شىمكەنتتە بەس بالاسىمەن ءۇش جىل كافەدە تۇرعان ايەل قونىس توي جاسادى
جالعىزباستى ايەل بالالارىمەن بىرگە ءوزى جۇمىس ىستەيتىن كافەدە تۇرىپ كەلگەن. ول تابىلعان جۇمىستى ىستەگەن. كافەنىڭ ەدەنىن، ىدىس-اياعىن جۋىپ، اسپازعا دا كومەكتەسكەن. ەشكىمنەن كومەك سۇراماي، باسىنا تۇسكەننىڭ ءبارىن ءوزى جەڭۋگە تىرىسقان.
«ارەكەت جاساعانىمەن، ءبىر ادامنىڭ تىرلىگى بولمايدى ەكەن. سالقىن جەردە بالالارىم اۋرۋ بولعانىن قالامايمىن. پاتەرگە قابىلداماعاننان كەيىن باستىعىم بالالارىممەن وسىندا ۋاقىتشا تۇرۋعا رۇقسات بەردى. كەيىن پاتەر تابىلىپ جاتسا، سول جاققا كوشىپ الاسىڭ دەدى. وڭاي ەمەس، كەيدە كافەگە ءىشىپ العان كىسىلەر كەلەدى، دورەكى سويلەپ قالماسىن دەپ، بالالارىما ءتيىپ كەتپەسىن ۇمتىلامىن»، - دەيدى ماريا.
ءماريانىڭ كۇيەۋى اۋىر دەرتتەن قايتىس بولعان. وسى كۇنگە دەيىن اكەسىنىڭ جوقتىعىن بىلدىرمەي، جالعىز ءوزى وتباسىن اسىراپ كەلگەن. ولار تۇرعان كافەنىڭ بولمەسىندە جارىق بولماعان. بالالارى كافەدەگى قوناقتار كەتكەن سوڭ بوس كابينكاعا كىرىپ، ساباعىن وقىپ، تاماعىن ءىشىپ جۇرگەن.
بۇل وتباسىنىڭ جاعدايىن قازاقستانداعى قايىرىمدىلىق قورى ءبىلىپ، كوپشىلىكتەن اقشا جيناپ، ورداباسى اۋدانى شۇبارسۋ اۋىلىنان 5 بولمەلى ءۇي ساتىپ الىپ بەرگەن.
قازاقستاندىقتار بۇل وتباسىعا 21 ميلليون تەڭگە جيناعان. جاڭا ءۇيدى 20 ميلليون تەڭگەگە ساتىپ الىپ، قالعان سوماعا جيھاز بەن ۇيگە قاجەتتى زاتتار ساتىپ العان.
