قاجىلىققا باراردا الاياقتارعا ۇرىنىپ قالماڭىز: ماڭىزدى كەڭەستەر
قاسيەتتى جەرگە ساپار شەگىپ، مۇسالماندىق پارىزىن وتەگىسى كەلگەندەردىڭ سانى ارتىپ جاتىر. دەگەنمەن، قاراپايىم حالىق جولداما الار الدىندا نە نارسەگە كوڭىل ءبولۋ كەرەگىن بىلمەي جاتادى. قاجىلىققا الاتىن جولدامانىڭ باسقالارىنان ەش ايىرماشىلىعى جوق. ءتىپتى ساۋد ارابياسىنا بارۋ ءۇشىن دە ۆيزا الۋدا ماسەلە تۋىندامايدى.
Massaget.kz ءتىلشىسى تۋريستەر قاجىلىق ساپارعا جولداما الاردا نە ءبىلۋى كەرەگىن تۇسىندىرەدى.
ەڭ الدىمەن، تۋروپەراتوردى تاڭداپ، تەكسەرۋ ماڭىزدى. ءوزىڭىزدى ناعىز «تەرگەۋشى» سەزىنىپ، اقپاراتتى جان-جاقتى قاراستىرعانىڭىز ابزال. ەڭ كەمى 10 تۋريستىك فيرمانى تاڭداپ، اربىرىنە قوڭىراۋ شالىپ، مىنا ساۋالداردى قويىڭىز:
جولدامادا قانداي باعىتتار قاراستىرىلعان؟
قوناق ءۇي بروندالعان با؟
ۆيزا جانە باسقا دا كەرەك قۇجاتتار راسىمدەلگەن بە؟
تۋريستەر ساپارعا قانداي كولىكپەن جانە قالاي بارادى؟
بيلەتتەر ەكى جاققا دا الىنعان با؟
مەديتسينالىق ساقتاندىرۋ راسىمدەلە مە؟
اۋەجايدان ترانسفەر جانە جولداما مەرزىمى اياقتالعان كەزدە كەرى تاسىمالداۋ بولا ما؟
قانداي قوسىمشا قىزمەتتەر ۇسىنىلادى؟
اۋەجايدا كۇتىپ الىپ، شىعارىپ سالاتىن ادام بولا ما؟
اڭگىمەلەسۋ بارىسىندا مەنەدجەردىڭ سويلەۋ مانەرىنە اسا نازار اۋدارىڭىز. سۇراقتارىڭىزعا بەرگەن جاۋابى ناقتى ءارى تۇسىنىكتى، سەنىمدى بولۋى شارت. كەيىن مىندەتتى تۇردە كەزدەسىپ، تۋرفيرمامەن كەلىسىمشارتقا قول قويار كەزدە ونى تولىقتاي وقىپ شىعىڭىز.
تۋريستىك فيرمانىڭ قانشا جىلدان بەرى جۇمىس ىستەپ كەلە جاتقانىن، باسقا ەلدەردە وكىلدىكتەرى بار-جوعىن جانە تاعى باسقا ناقتىلاۋ ارتىق بولمايدى.
كومپانيانىڭ الەۋمەتتىك جەلىلەردەگى بەلسەندىلىگىن تەكسەرىپ، باسقالاردىڭ پىكىرىن وقۋدى ۇمىتپاڭىز.
كوپ سۇراق قويۋدان قىسىلماڭىز، سەبەبى ءسىزدىڭ جۇگىنگەنىڭىز «ءبىر كۇندىك» فيرما ەمەس ەكەنىنە كوز جەتكىزۋىڭىز وتە ماڭىزدى.
ق م د ب قاجىلىق ءبولىمىنىڭ مەڭگەرۋشىسى ءجاندىللا بەكجىگىتوۆتىڭ ايتۋىنشا، بۇگىنگى تاڭدا ۋمرانى ءار تۋروپەراتور نەمەسە تۋراگەنت، ق م د ب قاتىسۋىنسىز ءوز قالاۋى بويىنشا ۇيىمداستىرا الادى.
«سەبەبى ساۋد ارابياسى الەمنىڭ ەلۋدەن اسا ەلىنە 1 جىلدىق تۋريستىك ۆيزا راسىمدەۋگە رۇقسات بەرگەن. ۆيزا 1 جىلعا بەرىلەدى. بىرنەشە رەت كىرىپ-شىعۋ مۇمكىندىگى بار. ءبىر كىرگەندە 3 ايعا دەيىن قالۋعا بولاتىنى سەكىلدى ارتىقشىلىقتارى بار»، - دەلىنگەن ق م د ب سايتىنداعى مالىمەتتە.
