تۇماۋدىڭ ءورشۋىن كوروناۆيرۋس ۆاكتسيناسىمەن بايلانىستىرۋ عىلىمي تۇرعىدان نەگىزسىز - مينيستر
«قازاقستاندىقتاردىڭ ماۋسىمدىق تۇماۋدى اۋىر وتكەرىپ جاتقانىنا كوروناۆيرۋسكە قارسى ۆاكسينانى سەبەپكەر دەگەن پىكىرلەر ايتىلىپ ءجۇر. ەكپە ادامداردىڭ تۇماۋعا قارسى يممۋنيتەتىن تەجەپ تاستاعانى راس پا؟ بيىلعى تۇماۋدى حالىق نەگە اۋىر وتكەرىپ جاتىر؟»، - دەپ سۇرادى باق وكىلى اجار عينياتتان مينيسترلىكتىڭ القا وتىرىسىندا.
ءمينيستردىڭ ايتۋىنشا ەلدىڭ تۇماۋدى اۋىر وتكەرىپ جاتقانىنا ۆاكسيناتسيانىڭ ەشقانداي قاتىسى جوق.
«بۇكىل دۇنيەجۇزىندە جەدەل رەسپيراتورلىق ۆيرۋستىق ينفەكسيانىڭ جانە تۇماۋدىڭ ماۋسىمدىق ارتۋى بولىپ جاتىر. اۋىر ءوتىپ جاتقانىنا كەلسەك، كەيىنگى ەكى جىل قاتارىنان ادامدار تۇماۋمەن اۋىرماعاندىقتان ول اۋرۋعا دەگەن يممۋنيتەتى جوق»، - دەدى اجار عينيات.
سونداي- اق ول ەلدە تۇماۋدىڭ ارتۋىن كوروناۆيرۋس ۆاكسيناسىمەن بايلانىستىرۋ عىلىمي تۇرعىدان دا نەگىزسىز دەگەن پىكىر ءبىلدىردى.
«ءسىز ايتىپ وتىرعان جورامال عىلىمي تۇرعىدان دا دۇرىس ەمەس. ويتكەنى ادام دۇنيەگە كەلگەننەن باستاپ، بالالاردىڭ ءوزى 21 ينفەكسياعا قارسى ءار ءتۇرلى ەكپە الادى. ول قانداي دا ءبىر اۋرۋلارعا كەدەرگى كەلتىرىپ جاتقان جوق. تەك ءتيىستى اۋرۋعا عانا قارسى يممۋنيتەت قالىپتاستىرىپ، سول اۋرۋعا عانا توتەپ بەرىپ، قارسى تۇرىپ جاتىر. سوندىقتان ءاربىر ايتىلعان اقپاراتتى عىلىمي تۇردە، ساراپتامالىق تۇردە ايتقان دۇرىس»، - دەدى ۆەدومستۆو باسشىسى.
ايتۋىنشا، سوڭعى ەكى جىلدا سانيتارلىق- پروفيلاكتيكالىق شارالار كۇشەيتىلگەندىكتەن تۇماۋدىڭ تارالۋى ازايعان. ال بيىل الەم بويىنشا قايتا ءورشىپ جاتىر.
«اۋرۋلاردىڭ ءورشۋىن ءبىز اپتا سايىن قاراپ وتىرمىز. قازىر ماۋسىمدىق كەزەڭ ءجۇرىپ جاتىر. سول مونيتورينگتىڭ ءوزى بۇل اۋرۋدىڭ جايلاپ باسىلىپ كەلە جاتقانىن كورسەتىپ وتىر. بۇل تەك تۇماۋعا عانا ەمەس، كوروناۆيرۋس ينفەكسياسىنا دا بايلانىستى. ونى ءبىز جەدەل جاردەمنىڭ شاقىرىلۋىنان، اۋرۋلاردىڭ تىركەلۋىنەن، ناۋقاستاردىڭ اۋرۋحانا تۇسۋىنەن، بالالار اراسىندا اۋرۋحاناعا قاتاڭ تۇردە ءتۇسۋ كورسەتكىشىنەن كورىپ وتىرمىز. قازىردىڭ وزىندە بۇكىل رەسپۋبليكا بويىنشا 45 شاقتى بالا اۋرۋحانادا كوروناۆيۋرسپەن جانە وزگە دە ۆيرۋستىق ينفەكسيالارمەن جاتىر»، - دەدى مينيستر.
