20:15, 12 - قاڭتار 2023 | GMT +6
جەكە كۋالىگىن ءجيى جوعالتاتىن ازاماتتارعا مەملەكەتتىك باج مولشەرى ارتادى
استانا. قازاقپارات - جەكە كۋالىگىن جىلىنا ەكى رەتتەن كوپ جوعالتقان ادامدارعا اتالعان قىزمەت ءۇشىن تولەيتىن مەملەكەتتىك باج مولشەرى كوبەيتىلمەك، دەپ حابارلايدى قازاقپارات ءتىلشىسى.
ءماجلىس دەپۋتاتتارى سالىق كودەكسىنە وسىنداي تۇزەتۋ ەنگىزۋ تۋرالى باستاما جاساپ وتىر.
قۇجات ماتىنىندە جوعالعان جەكە كۋالىگىن قالپىنا كەلتىرۋ تۋرالى ءوتىنىشتى ءبىر جىلدا ءۇشىنشى رەت بەرىپ تۇرعان ادام 1 ا ە ك (3450 تەڭگە) كولەمىندە مەملەكەتتىك باج تولەيتىنى ايتىلعان. قازىرگى قولداىنستا قازاقستان رەسپۋبليكاسىنىڭ كەز كەلگەن ازاماتى جەكە كۋالىگىن رەسىمدەۋ نەمەسە اۋىستىرعانى ءۇشىن 0,2 ا ە ك مولشەرىندە مەملەكەتتىك باج تولەيدى.
«قۇجاتتى قايتا رەسىمدەۋ كەزىندە مەملەكەتتىك باجدىڭ ۇلعايۋى ازاماتتاردى جەكە باسىن كۋالاندىراتىن قۇجاتتارعا ۇقىپتى قاراۋعا ىنتالاندىرادى»، - دەلىنگەن قۇجاتپەن قوسا بەرىلگەن نەگىزدەمەدە.
