ادامنان كوپ تابادى. تۇركىستاندىق ميلليونەر تۇيەنىڭ تابىسى جۇرتتى تاڭعالدىردى

استانا. قازاقپارات - تۇركىستان وبلىسىندا كەيىنگى جىلدارى تۋريزم سالاسى قارقىندى دامىپ جاتىر. اسىرەسە، قىزمەت كورسەتۋ سالاسىندا تابىس ايتارلىقتاي جاقسى.

تۇركىستاندا قوناقتارعا قالانىڭ كورىكتى جەرلەرىن ارالاتاتىن تۇيە دە ءبىر ايدا قىرۋار قارجى تابادى ەكەن.

تۇيەمەن قوجا احمەت ياساۋي ماڭايىن ءبىر اينالۋ قۇنى 1000 تەڭگە تۇرادى. ءبىر كۇندە تۇيەگە ەڭ كەمى 30 تۋريست وتىرادى. تۇيەمەن تاسىمالداۋ قۇنى تاكسيدەن قىمبات. ءبىراق سول ماڭداعى بىرنەشە ادام وتىراتىن جان- جاعى اشىق شاعىن اۆتوبۋستار، ياعني، ەلەكتروكار مەن قايىقتان الدەقايدا ارزان. سەبەبى بۇل ەكەۋى دە ادام باسىنا 4 مىڭ مەن 4 مىڭ 500 تەڭگە اراسىندا تۇرادى.

«تۇيەگە وتىرىپ، ءبىر اينالىم جاساۋ 1000 تەڭگە تۇرادى. ءبىر كۇندە ءبىر تۇيەگە 30 ادامعا دەيىن وتىرعان كۇندەرى بار. ءبىر ايدا 900 مىڭ، ميلليونداي تابادى. الايدا ماقساتىمىز - اقشا تابۋدان گورى، تۇركىستانعا كەلەتىن تۋريستەردىڭ كوڭىلىن كوتەرۋ. ءتىپتى قوناقتاردىڭ قالاۋىنا قاراي قالانى دا ارالاتا الامىز»، - دەيدى بۇگىندە ءتورت بىردەي تۇيەنى باپتاپ وتىرعان قايرات جولىمبەت.

ونىڭ ايتۋىنشا، بۇل قىزمەتكە كوبىنە شەتەلدىكتەر جۇگىنەدى ەكەن.

«ولاردىڭ ەموتسياسى دا ەرەكشە، كادىمگى ءۇپ- ۇلكەن ازاماتتار جاس بالاشا شاتتانادى»، - دەيدى ول.

تۇيەلەر تەك كەسەنە ماڭايىندا سەرۋەندەپ قويماي، سۇندەت تويلارعا تاپسىرىس تا الاتىن كورىنەدى. تامىز بەن قىركۇيەك ايلارىندا تاپسىرىستىڭ كوپتىگى سونشا - شوۋ-بيزنەس وكىلدەرى سەكىلدى ءبىر كۇندە بىرنەشە تويعا كىرگەن كۇندەرى بولادى ەكەن.

كەسەنە ماڭايىندا تۋريستەرگە قىزمەت كورسەتىپ جۇرگەن تۇيەلەردىڭ جاسى 9 دا. قازاق مۇندايدى «اتان تۇيە» دەپ اتاعان. سونىڭ ىشىندە ءدال وسىلاي جۇمىسقا ابدەن جەگىلگەن تۇيلەردى «ىعىر اتان» دەگەن.

«جەمشوبى مەن كۇتىمىنە جاقسى كوڭىل بولەمىز، ارنايى ەكپە سالدىرىپ، دارۋمەندەر دە بەرىپ تۇرامىز»، - دەپ تۇيىندەدى تۇيەنىڭ يەسى اڭگىمەسىن.

Massaget.kz