سىبايلاس جەمقورلىقتى قابىلداۋدىڭ الەمدىك يندەكسى جاريالاندى
2022 -جىلدىڭ قورىتىندىسى بويىنشا قازاقستان البانيا، ەكۆادور، پاناما، پەرۋ، سەربيا، شري- لانكا، تايلاند جانە تۇركيامەن پوزيتسيانى ءبولىسىپ، 36 بالل جينادى.
قازاقستان بۇعان دەيىنگىدەي 9 دەرەككوز نەگىزىندە باعالاندى. ەكى رەيتينگىلىك اگەنتتىكتىڭ ساراپشىلارى قابىلدانىپ جاتقان سىبايلاس جەمقورلىققا قارسى شارالاردىڭ باعالارىن كوتەردى، ءتورت اگەنتتىكتىڭ ساراپشىلارى ءوز باعالارىن تومەندەتتى، قالعان ۇشەۋى - باعالارىن وتكەن جىلدىڭ دەڭگەيىندە ساقتاپ قالدى.
بيىلعى جىلى جاھاندىق زەرتتەۋدىڭ نەگىزگى تاقىرىبى - ازاماتتاردى قورعاۋعا، قۇقىقتىڭ ۇستەمدىگىن قامتاماسىز ەتۋگە جانە بەيبىتشىلىكتى ساقتاۋعا جاۋاپتى ينستيتۋتتاردى قاجەتتى رەسۋرستاردان ايىراتىن بيۋدجەت قاراجاتىن ماقساتسىز پايدالانۋ، ىسىراپ ەتۋ نەمەسە ۇرلاۋ.
كوشباسشى ەلدەر دانيا (90 بالل) ، فينليانديا جانە جاڭا زەلانديا (87 بالل) بولدى. وڭتۇستىك سۋدان، سيريا جانە سومالي سىبايلاس جەمقورلىقتى قابىلداۋ يندەكسىنىڭ رەيتينگىندە سايكەسىنشە 13, 13 جانە 12 بالدارىمەن سوڭعى ورىنداردى الادى.
قاتار (58 بالل) ، گۆاتەمالا (24 بالل) جانە ۇلىبريتانيا (73 بالل) سياقتى 26 ەل بيىلعى جىلى ەڭ تومەنگى دەڭگەيگە جەتتى.
2017 -جىلدان باستاپ ون ەلدىڭ CPI كورسەتكىشتەرى ايتارلىقتاي تومەندەدى: ليۋكسەمبۋرگ (77 بالل)، كانادا (74 بالل)، ۇلى بريتانيا (73 بالل)، اۆستريا (71 بالل)، مالايزيا (47 بالل)، موڭعوليا (33 بالل)، پاكىستان (27 بالل)، گوندۋراس (23 بالل)، نيكاراگۋا (19 بالل) جانە گايتي (17 بالل).
سەگىز ەل CPI رەيتينگىن جاقسارتا الدى: يرلانديا (77 بالل)، وڭتۇستىك كورەيا (63 بالل)، ارمەنيا (46 بالل)، ۆەتنام (42 بالل)، مالديۆ ارالدارى (40 بالل)، مولدوۆا (39 بالل)، انگولا (33 بالل) جانە وزبەكستان (31 بالل).
وڭىرلىك بولىنىستە باتىس ەۋروپا ەلدەرى مەن ەۋروپالىق وداق ۇزدىك بولدى، ولاردا سىبايلاس جەمقورلىقتى قابىلداۋ دەڭگەيىنىڭ ورتاشا بالى - 66 بالل. ەڭ از بالل جيناعان ايماقتار - ساحارانىڭ وڭتۇستىگىندەگى افريكا (32 بالل) جانە شىعىس ەۋروپا مەن ورتالىق ازيا (35 بالل). قازاقستان ECA (ەۋروپا جانە ورتالىق ازيا) ەلدەر توبىندا باعالاندى.
شىعىس ەۋروپا مەن ورتالىق ازيا ايماعىندا 19 ەل باعالاندى: گرۋزيا (56 بالل)، ارمەنيا (46 بالل)، چەرنوگوريا (45 بالل)، كوسوۆو (41 بالل)، سولتۇستىك ماكەدونيا (40 بالل)، بەلارۋس (39 بالل)، مولدوۆا (39 بالل)، البانيا (36 بالل)، قازاقستان (36 بالل)، سەربيا (36 بالل)، تۇركيا (36 بالل). ودان كەيىن بوسنيا مەن گەرتسەگوۆينا (34 بالل)، ۋكراينا (33 بالل)، وزبەكستان (31 بالل)، رەسەي (28 بالل)، قىرعىزستان (27 بالل)، تاجىكستان (24 بالل)، ءازىربايجان (23 بالل) جانە تۇرىكمەنستان (19 بالل) بولدى.
حالىقارالىق ساراپشىلار بيىلعى ناتيجەلەر الەمنىڭ كوپتەگەن ەلدەرى ءالى دە سىبايلاس جەمقورلىققا قارسى كۇرەستە تابىسقا جەتە المايتىنىن كورسەتەدى دەگەن قورىتىندىعا كەلدى: 2017 -جىلدان باستاپ ولاردىڭ 95 پايىزى ءىس جۇزىندە ەشقانداي وڭ ديناميكانى كورسەتپەدى.
قوسىمشا اقپاراتتى مىنا سايتتان الۋعا بولادى.
ايتا كەتسەك، جەمقورلىقتى قابىلداۋ يندەكسى بويىنشا قازاقستان العاش رەت 2020 -جىلعى كورسەتكىشتەرىمەن 19 پوزيتسيا جوعارى كوتەرىلگەن بولاتىن.
