جوسپارىم - وسى جاقتا جاقسى مامان بولىپ قالىپتاسۋ. ەلگە ورالۋ تۋرالى ويىم جوق»، - دەپ تۇيىندەدى ول اڭگىمەسىن.
اسىلبەك ەسجان
