پوليتسەيلەر ينتەرنەت-الاياقتار قانداي تەحنولوگيا قولداناتىنىن ايتتى
وتكەن جىلى الماتىدا 2 مىڭنان استام ينتەرنەت-الاياقتىق قىلمىسى تىركەلدى. بۇل تۋرالى الماتى قالالىق پوليتسيا دەپارتامەنتى كريمينالدىق پوليتسيا باسقارماسىنىڭ اعا جەدەل ۋاكىلى ەركەبۇلان قويشىبايەۆ ايتتى، دەپ حابارلايدى قازاقپارات ءتىلشىسى.
«تالداۋ كورسەتكەندەي، 2017 -جىلى قالا اۋماعىندا 90 ينتەرنەت-الاياقتىق، 2018 -جىلى – 142، 2019 -جىلى – 666، 2020 -جىلى 1677 فاكتى تىركەلدى. وتكەن جىلى وسىنداي 2 مىڭنان استام قىلمىس تىركەلگەن. ۇستالعان ينتەرنەت-الاياقتار تۋرالى مىسالدار بار. ءبىراق، قىلمىستىڭ بۇل ءتۇرىن اشۋ قيىن. سەبەبى ولار ترانسشەكارالىق سيپاتقا يە. ياعني، جابىرلەنۋشى ءبىر جەردە، ال كۇدىكتى باسقا مەملەكەتتە بولۋى مۇمكىن»، - دەدى ە. قويشىبايەۆ.
ونىڭ ايتۋىنشا، ينتەرنەت- الاياقتار ادامداردى الداپ- ارباۋ سەناريىن ءجيى وزگەرتىپ وتىرادى. ال كەيىنگى ۋاقىتتا ينۆەستيتسياعا قاتىستى الاياقتىق فاكتىلەرى كوبەيگەن.
«الداۋدىڭ پرينسيپى ءبىر. ياعني، الاياقتار بەلگىسىز نومىردەن قوڭىراۋ شالىپ، جوبالار تۋرالى ايتادى، وعان اقشا سالۋدى ۇسىنادى، كىرىستى ارتتىرۋعا ۋادە بەرەدى. اقشانى العان سوڭ الاياقتار جوعالادى. ولار سونداي-اق جابىرلەنۋشى ينۆەستيتسيا جاساعان سوڭ، ونىڭ كىرىسى قالاي وسكەنىن كورسەتەتىن جالعان قوسىمشانى كورسەتە الادى. ءبىراق، ءىس جۇزىندە بۇل - وتىرىك. ادام قارجىنى پايدالانا المايدى. سەبەبى، مۇنداي قوسىمشالاردا قايتارىپ الۋ فۋنكسياسى بولمايدى»، - دەدى ەركەبۇلان قويشىبايەۆ.
سونىمەن قاتار ءنومىردى اۋىستىرۋمەن بايلانىستى الداۋدىڭ جاڭا ءادىسى پايدا بولعان. سپيكەردىڭ ايتۋىنشا، قازاقستاندىقتارعا شەتەلدەن قوڭىراۋ شالعاندا ءنومىردى اۋىستىرۋ تەحنولوگياسى قولدانىلادى. سوندىقتان كۇدىكتىنى تابۋ وتە قيىن. الاياقتار SIM-كارتالاردى ساتىپ المايدى، ولار تەلەفوننىڭ نەگىزگى ءنومىرىن وزگەرتەتىن ارنايى باعدارلامالىق قۇرالدى پايدالانادى. سوندىقتان ولار كەز كەلگەن نومىردەن قوڭىراۋ شالا الادى.
الاياقتار كەز كەلگەن ەلدەن كوپتەگەن ءنومىردى الا الاتىن س م س-تى بەلسەندىرۋ قىزمەتى تۋرالى دا ايتىلدى.
«كەيىن الاياقتار GSM شليۋزدەرىن پايدالانىپ، كەز كەلگەن ادامعا قوڭىراۋ سوعا وتىرىپ، بانك ءنومىرىن، ءتىپتى جەكە ءنومىرىڭىزدى پايدالانا وتىرىپ، ادەتتەگى قوڭىراۋدى ينتەرنەت قوڭىراۋىنا اينالدىرادى. قازىر پوليتسەيلەر مۇنداي سايتتارعا توسقاۋىل قويۋدا. ءنومىردى اۋىستىرۋ تەحنولوگياسى پايدا بولعان سوڭ، ازاماتتار نومىرلەرىن الاياقتار پايدالانعانى تۋرالى پوليتسياعا حابارلاسا باستادى. ادەتتە، جابىرلەنۋشىلەر ءنومىر يەلەرىنە شاعىمدانادى. مۇنداي قوڭىراۋ ءنومىر اۋىستىرۋ ارقىلى جاسالعانىن دالەلدەۋ ءۇشىن ۇيالى بايلانىس وپەراتورىنا قوڭىراۋ شالىپ، ەگجەي-تەگجەيىن بىلگەن سوڭ، ءنومىردىڭ جالعان ەكەنىن دالەلدەي الاسىز. بۇل قاراپايىم تەلەفون ترافيگى ەمەس، ينتەرنەت قوڭىراۋلارى ەكەنىن كورسەتەدى»، - دەدى كريمينالدىق پوليتسيا باسقارماسىنىڭ اعا جەدەل ۋاكىلى ەركەبۇلان قويشىبايەۆ.
