استانادا احمەت بايتۇرسىن ۇلىنىڭ اتىنا ارنالعان سايتتىڭ تانىستىرىلىمى ءوتتى
سايتتى ق ر ع ج ب م ءتىل ساياساتى كوميتەتى ش. شاياحمەتوۆ اتىنداعى «ءتىل-قازىنا» ۇلتتىق-عىلىمي پراكتيكالىق ورتالىعى جاساپ شىعاردى. وندا ۇلت ۇستازى احمەت بايتۇرسىن ۇلىنىڭ ءومىربايانىنان بولەك، كوپتەگەن ايدارلار بويىنشا مول مالىمەت الۋعا بولادى. ولاردىڭ اراسىندا - «ءالىپبي جانە ەملە»، «وقۋلىقتار»، «ماقالالار»، «حاتتار»، «ولەڭدەر»، «اۋدارمالار»، «قاناتتى سوزدەر»، «قۇجاتتار»، «احمەت تانۋ» سىندى رۋبريكالار بار.
سونداي-اق بۇگىن وتكەن ءىس-شارا بارىسىندا ا. بايتۇرسىن ۇلىنىڭ قازاق، اعىلشىن، تۇرىك جانە ورىس تىلدەرىندە تۇڭعىش رەت جارىق كورگەن تاڭدامالى شىعارمالارىنىڭ، عىلىمي ەكسپەديتسيانىڭ «الاش قوزعالىسى: دەرەك پەن دايەك» اتتى قورىتىندى جيناعى تانىستىرىلدى.
«احمەت بايتۇرسىن ۇلى «قازاق» گازەتىنىڭ باستاۋىندا تۇرعان تۇلعا رەتىندە وتاندىق باسپا ءسوزدىڭ ودان كەيىنگى دامۋىنا كەڭ ءورىس اشىپ بەردى. ۇلت ۇستازىنىڭ ونەگەلى ءومىر جولى - وتانعا ادال دا قالتقىسىز قىزمەت جاساۋدىڭ وشپەس ۇلگىسى. الاش ارىسىنىڭ ەسىمىن ماڭگى ەستە ساقتاپ، ونىڭ جاسامپاز ءىسىن جالعاستىرۋ - ءبىزدىڭ بورىشىمىز»، - دەدى ش. شاياحمەتوۆ اتىنداعى «ءتىل-قازىنا» ۇلتتىق-عىلىمي پراكتيكالىق ورتالىعىنىڭ باس ديرەكتورى ەربول تىلەشوۆ.
كوپشىلىك كوزايىمىنا اينالعان جاۋھار جادىگەرلەردىڭ تۇساۋكەسەر راسىمىنە كورنەكتى مەملەكەت جانە قوعام قايراتكەرلەرى، وتاندىق جانە شەتەلدىك عىلىمي ۇيىمدار مەن زيالى قاۋىم وكىلدەرى قاتىستى.
