ەلىمىزدە سپورتتىق باعدارلامالاۋ فەدەراتسياسى قۇرىلدى، ونى باعدات مۋسين باسقارادى
«بىلتىر ءبىز Digital Nomads قاۋىمداستىعىن جيناعانىمىز ەستەرىڭىزدە بولار. وسى ۋاقىت ىشىندە ءبىز Digital Nomads وكىلدەرىمەن بىرگە قازاقستاندىق وقۋشىلار مەن ستۋدەنتتەرگە ارناپ، تۇراقتى دارىستەردى ۇيىمداستىردىق، سونداي-اق سپورتتىق باعدارلامالاۋدى قولداۋ بويىنشا جۇمىستار جۇرگىزدىك. مەن ەلىمىزدە ءوزىمىزدىڭ سپورتتىق باعدارلامالاۋ فەدەراتسياسىنىڭ قۇرىلعانىن قۋانا حابارلاعىم كەلىپ وتىر، ال ماعان وعان جەتەكشىلىك ەتۋ مارتەبەسى بۇيىردى»، - دەپ جازدى ق ر سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى باعدات مۋسين Facebook-تەگى پاراقشاسىندا.
سونداي-اق ول سپورتتىق باعدارلامالاۋدىڭ الەۋەتى زور ينتەللەكتۋالدى سپورت ءتۇرى ەكەنىن ەسكە سالادى.
«مۇندا جاس وسپىرىمدەر ماتەماتيكالىق الگوريتمدىك ەسەپتەردى باعدارلامالاۋ تىلدەرىن قولدانا وتىرىپ شەشەدى. قازاقستاندىق وقۋشىلار مەن ستۋدەنتتەر IOI جانە ICPC سياقتى حالىقارالىق جارىستارعا تۇراقتى تۇردە قاتىسىپ، جوعارى ناتيجەلەرگە قول جەتكىزۋدە.
فەدەراتسيانى قۇرا وتىرىپ، ءبىز حالىق اراسىندا سپورتتىق باعدارلامالاۋدى دامىتۋ مەن ناسيحاتتاۋ جۇمىستارىن جۇرگىزۋدى، سونداي-اق وسى باعىتتا ءتۇرلى جارىستارعا قاتىساتىن جاستارىمىزدىڭ ناتيجەلەرىن ودان ءارى جاقسارتۋدى جوسپارلاپ وتىرمىز.
اتاپ ايتقاندا، فەدەراتسيا ۇلتتىق جانە حالىقارالىق دەڭگەيدە ءىس-شارالار وتكىزۋدى ۇيىمداستىرادى، ءبىلىم بەرۋ مەكەمەلەرىندە ەكوجۇيەنى دامىتادى جانە سپورتتىق باعدارلاماشىلاردى دايارلاۋ ادىستەمەسىن ازىرلەيدى»، - دەيدى باعدات مۋسين.
