اتىراۋدا مەيرامحانادا توبەلەسكەندەر اراسىندا جاس بالا مەن ايەل بار
اتىراۋ وبلىستىق پوليتسيا دەپارتامەنتىنىڭ باسپا ءسوز قىزمەتىنەن ءمالىم ەتكەندەي، وقيعا 15-قاڭتار ساعات 05:10 شاماسىندا بولعان.
اتىراۋ قالاسىنداعى تەمىرحانوۆ كوشەسىندە ورنالاسقان مەيرامحانالاردىڭ بىرىندە ءبىر توپ ادامنىڭ اراسىندا جانجال تۋىنداپ، سوڭى توبەلەسكە ۇلاسقان.
قالالىق پوليتسيا باسقارماسى پاترۋلدىك پوليتسيا باتالونىنىڭ قىزمەتكەرلەرى وقيعا ورنىنا جەدەل جەتىپ، قوعامدىق ورىندا ادام ولىمىنە سوقتىرۋ مۇمكىن اۋىر قىلمىستىڭ الدىن الدى.
پوليتسيا قىزمەتكەرلەرى جانجالعا بايلانىستى 10 ادامدى ۇستادى.
ونىڭ ىشىندە كامەلەت جاسىنا تولماعان 1 جاس ءوسپىرىم مەن 1 ايەل، 8 ەر ادام بار.
«قوعامدىق ءتارتىپتى بۇزىپ، وزگە ادامداردىڭ تىنىشتىعىنا نۇقسان كەلتىرگەن قۇقىق بۇزۋشىلارعا ق ر اكىمشىلىك قۇقىقبۇزۋشىلىق تۋرالى كودەكسىنىڭ 434-بابىنا سايكەس اكىمشىلىك حاتتاما تولتىرىلدى. قۇقىق بۇزۋشىلاردان سۋىق قارۋ تاركىلەندى. ءىس قۇجاتتارى جيناقتالىپ، اتىراۋ قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان سوتىنا جولداندى»، - دەپ حابارلادى دەپارتامەنتتىڭ باسپا ءسوز قىزمەتى.
ەسكە سالا كەتەلىك، بۇدان بۇرىن اتىراۋدا تۇنگى كلۋبتىڭ الدىندا توبەلەسكەن قىزداردىڭ ءىسى سوتقا جولدانعانىن حابارلاعان بولاتىنبىز.
ەكى بويجەتكەن تۇنگى ساعات 03:30 شاماسىندا «اۆانگارد» شاعىن اۋدانىنداعى تۇنگى كلۋبتىڭ الدىندا ءبىر-بىرىمەن جانجالداسىپ قالعان.
ولاردىڭ بۇل تەرىس ارەكەتىن اتىراۋ قالالىق پوليتسيا باسقارماسى جەدەل باسقارۋ ورتالىعىنىڭ ينسپەكتورلارى بايقاعان.
ءبىر-بىرىمەن جاعا جىرتىسقان بويجەتكەننىڭ ەكەۋى 1997 -جىلى تۋعان. كەيىن تەنتەك قىزدارعا ق ر اكىمشىلىك قۇقىق بۇزۋ كودەكسىنىڭ 434-بابىنىڭ 1-بولىگىمەن اكىمشىلىك حاتتاما تولتىرىلىپ، ءىس سوتقا جولداندى.
