تۇركيانىڭ بارلىق اۋماعىندا مەملەكەتتىك تۋلار جارتىلاي ءتۇسىرىلدى

انكارا. قازاقپارات - تۇركيا ەلدىڭ وڭتۇستىگىندە بولعان جويقىن جەر سىلكىنىسى سالدارىنان كوپتەگەن ادام قازاسىنا بايلانىستى ازا تۇتۋ كۇندەرىن باستادى، دەپ حابارلايدى قازاقپارات Anadolu اگەنتتىگىنە سىلتەمە جاساپ.

تۇركيانىڭ مەملەكەتتىك تۋلارى بۇكىل ەل اۋماعىندا جارتىلاي ءتۇسىرىلدى.

بۇعان دەيىن پرەزيدەنت رەجەپ تايىپ ەردوعان تابيعي اپات قۇرباندارىنا بايلانىستى تۇركيادا جەتى كۇندىك ۇلتتىق ازا تۇتۋ جاريالاعان بولاتىن.

مەملەكەت باسشىسى قارالى كۇننىڭ جاريالانۋىنا بايلانىستى تۇركيانىڭ بۇكىل اۋماعىندا جانە ەلدىڭ شەتەلدەگى وكىلدىكتەرىندە جەكسەنبى، 12- اقپان كۇنى كۇن باتقانعا دەيىن مەملەكەتتىك تۋلار جارتىلاي تۇسىرىلەتىنىن ايتتى.

AFAD مالىمەتىنشە، تۇركيانىڭ وڭتۇستىك- شىعىسىندا كەشە جەتى بالدان اساتىن ەكى جەر سىلكىنىسى بولدى (جەرگىلىكتى ۋاقىت بويىنشا 04.17-دە - 7,7 بالل جانە 13,24-تە - 7,6 بالل).

تۇركيا بيلىگى تۇرعىنداردى جەر سىلكىنىسىنەن قورقىپ، ۇيلەرىنە قايتپاۋعا شاقىردى.

اۆتور

اسحات رايقۇل