بۇل ەڭ تاماشا كەز بولاتىن - تيكتوكەر تاتيانا ينيۋشينا قازاقستانداعى ءومىرى جايلى
ءانشى، بلوگەر جانە تيكتوكەر تاتيانا ينيۋشينا قازاقستاندا 6 اي تۇردى. ول ءوزىنىڭ الەۋمەتتىك جەلىدەگى پاراقشاسىندا وقىرماندارىن ءتۇرلى ەلدەردىڭ سالت-داستۇرىمەن، ءتىلى، ادەت-عۇرىپتارىمەن تانىستىرىپ وتىرادى.
پاندەميا ءانشىنىڭ ءومىرىن تۇبەگەيلى وزگەرتتى. سودان بەرى تاتيانا ينيۋشينا ءوز اۋديتورياسىنىڭ كوڭىل-كۇيىن كوتەرۋگە تىرىسىپ كەلەدى. قازاقپارات تىلشىسىمەن اڭگىمە بارىسىندا ءانشى قىز ەلىمىزدىڭ كورىكتى جەرلەرى جانە حالىقتىڭ الەۋمەتتىك جەلىلەرگە دەگەن قىزىعۋشىلىعى تۋرالى وي ءبولىستى.
پاندەميا كەزەڭى تاتيانا ينيۋشينانىڭ الەۋمەتتىك جەلىدە تانىمال بولۋىنا جول اشتى. سودان بەرى بلوگ جۇرگىزۋ ونىڭ نەگىزگى تابىس تۇرىنە اينالدى. گەوساياسي جاعدايعا بايلانىستى تاتيانا كۇيەۋىمەن بىرگە وتكەن جىلدىڭ اقپان ايىندا قازاقستانعا كەلگەن. كەيىن ول الماتى قالاسىندا مۋزىكالىق توپ قۇرىپ، ەلىمىزدىڭ وڭىرلەرىنە گاسترولدىك ساپار جاساعان.
«مەن بلوگتى ەكى جىلدان بەرى جۇرگىزەمىن. بارلىعى ونلاين رەجيمگە اۋىسقان كەزدە TikTok جەلىسىندەگى اككاۋنتىمدى بەلسەندى جۇرگىزە باستادىم. پاندەميانىڭ العاشقى ايىندا مەنىڭ پاراقشاما جازىلۋشىلار قاتارى ارتتى. بارلىعى وسىدان باستالعان ەدى. بلوگينگ - توقتاۋسىز رەجيمدەگى جۇمىس. بۇل - ۇزدىكسىز پروتسەسس. شابىت كەلگەندە روليك تۇسىرەمىن. ەگەر كوڭىل-كۇيىم بولماسا، ەكى كۇن قاتارىنان ەشتەڭە تۇسىرمەي كەتۋىم مۇمكىن. بلوگ - بۇل بۇكىل ءومىر. مەن وزگە حالىقتاردىڭ تىلدەرىندە ءان ايتامىن، بارعان مەملەكەتتەرىمنىڭ مادەنيەتى تۋرالى باياندايمىن»، - دەيدى تاتيانا ينيۋشينا.
بلوگەرلەردىڭ الەۋمەتتىك جەلىدە جارناما ارقىلى اقشا تاباتىنى بەلگىلى. الايدا، تاتيانا مۇنداي تاپسىرىستاردى كوپ الا بەرمەيدى ەكەن.
«ينۆەستيتسيالاردى جانە باسقاسىن جارنامالاۋدى ۇسىنعاندار بولدى. ءبىراق بۇل ماعان جات. مەن تەك جارناما جاساۋعا تۇرارلىق تاپسىرىستارعا كەلىسەمىن. ويتكەنى، مەن ءوز اۋديتوريامدى قۇرمەتتەيمىن»، - دەپ اتاپ ءوتتى تيكتوكەر.
تاتيانانىڭ الەۋمەتتىك جەلىدەگى وقىرماندارى ءانشىنىڭ ونەرىن جوعارى باعالايدى. ونىڭ جاريالانىمدارىنا كوپشىلىك «ءسىز بۇعان دەيىن وسىنداي تالانتتى قايدا جاسىرىپ ءجۇردىڭىز؟»، «قانداي كەرەمەت داۋىس؟!»، «داۋىس پەن سىرت كەلبەتتىڭ قانداي ادەمى ۇيلەسىمى» دەگەن پىكىرلەر قالدىرعان.
