قازاقستاندا قۇس ەتىن سۋمەن تولتىرىپ قاتىرۋعا تىيىم سالىندى

استانا. قازاقپارات – قازاقستاندا قۇس ەتىن سۋمەن تولتىرىپ قاتىرۋعا تىيىم سالىندى. سونىمەن بىرگە ونى جىبىتكەننەن كەيىن ىلعالدىڭ ءبولىنۋ جىلدامدىعى بەلگىلەندى.

ونىڭ ۇلەسى ءتورت پايىزدان اسپاۋى كەرەك. بۇل تۋرالى ساۋدا مينيسترلىگىنىڭ تەحنيكالىق رەتتەۋ جانە مەترولوگيا كوميتەتى مالىمدەدى، - دەپ حابارلايدى Tengrinews.kz ءتىلشىسى.

سونىمەن قاتار، وڭدەلگەن قۇس ەتىنە تاعامدىق قوسپالاردى، سونىڭ ىشىندە فوسفاتتاردى، كونسەرۆانتتاردى جانە ءدام كۇشەيتكىشتەردى ەنگىزۋگە تىيىم سالىندى. تالاپتاردى بۇزعانى ءۇشىن وندىرۋشىلەردى 600 مىڭ تەڭگەگە دەيىن ايىپپۇل كۇتىپ تۇر.

مۇنداي ستاندارتتار ارمەنيا، بەلارۋس، قىرعىزستان جانە رەسەيدە بۇرىننان بار ەكەنى اتاپ وتىلەدى. سوندىقتان ينسپەكتورلار قازاقستاندىق تۇتىنۋشىنى قاۋىپتى ونىمنەن قورعاۋدى كوزدەپ وتىر.

«ءبىرىڭعاي تەحنيكالىق رەگلامەنت قۇس ەتىن سۋمەن تولتىرۋعا، تاعامدىق قوسپالاردى، ونىڭ ىشىندە فوسفاتتاردى، سونداي-اق كونسەرۆانتتار مەن ءدام كۇشەيتكىشتەردى ەنگىزۋگە تىكەلەي تىيىم سالۋدى كوزدەيدى، جىبىتكەننەن كەيىن بولىنەتىن ىلعالدىڭ نورماسى 4 پايىزدان اسپايدى جانە تۇتىنۋشىلاردىڭ قۇقىقتارىن قورعاۋ ءۇشىن ماڭىزدى باسقا دا تالاپتار بار»، - دەدى تەحنيكالىق رەتتەۋ جانە مەترولوگيا كوميتەتىنىڭ (ك ت ر م) ءتوراعاسى قۋانىش ەلىكبايەۆ.