زيدانعا ءسوز ايتقان فرانسيا فۋتبول فەدەراتسياسىنىڭ پرەزيدەنتى قىزمەتىنەن شەتتەتىلدى
مالىمەتكە قاراعاندا، بۇل تۋرالى RMC Sport حابارلاعان.
FFF باسشىسى قىزمەتىن ۋاقىتشا اتقارۋ ۇيىمنىڭ ۆيتسە- پرەزيدەنتى فيليپپ دياللوعا جۇكتەلدى.
فرانسيا فۋتبول فەدەراتسياسى تەكسەرۋ جۇرگىزىپ، سونىڭ قورىتىندىسى بويىنشا لە گرەنىڭ بولاشاعى جونىندە شەشىم قابىلدايتىن بولادى. تەكسەرۋ قاڭتار ايىنىڭ سوڭىنا تامان اياقتالماقشى.
داۋ لە گرەنىڭ اتاقتى فۋتبولشى زينەدين زيدانعا قاتىستى ايتقان سوزىنەن تۋىنداعان بولاتىن. لە گرە زيدان قوڭىراۋ شالسا دا، تۇتقانى كوتەرمەيتىنىن مالىمدەگەن ەدى. كەيىن ول زيداننان كەشىرىم سۇرادى.
فرانسيا قۇراماسىنىڭ شابۋىلشىسى كيليان مباپپە بۇل داۋدا زينەدين زيداندى قولدادى.
سونداي- اق فرانسيا قۇراماسىنىڭ باس باپكەرى ديدە دەشام دا ءوز پىكىرىن ءبىلدىردى.
«لە گرەنىڭ ءوزى ايتقانداي، سوزدەرى قيسىنسىز ەدى. ونىڭ زيداننان كەشىرىم سۇراعانى دۇرىس بولدى دەپ ويلايمىن»، دەدى د. دەشام.
ەسكە سالا كەتەيىك، بۇدان بۇرىن فرانسيا فۋتبول فەدەراتسياسى پرەزيدەنتىنىڭ زينەدين زيدانعا قاتىستى سوزىنەن داۋ شىققانىن جازعان بولاتىنبىز.
اۆتور
عايساعالي سەيتاق
