ەكولوگيا مينيسترلىگى ارسەلورميتتالعا تەكسەرىس جۇرگىزەتىن كومپانيانى تاڭداپ جاتىر

None
استانا. قازاقپارات - ەكولوگيا جانە تابيعي رەسۋرستار مينيسترلىگى «ارسەلورميتتال» كومپانياسىنىڭ قىزمەتىنە تەكسەرىستى باستايدى.

بۇگىندە ونىمەن اينالىساتىن كومپانيا تاڭدالىپ جاتىر. بۇل تۋرالى اتالعان ۆەدومستۆونىڭ باسشىسى ءزۇلفيا سۇلەيمەنوۆا ءمالىم ەتتى، دەپ حابارلايدى قازاقپارات ءتىلشىسى.

«تەكسەرۋدى جۇزەگە اسىراتىن كومپانيانى تاڭدايمىز. بىزگە بىرنەشە ۇسىنىس كەلىپ ءتۇستى، ولاردى مۇقيات قاراستىرامىز. ويتكەنى، تەكسەرىس ساپالى جۇرگىزىلۋى كەرەك. وسى اپتادا كومپانيانى تاڭداپ، سودان سوڭ «ارسەلورميتتال» قىزمەتىن تەكسەرۋگە قاتىستى ماتەريالداردى ازىرلەپ جىبەرەمىز. تەكسەرىس قۇنى كومپانيانىڭ باعا ۇسىنىسىنا قاراي انىقتالادى. ازىرگە بيۋدجەت جاعى ناقتىلانعان جوق. سوما تەكسەرىستى جۇرگىزەتىن كومپانيا وتكىزەتىن ءىس- شاراعا بايلانىستى بەلگىلەنەدى»، - دەدى ءزۇلفيا سۇلەيمەنوۆا ۇكىمەت وتىرىسىنان كەيىن باق وكىلدەرىنىڭ ساۋالىنا جاۋاپ بەرە تۇرىپ.

ەسكە سالايىق، بۇعان دەيىن «ارسەلور ميتتال تەمىرتاۋ» مەتاللۋرگيالىق كەشەنى بيىل قورشاعان ورتاعا ەميسسيا شىعارۋعا رۇقسات العانىن حابارلاعان ەدىك.

ايتا كەتسەك، بىلتىر جىل سوڭىندا «ارسەلورميتتال تەمىرتاۋ» كومپانياسىنا قورشاعان ورتانى لاستاعانى ءۇشىن 5,8 ميلليارد تەڭگە ايىپپۇل سالىنعان ەدى.


سوڭعى جاڭالىقتار