سۋرەتكە تۇسۋگە تىيىم سالىنادى: «شىمبۇلاق» شاڭعى كۋرورتى نارازىلىققا جاۋاپ بەردى
الماتى قالاسىنىڭ تۇرعىنى داريا دۋنيچ Facebook-تاعى جەكە پاراقشاسىندا دەمالىس كەزىندە تاۋدا سۋرەتكە تۇسۋگە تىيىم سالىنعانىن جازدى. ايتۋىنشا، مەدەۋ سپورتكەشەنى اۋماعىندا جانە «شىمبۇلاق» تاۋ شاڭعىسى كۋرورتىندا سۋرەتكە تۇسۋگە تىيىم سالىنعان.
«بارلىعى مەدەۋدەن باستالدى. كەرەمەت تاۋلار اياسىندا فوتو جاساعىمىز كەلدى. جانىمىزعا ءبىر قىزمەتكەر تايانىپ، فوتو تۇسىرۋگە رۇقسات قاعازىن سۇرادى. قانداي دا ءبىر كاسىبي فوتوسەسسيا جاساۋدى جوسپارلاماعاندىقتان، ارينە، رۇقسات عاقازى بىزدە بولعان جوق.
كەيىن فۋنيكۋلەرمەن شىمبۇلاققا كوتەرىلە باستادىق. ەندى عانا شىعىپ ەدىك، فوتواپپاراتتى كورگەن قىزمەتكەر جانىمىزعا كەلىپ، بىزدە كاسىبي فوتواپپارات بار ەكەنى تۋرالى ءوز تەلەفونىنا ۆيدەو تۇسىرە باستادى»، - دەپ جازادى ول.
تاۋدا فوتو جاساۋ ماسەلەسىنە قاتىستى قازاقپارات جولداعان ساۋالعا «شىمبۇلاق» تاۋ شاڭعىسى كۋرورتىنىڭ باسپا ءسوز قىزمەتى جاۋاپ بەردى.
ءمالىم ەتىلگەندەي، كۋرورت اۋماعىندا فوتو جانە ۆيدەو تۇسىرۋگە قاتىستى ەرەجەلەر بار. ماسەلەن، كاسىبي فوتو جانە ۆيدەو ءتۇسىرىلىمدى جۇزەگە اسىرۋ ءۇشىن، سونىڭ ىشىندە ۇشاقتاردى (درونداردى) ، كەز كەلگەن اۋە مودەلدەرىن ۇشىرۋ، كونسترۋكتورلاردى پايدالانۋ ءۇشىن تاۋ كۋرورتىنىڭ اكىمشىلىگىنىڭ الدىن الا رۇقساتى قاجەت. سەبەبى بۇل جەكەمەنشىك اۋماق.
«سونىمەن قاتار رەسمي رۇقساتسىز كۋرورت قىزمەتكەرلەرى ءاربىر ءتۇسىرىلىمنىڭ كوممەرتسيالىق ەمەس، قوناقتاردىڭ جەكە پايدالانۋىنا ارنالعانىن ۇنەمى تەكسەرە المايدى. فوتو جانە ۆيدەو تۇسىرۋگە رۇقسات الۋ ءۇشىن «مەدەۋ» نەمەسە «شىمبۇلاق» ستانساسىنداعى اقپارات ورتالىعىنا حابارلاسۋ كەرەك. نەمەسە رەسمي سايتتى پايدالانىپ، فوتو جانە ۆيدەو تۇسىرۋگە رۇقسات الۋعا ءوتىنىش بەرۋ قاجەت. «شىمبۇلاق» اقپارات ورتالىعى رۇقسات بەرۋ ءوتىنىشىن جەدەل تۇردە قارايدى. ال سايت ارقىلى رۇقسات الۋ ءبىر ساعات ىشىندە جۇزەگە اسىرىلادى»، - دەپ اتاپ ءوتتى «شىمبۇلاق» تاۋ شاڭعىسى كۋرورتىنىڭ باسپا ءسوز قىزمەتىنەن.
سونداي-اق دەمالىس ورنىنىڭ قوناقتارى تەلەفون كامەراسىنا ەركىن سۋرەتكە تۇسە الاتىنى حابارلاندى.
