ابايدىڭ سوعىستان قايتپاعان ۇرپاقتارى تۋرالى تىڭ دەرەكتەر جاريالاندى

ەكىنشى دۇنيەجۇزىلىك سوعىسقا قاتىسقان سەمەيلىك جاۋىنگەرلەردىڭ قاتارىندا اقىن اباي قۇنانباي ۇلىنىڭ ۇرپاقتارى دا قاتىسقان.

ولاردىڭ كوبى سوعىس مايدانىنان ورالماعان. جۋىردا «ينفورم-ارنا» باسپاسىنان جارىق كورگەن «توبىقتى- شىڭعىستاۋ شەجىرەسى» ەنتسيكلوپەدياسىنىڭ VII تومىنا اباي ۇرپاقتارى تۋرالى تىڭ مالىمەتتەر ەنگىزىلگەن. سەمەيلىك زەرتتەۋشى مولدابەك جانبولات ۇلى اباي ۇرپاقتارىنا قاتىستى دەرەكتەردى 1988 -جىلدان بەرى جيناقتاعانىن ايتادى. Halyq Uni ءتىلشىسى 86 جاستاعى قارياعا حابارلاسىپ، دەرەكتەردى قالاي جيناستىرعانىن سۇراپ ءبىلدى.

ءوزىنىڭ ايتۋىنشا، ول ءارحام كاكىتاي ۇلىمەن جاقسى تانىس ءارى كورشى بولعان. ءارحامنىڭ اكەسى كاكىتاي (شىن اتى عابدۇلحاكىم)، ابايدىڭ تۋعان ءىنىسى، ىسقاقتىڭ بالاسى. كاكىتايدىڭ بايبىشەسى ساليحادان تۋعان تۇڭعىشى ءارحام قازاق سالتى بويىنشا اتاسى ىسقاقتىڭ باۋىرىندا ءوسىپ تاربيەلەنگەن.

ءارحام ىسقاقوۆ دەگەن كىسىنى كوردىم، ول - مەنىڭ اكەمنەن ۇلكەن ادام. كورشى تۇردىق. كەشكىلىككە ۇلكەن اقساقالدار جينالىپ، دالادا وتىرىپ اڭگىمەلەسەتىن، دويبى، توعىزقۇمالاق وينايتىن. ءارحام دەگەن كىسى توعىزقۇمالاق پەن دويبىدان ورتالىق ازيا بويىنشا چەمپيون بولعان ادام. كوپ ادام اقىل، كەڭەس، اڭگىمە سۇرايتىن. ءوزى دە جارقىلداپ، كوپ سويلەيتىن كىسى ەمەس، ءبىراق قىسقا عانا ءسوز ايتىپ وتىراتىن ادام ەدى، - دەپ ەسكە الدى مولدابەك اقساقال.

ءارحام كاكىتاي ۇلى 1920 -جىلدان 1923 -جىلعا دەيىن ول ازىق-تۇلىك كوميتەتىندە، 1923 -جىلدان 1930 -جىلدارعا دەيىن سۋ شارۋاشىلىعى بىرلەستىگىنىڭ ءتوراعاسى بولىپ، ونان سوڭ كەڭشاردا ۋچاسكى باستىعى بولىپ جۇمىس ىستەيدى.

«باقاناس دەگەن جەردە قىرعا سۋ شىعارىپ، ەگىن سالادى. پوسەلوك قۇراپ شىققان. ونى ارتىنان بايدىڭ بالاسى دەپ قۋعىنداپ، وزبەكستان جاققا قاشىپ كەتەدى. كەيىن 1939 -جىلى مۇحتار اۋەزوۆ ابايدىڭ 100 جىلدىعىندا مۋزەي اشۋ كەرەك دەگەن ءسوز شىققان كەزدە ابايدىڭ ءومىرىن وتە جاقسى بىلەتىن جانە ۇمىتپاي، وزگەرتپەي ايتا الاتىن ءارحامدى ىزدەپ تاۋىپ الىپ، سول مۋزەيگە قىزمەتكەر ەتىپ قابىلداتادى. سەمەيدەگى ابايدىڭ مەموريالدىق مۋزەيى 1971 -جىلى قايتادان سالىندى، سول اۋداندا اتقارۋ كوميتەتىنىڭ ءتوراعاسىنىڭ ورىنباسارى ەدىم. سوعان مەن باسشىلىق جاساپ، مۋزەيدى قىزىل كىرپىشپەن قالاپ شىقتىق. ءوزىم سول ءوڭىردىڭ ادامى بولعاننان كەيىن ءومىر باقي ابايدىڭ اڭگىمەسى، ابايدىڭ تىرشىلىگى تۋرالى ەستىدىك. ال تىكەلەي شەجىرە جيناۋىم 1988 -جىلدان باستالدى»، - دەيدى مولدابەك جانبولاتوۆ.

ونىڭ ايتۋىنشا، كەڭەس مەكتەپتەرىندە ءبىلىم الىپ، تاربيەلەنگەن ابايدىڭ ون شاقتى نەمەرەسى مەن شوبەرەسى سوعىسقا اتتانىپ، ورالماعان. ابايدىڭ شوبەرەسى يشاعى جاعىپار قىزى سوعىستا اۆياتسيا تەحنيگى بولعان.

ابايدىڭ ونداعان ۇرپاعى سوعىسقا كەتىپ ورالماعان. تىكەلەي ۇرپاعى يشاعى جاعىپار قىزى حاربين ماڭىندا سوعىسقان. 2013 -جىلى قايتىس بولىپ، ءوزىنىڭ تىلەگىمەن اقشوقى دەگەن جەردە قۇنانباي جاتقان جەرگە قويىلدى، - دەيدى ول.

كىتاپتا ابايدىڭ نەمەرەسى توقتاش ىزكايىل ۇلى سوعىس دالاسىندا 1943 -جىلى قايتىس بولعانى ايتىلادى.

سول سياقتى اقىن نەمەرەلەرى قۇزايىر مەكايىل ۇلى مەن قالىشەر مەكايىل ۇلى باي تۇقىمى رەتىندە فرۋنزەگە جەر اۋدارىلىپ، سوندا اسكەر قاتارىنا الىنادى. قالىشەر مەكايىل ۇلى 1942 -جىلى، ال اعاسى قۇزايىر مەكايىل ۇلى 1945 -جىلى مايداندا قايتىس بولعان. ابايدىڭ شوبەرەلەرى ءاليحان اۋباكىر ۇلى سوعىستا حابارسىز كەتسە، بەرەكەحان قۇتايبا ۇلى، جوشىحان جاعىپار ۇلى سوعىستا قازا تاپقان.

مولدابەك جانبولاتوۆ - 1936 -جىلى شىڭعىستاۋدا تۋعان. وقۋ-اعارتۋ ءىسىنىڭ ۇزدىگى، جۋرناليستەر وداعىنىڭ مۇشەسى.