قازاقستان ازاماتتارى ءۇشىن قاجىلىق ساپار ارزانداۋى مۇمكىن

None
استانا. قازاقپارات - قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى جيددا قالاسىندا ساۋد ارابياسى كورولدىگىنىڭ قاجىلىق جانە ۇمرا ءمينيسترى تاۋفيك يبن فاۋزان ار- رابيامەن كەزدەستى، دەپ حابارلايدى قازاقپارات ءتىلشىسى.

ق م د ب باسپا ءسوز حاتشىسى اعابەك قونارباي ۇلىنىڭ Facebook پاراقشاسىنداعى مالىمەتكە سايكەس، كەزدەسۋدە وسى جىلعى ۇلكەن قاجىلىق ساپارىن ساپالى ۇيىمداستىرۋ ماسەلەلەرى ءسوز بولعان.

ناۋرىزباي قاجى تاعان ۇلى قازاقستاندىق قاجىلارعا قولايلى جاعداي جاساۋعا قاتىستى مينيسترگە ۇسىنىسىن جەتكىزدى.

اتاپ ايتقاندا، باس ءمۇفتي قازاقستان قاجىلارىن جەتكىزەتىن اۋە تاسىمالىنىڭ قىزمەت قۇنىن حالىققا ءتيىمدى باعادا بەكىتۋ، وتانداستارىمىزدىڭ قاۋىپسىزدىگىن قامتاماسىز ەتۋ، قوناقۇي باعاسىنا بارىنشا جەڭىلدىك جاساۋ، قىزمەت ساپاسىن ارتتىرۋ، تولەم جاساۋ جۇيەسىن وڭتايلاندىرۋ سىندى ماسەلەلەرگە باسا نازار اۋداردى.

«اللاعا شۇكىر، ەلىمىزدە قاجىلىق پارىزىن ورىنداۋعا نيەت بىلدىرۋشىلەر سانى جىلدان جىلعا ارتىپ كەلەدى. ءبىزدىڭ ماقسات - قاجىلىق ساپارىن جوعارى دەڭگەيدە ۇيىمداستىرۋ. قازاقستان قاجىلىق ميسسياسى وسى باعىتتا ناتيجەلى جۇمىس ىستەپ كەلەدى. سىزدەر تاراپتان قىزمەت كورسەتۋ باعاسىنا جەڭىلدىكتەر جاسالسا دەگەن تىلەگىمىز بار. بۇل قادام ءبىزدىڭ قاجىلارعا ۇلكەن قولداۋ بولار ەدى»، - دەدى ناۋرىزباي قاجى تاعان ۇلى.

ءوز كەزەگىندە س ا ك قاجىلىق جانە ۇمرا ءمينيسترى تاۋفيك يبن فاۋزان ار- رابيا قازاقستاندىق قاجىلارعا مينيسترلىك تاراپىنان بارىنشا قولداۋ كورسەتىلەتىنىن جەتكىزدى.

كەزدەسۋ سوڭىندا تاراپتار ەكىجاقتى ىنتىماقتاستىقتى ارتتىرۋعا كەلىستى.

ەستەرىڭىزگە سالا كەتسەك، وتكەن جىلى 4 مىڭ جەرلەسىمىز ۇلكەن قاجىلىعىن وتەپ كەلدى.

وتانداستارىمىزعا 14 تۋريستىك كومپانيا قىزمەت كورسەتتى. قاجىلارعا قىزمەت كورسەتۋگە لايىقتى تۋريستىك فيرمالار كونكۋرستىق نەگىزدە انىقتالدى.

فوتو: facebook.com/اعابەك قونارباي ۇلى

اۆتور

مارلان جيەمباي


سوڭعى جاڭالىقتار