تۇرمەلەرگە قانداي تىيىم سالىنعان زاتتار ءجيى كىرگىزىلەدى

پەتروپاۆل. قازاقپارات - سولتۇستىك قازاقستان وبلىسى بويىنشا قىلمىستىق-اتقارۋ جۇيەسى دەپارتامەنتى تۇرمەلەرگە كىرگىزىلمەك بولعان تىيىم سالىنعان زاتتاردىڭ كورمەسىن ۇيىمداستىردى.

ءبىر جىلدىڭ ىشىندە ماماندار تەك 89 تەلەفوندى عانا انىقتاپ، ونىڭ ىشكە ەنۋىنە توسقاۋىل قويدى، دەپ حابارلايدى قازاقپارات ءتىلشىسى.

س ق و قىلمىستىق- اتقارۋ جۇيەسى دەپارتامەنتى باسپا ءسوز قىزمەتىنىڭ مالىمەتىنشە، كولونيا اۋماعىنا سوڭعى كىرگىزىلمەك بولعان زاتتاردىڭ ءبىرى - شاعىن عانا ۇيالى تەلەفون. ونى №48-مەكەمەنىڭ قىزمەتكەرلەرى رەنتگەنتەليەۆيزيالىق اپپاراتتى قولدانا وتىرىپ، اياق كيىم شەتكاسىنىڭ ىشىنەن تاۋىپ الدى. كۇدىك تۋدىرعان «سالەمدەمەنىڭ» ىشىنەن SIM كارتالارى بار «Nokia» ماركالى ۇيالى تەلەفون، سونداي-اق USB كابەلى بار زاريادتاعىش شىقتى. سوتتالعانعا تىيىم سالىنعان زاتتى تۇركىستان وبلىسىنان تۋىسى جىبەرگەن ەكەن.

«مەكەمە اۋماعىنا ءتۇرلى تاسىلمەن وتكىزبەك بولادى. كەڭ تاراعانى اۋماققا ورالعان زاتتى لاقتىرۋ. سونداي- اق قانشا ەسكەرتسەك تە، تۋىستارى كەزدەسۋگە كەلگەندە وزدەرىمەن رۇقسات ەتىلمەگەن زاتتى كىرگىزبەك بولادى. پوشتا ارقىلى باندەرولمەن، سالەمدەمەمەن جىبەرەتىندەر بار. ءتۇرلى تاسىلدەردى قولدانىپ، بارىنشا جاسىرۋعا تىرىسادى. ءبىر جىلدىڭ ىشىندە 89 ۇيالى تەلەفوندى الدىق، 76 گرام ەسىرتكى زاتى تاركىلەندى. سپيرتتىك ىشىمدىكتەردى كىرگىزبەك بولادى. زاڭدى بۇزعاندار اكىمشىلىك جاۋاپكەرشىلىككە تارتىلدى»، - دەيدى س ق و بويىنشا ق ا ج د رەجىم جانە قاداعالاۋ ءبولىمىنىڭ اعا جەدەل ۋاكىلى داۋلەت يمامبايەۆ.

قىلمىستىق-اتقارۋ جۇيەسى دەپارتامەنتىنىڭ قىزمەتكەرلەرى ءبىر جىل ىشىندە تۇزەتۋ مەكەمەسىنە كىرگىزىلمەك بولعان وسىنداي زاتتاردىڭ كورمەسىن ۇيىمداستىردى. تەك وتكەن جىلدىڭ وزىندە تۇرمەگە ۇيالى بايلانىس قۇرالدارىن الىپ كىرۋدىڭ 51 فاكتىسى تىركەلگەن. ال جالپى 89 دانا ۇيالى تەلەفون تاركىلەنگەن. ال ەسىرتكىگە قاتىستى 5 زاڭبۇزۋشىلىق انىقتالدى. سونىڭ بىرىندە ەسىرتكى زاتى جاڭعاقتىڭ ىشىنە جاسىرىلعان.

ماماننىڭ ايتۋىنشا، تۇرمە اۋماعىنا تىيىم سالىنعان زاتتى وتكىزبەك بولعاندارعا 10 ا ە ك مولشەرىندە ايىپپۇل سالىنادى. قايتالانعان جاعدايدا ايىپپۇل مولشەرى ەكى ەسە ارتادى.

«كەلىپ تۇسكەن بارلىق سالەمدەمەلەر ءجىتى قارالادى، قىزمەتكەرلەر ءار زاتتى جەكە- جەكە تەكسەرەدى. سونداي-اق ءيىس الاتىن يتتەرىمىز دە بار. وتكەن جىلدىڭ قورىتىندىسى بويىنشا 14 ادام اكىمشىلىك جاۋاپكەرشىلىككە تارتىلدى. 2 ايىپپۇل سالىنىپ، 12 ەسكەرتۋ جاسالدى. قازىرگى ۋاقىتتا بارلىق مەكەمەلەرگە زاماناۋي رەنتگەن-تەلەۆيزيالىق قوندىرعىلار ورناتىلىپ جاتىر. بۇل ءبىزدىڭ جۇمىسىمىزدى جەڭىلدەتە تۇسپەك»، - دەيدى داۋلەت يمامبايەۆ.