قازاقستاندا تۋريستەردى قورعايتىن «تۋريستىك قامقور» كورپوراتيۆتىك قورى بار. ونىڭ مىندەتتەرىنە تۋروپەراتورلاردىڭ ادالدىعىن تەكسەرۋ كىرەدى.
تۋروپەراتورلار بۇل قورعا بانكتىك كەپىلدىكتەر بەرىپ، فورس-ماجور جاعدايى تۋىنداعاندا قولدانىلاتىن قاراجات اۋدارادى. ۇيىم ارنايى ءتىزىم جۇرگىزەدى. سوندىقتان، ۇسىنىلعان جولدامالار تۋرالى بىلگەننەن كەيىن، تۋروپەراتوردىڭ اتاۋىن تۋريستىك فيرمانىڭ تىزىمىنەن تەكسەرۋ كەرەك. تىزىمدە بولسا، جولداماعا قاتىستى تولىق اقپارات شىعادى. ەگەر كومپانيا تىزىمدە بولماسا، بۇل تۋريستىك فيرماعا جولاماعانىڭىز ءجون.
ەگەر تۋرفيرما ءوز مىندەتتەرىن دۇرىس ورىنداماسا، ياعني الاياقتىق دەرەگى بولعان جاعدايدا نە ىستەۋ كەرەك؟ بۇل جاعدايدا زاڭگەر دۋمان كوپبايەۆتىڭ كەڭەستەرىنە جۇگىنسەڭىز بولادى:
1. 10 كۇن ىشىندە اقشانى قايتارۋدى تالاپ ەتىپ، تۋريستىك فيرماعا شاعىم جازۋ كەرەك. وسى مەرزىم اياقتالعاننان كەيىن ءسىز پوليتسياعا نەمەسە ەكونوميكالىق قىلمىستاردى تەرگەۋ قىزمەتىنە الاياقتىق جايلى ارىز جازاسىز.
2. الاياقتىق دەرەگى تۋرالى مالىمدەمەدە ءسىز بولعان وقيعانى مۇمكىندىگىنشە ەگجەي-تەگجەيلى سيپاتتايسىز. قانشالىقتى مالىمەتتەردى ەسكە تۇسىرسەڭىز - قاشان، كىم جانە قانداي جاعدايدا - الاياقتاردى جاۋاپكەرشىلىككە تارتۋ وڭايىراق بولادى. ءسىز ءوتىنىشتى ءبىر دانادا جازاسىز. ونى تاپسىرعاننان كەيىن سىزگە ءوتىنىشتى قابىلداۋ تۋرالى قۇقىق قورعاۋ ورگاندارى ەسەپ تالونىن بەرەدى. ارىز بەرىلگەن ۋاقىتتان باستاپ تەرگەۋ امالدارى باستالادى.
3. قىلمىستى انىقتاۋعا كومەكتەسەتىن قۇجاتتاردى دايىنداۋىڭىز كەرەك: Whatsapp-تا حات الماسۋ، كارتاعا اقشا اۋدارۋدى راستايتىن سكرينشوتتار، كەلىسىمشارتتار جانە تۋريستىك اگەنتتىكتەن الىنعان باسقا قۇجاتتار. جينالعان قۇجاتتار قۇقىق قورعاۋ ورگاندارىنا بەرىلەدى.
ەسىڭىزدە بولسىن، الاياقتاردى جاۋاپكەرشىلىككە تارتۋ ءۇشىن ءسىز شىدامدى بولۋىڭىز كەرەك. ءوتىنىش بەرگەننەن كەيىن قۇجاتتاردى راسىمدەۋ ءۇشىن پوليتسيا بولىمىنە تاعى بىرنەشە رەت كەلۋ مىندەتتى. بۇل قىلمىسكەرلەردى تابۋ ءۇشىن قاجەت. سونىمەن قاتار، تەرگەۋ ءارقاشان ۇزاققا سوزىلاتىنىن ۇمىتپاڭىز.
وسىنداي ەرەجەلەرگە سۇيەنە وتىرىپ، ءوز ۋاقىتىڭىز بەن اقشاڭىزدى ۇنەمدەپ، سەنىمدى جولدامامەن دەمالاسىز.
