بالالار ءۇيىنىڭ اتاۋى مەن قىزمەتى وزگەرەدى

استانا. قازاقپارات - ەلىمىزدە بالالار ءۇيىنىڭ اتاۋى مەن قىزمەتى وزگەرىپ جاتىر. ەندى بالالار ءۇيى ەمەس، «بالالاردى قولداۋ ورتالىقتارى» دەپ اتالادى.

بۇل تۋرالى وقۋ-اعارتۋ مينيسترلىگىنىڭ بالالار قۇقىعىن قورعاۋ كوميتەتىنىڭ باس ساراپشىسى جاننا سارسەنبايەۆا ءمالىم ەتتى، دەپ حابارلايدى قازاقپارات ءتىلشىسى.

«وسىدان بىرنەشە جىل بۇرىن ءبىزدىڭ مينيسترلىك اقمولا وبلىسى اكىمدىگى جانە «انا ءۇيى» قوعامدىق قورىمەن بىرلەسكەن «بالاجان» جوباسىن قولعا العان ەدى. جوبا اياسىندا اقكول قالاسىندا بالالاردى قولداۋ جانە وتباسىعا بەيىمدەۋ ورتالىعى اشىلدى. ونداعى ماقسات - بالالارعا بارىنشا وتباسىنداعىداي جاعداي جاساۋ، سونداي-اق ولاردى پاتروناتتىق تاربيەگە ورنالاستىرۋعا جانە تۋعان وتباسىنا قايتارۋعا بەيىمدەۋ»، - دەدى جاننا سارسەنبايەۆا ەلوردادا وتكەن بالالار ءۇيىن ترانسفورماتسيالاۋ ماسەلەلەرىنە ارنالعان جيىن بارىسىندا.

ونىڭ ايتۋىنشا، بالالار ءۇيى «بالالاردى قولداۋ ورتالىقتارى» بولىپ قايتا قۇرىلۋدا.

«ەلىمىز بويىنشا بارلىق ءۇي بالالاردى قولداۋ ورتالىقتارىنا اينالدى. قازىر ەل وڭىرلەرىندە 23 ورتالىق جۇمىس ىستەيدى، وندا 3 مىڭنان استام بالا تاربيەلەنۋدە. ورتالىقتىڭ تاعى ءبىر ارتىقشىلىعى كادىمگى «ءۇي سياقتى بولۋى»، ياعني مۇمكىندىگىنشە وتباسىنداعىداي جاعداي جاسالادى. بالالاردىڭ ءوز بولمەسى بار، اسحانا باسقا دا قاجەتتىلىكتەرمەن قامتىلعان»، - دەيدى مينيسترلىك وكىلى.

ەسكە سالايىق، ەلىمىزدە بالالار ءۇيى قىزمەتىنىڭ قايتا قارالىپ جاتقانى تۋرالى حابارلاعان ەدىك.

اتالعان باعىتتاعى جاڭاشىلدىقپەن وقۋ-اعارتۋ ءمينيسترى عاني بەيسەمبايەۆ بولىسكەن ەدى.