وزبەك دارىگەلەر وتا ارقىلى سيام ەگىزدەرىن اجىراتىپ الدى - فوتو

None
تاشكەنت. ۋزا- قازاقپارات - وزبەكستاننىڭ دەنساۋلىق ساقتاۋ مينيسترلىگىنەن ءمالىم ەتكەندەي، ەل مەديتسيناسى تاريحىندا العاش رەت وزبەك دارىگەرلەرى سيام ەگىزدەرىن وتە سيرەك جاسالعان وپەراتسيا ناتيجەسىندە اجىراتىپ العان.

بۇل تۋرالى قازاقپارات «ۋز ا» اگەنتتىگىنە سىلتەمە جاساپ حابارلايدى.

وپەراتسيا رەسپۋبليكالىق پەريناتالدىق ورتالىق جانىنداعى نەوناتالدى حيرۋرگيا وقۋ- ەمدىك- ادىستەمە ورتالىعىندا 2022 -جىلدىڭ 19-جەلتوقسانىندا جاسالعان. وعان پروفەسسور، وسى ورتالىق مەڭگەرۋشىسى باحتيەر ەرگاشەۆ جەتەكشىلىك ەتكەن.

«وپەراتسيا 3 ساعاتقا سوزىلدى. بالالاردىڭ ءبىر-بىرىمەن باۋىر ارقىلى قوسىلعانى دالەلدەندى. بالالاردى اجىراتۋ كەزىندە باۋىردان جانە باسقا قان تامىرلارىنان قان كەتۋدىڭ الدىن الۋ ءۇشىن ۋلترادىبىستىق جانە ارگون سكالپەلى جانە Bloodstop دەپ اتالاتىن زاماناۋي قان توقتاتاتىن ماتەريالدى قولداندىق. سونىڭ سالدارىنان بالالار از قان كەتۋمەن اجىراتىپ الدىق»، - دەيدى ب. ەرگاشەۆ.


2022 -جىلى 31-مامىردا قىرعىز رەسپۋبليكاسىندا دۇنيەگە كەلگەن سابيلەر ورتالىققا 5 ايلىق كەزدەرىندە جەتكىزىلگەن. ولاردىڭ جاقىن تۋىستار اراسىنداعى نەكەدەن، ياعني اپالى- سىڭلىلەردىڭ بالالارىنان تۋعانى بەلگىلى بولدى. بولاشاق سابيلەردىڭ جاعدايى جۇكتىلىكتىڭ 28-اپتاسىندا انىقتالىپ، بولاشاق انا وشتان بىشكەككە جىبەرىلەدى. 29-اپتادا بوسانۋ پروتسەسى «كەسار» ادىسىمەن جۇرگىزىلىپ، سالماعى 1600 گرام بولىپ ومىرگە كەلگەن سابيلەرگە فاتيما جانە زۋحرا ەسىمى قويىلادى. ەگىزدەردىڭ قارىن تۇسى، دالىرەك ايتقاندا باۋىرى بىرلەسە تۋعان. وتە قيىن وپەراتسيادان كەيىن جانە وتە نازىكتىگىنەن سابيلەردىڭ جازىلۋى ءبىرازعا دەيىن سوزىلىپتى.

«وسىعان دەيىن سيام ەگىزدەرى اتانعان بالالاردىڭ جاعدايى تۇراقتى دەپ باعالانىپ وتىر. الداعى كۇندەرى سابيلەر ءوز شاڭىراعىنا ورالادى دەگەن ءۇمىت بار. بۇل ناتيجەگە قول جەتكىزۋدە كاسىبي دەڭگەيدە جۇمىس ىستەگەن ۇلكەن حيرۋرگيا ۇجىمى باستى ءرول اتقاردى. ولار وزدەرىنىڭ بىلىكتىلىگى، ءبىلىمى، تاجىريبەسى جانە باتىلدىعىمەن وزبەك مەديتسيناسىنىڭ شەجىرەسىنە تاعى ءبىر ۇلكەن تاريحي ناتيجەنى مورلەدى»، - دەلىنگەن مينيسترلىك حابارىندا.

وسى تاريحي جاعدايدان كەيىن، ءو ر دەنساۋلىق ساقتاۋ ءمينيسترى امريللو ينوياتوۆ وپەراتسياعا قاتىسقان مامانداردى «دەنساۋلىق ساقتاۋ ۇزدىگى» توسبەلگىسىمەن جانە قۇرمەت گراموتالارىمەن ماراپاتتاعان.


ايتا كەتسەك، وسى ۋاقىتقا دەيىن مۇنداي تاجىريبە ءتۇرى بۇل ورتالىقتا ءبىر-اق رەت جاسالعان. وندا وپەراتسيا شەتەلدەن شاقىرىلعان ماماننىڭ باسشىلىعىمەن جانە تىكەلەي قاتىسۋىمەن جۇرگىزىلگەن.

ادەتتە، سيام ەگىزدەرى 200 مىڭ جاعدايدا ءبىر رەت كەزدەسەدى. مالىمەتتەر بويىنشا، ولاردىڭ كوپشىلىگى ءولى تۋادى. ءتىرى تۋعانداردىڭ 5 پايىزدان 25 پايىزعا دەيىنگىسى ۇزاق ءومىر سۇرمەيدى.


سوڭعى جاڭالىقتار