تاتيانا كوبىنە ەسكى اندەردى زاماناۋي نۇسقادا وڭدەپ، تىڭدارمانعا ۇسىنادى. سونىمەن بىرگە، وزگە حالىقتاردىڭ تىلىندە كوپشىلىك ۇناتىپ تىڭدايتىن حيت تۋىندىلاردى ورىندايدى.
«مۋزىكا سالاسىندا كوپ تاجىريبە جاساعاندى ۇناتامىن. مەنىڭ «MARFFA» دەگەن جوبام بار: وندا ەسكى اندەردى ءار ءتۇرلى ستيلدەرمەن ارالاستىرامىن. اسىرەسە، ەسكى اندەردىڭ زاماناۋي ينتەرپرەتاتسياسى جانە ءار ءتۇرلى ەلدەردىڭ فولكلورى قىزىقتىرادى. مەن قاي جەردە بولماسام دا، سول حالىقتىڭ مادەنيەتى باستاۋ الاتىن قاينار كوزىنە ەنىپ، ءار ۇلتتىڭ بەينەسىن سول ارقىلى تانىعاندى جاقسى كورەمىن. ارينە، حالىقتى ءبىلۋ ءۇشىن ونىڭ اندەرىن، ۇلتتىق اسپاپتارىن تىڭداۋ كەرەك»، - دەپ توقتالدى تاتيانا ينيۋشينا.
ول قازاقستانعا كەلگەننەن كەيىن الەۋمەتتىك جەلىدەگى وقىرماندار سانى وسكەنىن اتاپ ءوتتى.
«جارتى جىل ىشىندە قازاقستاننان 400 مىڭ ادام مەنىڭ پاراقشاما جازىلدى. قازاقستان وقىرمان سانى بويىنشا ستاتيستيكادا ءبىرىنشى ورىندا تۇر. قالالار بويىنشا الماتى كوش باستاپ تۇر. ودان كەيىنگى ورىندا استانا، ماسكەۋ تىركەلگەن وقىرماندار سانى جاعىنان ءۇشىنشى ورىندا. قازاق كورەرمەندەرىنىڭ كوڭىلىنەن شىققانىما قۋانىشتىمىن. ولار - مەيىرىمدى جاندار جانە دە مەنىڭ ەل جايلى ايتقانىم، جەرگىلىكتى ءداستۇردى دارىپتەيتىنىمدى ۇناتادى»، - دەپ ءمالىم ەتتى ءانشى.
تاتيانا قازاقستاندا تۇرعان كەزى ونىڭ ومىرىندەگى ەڭ جارقىن كەزەڭنىڭ ءبىرى ەكەنىن اتاپ ءوتتى.
«بۇل مەنىڭ ومىرىمدەگى ەڭ تاماشا 6 اي بولدى. ءبىز بىلتىر بولعان جايتتان كەيىن قازاقستانعا باس ساۋعالاپ كەلگەن ەدىك. ءبىراق ناتيجەسىندە قازاقستان ءبىز ءۇشىن ەكىنشى ۇيىمىزگە اينالدى. مۇندا پايدالى ۋاقىت وتكىزىپ قويماي، الماتىلىق مۋزىكانتتارمەن كەرەمەت كونتسەرتتەر دە ۇيىمداستىردىق. جاعىمدى اسەر الدىم. قازاقستان وتە سۇلۋ تابيعاتىمەن، ءدامدى تاعامدارىمەن ەستە قالدى. وسى ۋاقىت ىشىندە الماتىدا ءۇش كونتسەرت ۇيىمداستىرىلدى، تالدىقورعاندا دا ونەر كورسەتتىك، فان-كەزدەسۋلەر ءوتتى. اسىرەسە، اقتاۋدىڭ پەيزاجىنا تاڭ قالدىم. بۇل قازاقستاننىڭ مۇلدەم باسقا قىرى. مۇندا دا تاۋلار بار، ءبىراق ولار مۇلدەم باسقاشا - مارستىڭ لاندشافتى سياقتى»، - دەپ پىكىر ءبىلدىردى تاتيانا ينيۋشينا.
ءانشى ەلىمىزدە بولعان كەزدە قازاقستاندىق تەلەارنالارداعى تاڭعى باعدارلامالارعا قاتىستى. سونىمەن قاتار، قازاق حالقىنىڭ تۇرمىسى، ۇلتتىق تاعامدارى جانە داستۇرلەرىمەن ەتەنە تانىستى. ول قازاقستاننان كەيىن وزبەكستانعا اتتاندى. قازىر جۇبايىمەن بىرگە گوادا ءجۇر.
