تەلەفوندى كوپ ۇستاۋدىڭ زيانى

استانا. قازاقپارات – ادام ءومىرى ءتۇرلى قۇرىلعىلارمەن تىعىز بايلانىستى. قازىر ۇيالى تەلەفونسىز بىرنەشە ساعات وتىرۋدىڭ ءوزى قيىن.

ونىڭ كۇندەلىكتى ومىرىمىزگە ەنگەنى سونشالىق، ونى قولىمىزدان تاستامايمىز جانە ۇيىقتاساق تا قاسىمىزعا بىرگە الىپ جاتامىز.

الايدا ونىڭ ادام دەنساۋلىعىنا زيانى زور.

ءار قۇرىلعىنىڭ ءوز ساۋلەلەنۋى بار. تەلەفوننىڭ ساۋلەلەنۋى راديوسيگنالدىڭ بايلانىس ستانتسياسىمەن الماسۋى ناتيجەسىندە الىنادى. ەگەر بايلانىس ناشار بولسا، سويلەپ جاتقان ادامدى جاقسىراق ەستۋ ءۇشىن تەلەفوندى قۇلاققا قاتتىراق تاقايمىز.

وسى كەزدە ساۋلە كوزى مەن مي اراسىنداعى قاشىقتىق قىسقارادى. مۇنداي جاقىن قاشىقتىق ءتۇرلى پاتولوگيالار مەن اۋرۋلارعا اكەلەدى. سەبەبى قاۋىپتى ساۋلەلەنۋ قانشالىقتى جاقىن بولسا، ونىڭ اعزاعا اسەرى سونشالىقتى كوپ بولادى. سوندىقتان دا ۇيالى تەلەفوندى قولدانباساڭىز، ونى وزىڭىزدەن الىس ۇستاۋعا تىرىسىڭىز.

ۇيالى تەلەفوننىڭ مىناداي جاعىمسىز سالدارلارى بولۋى مۇمكىن:

- يممۋنيتەتكە قوسىمشا كۇش تۇسىرەدى. ۇيالى تەلەفوندى ءجيى پايدالاناتىنداردىڭ باسى ءجيى اۋىرادى، كۇندىزگى ۇيقىشىلدىقپەن قينالادى، اشۋلانشاق كەلەدى جانە ءجيى تۇماۋمەن اۋىرادى؛

- ەلەكتروماگنيتتىك تولقىندار ىشكى تىندەردىڭ قىزۋىن ىنتالاندىرادى. ءموبيلدى قۇرىلعى تورلى قابىقپەن، ميمەن، ەستۋ جانە كورۋ اپپاراتتارىنىڭ قۇرىلىمدارىمەن جۇتىلاتىن قاۋىپتى ساۋلەلەنۋدى تۋدىرادى. سوندىقتان وسى ورگاندار دا، جۇيكە ۇشتارى دا جاعىمسىز اسەرگە ۇشىراۋى مۇمكىن؛

- كورۋ، ەستە ساقتاۋ جانە پسيحوەموتسيونالدى توزىمدىلىك ناشارلايدى؛

- ۇيقى ناشارلايدى. ول ۇيقى فازالارىنىڭ (جىلدام جانە باياۋ) دۇرىس اۋىسۋىن بۇزىپ جىبەرەدى. سوندىقتان ادامنىڭ ۇيقىسى قانباي ويانادى.

- ول ارتەريالىق قىسىم، مي بەلسەندىلىگى، كوگنيتيۆتى قىزمەتتەر جانە جۇرەك جۇيەسىنە جاعىمسىز اسەر ەتۋى مۇمكىن.

ۇيالى تەلەفوننىڭ ادام دەنساۋلىعىنا زيانىن ازايتۋ ءۇشىن مىنا فاكتورلاردى ەسكەرۋ كەرەك:

1. تەلەفوننىڭ دىبىسىن ارتتىرۋ ساۋلەلەنۋ قۋاتتىلىعىنىڭ وسۋىنە ىقپال ەتەدى؛

2. ۇيدە ۇيالى تەلەفوندى قاسىڭىزعا الىپ جۇرمەي، كەلەسى بولمەگە تاستاپ كەتىڭىز؛

3. ۇيالى تەلەفوندى قالتاڭىزعا ەمەس، سومكەگە سالىپ ءجۇرىڭىز.

4. ۇيالى تەلەفونمەن ۇزاق سويلەسپەڭىز. قانشالىقتى از سويلەسسەڭىز، ونىڭ جاعىمسىز اسەرى دە سونشالىقتى از بولادى. مۇمكىندىك بولسا، ول اداممەن جەكە كەزدەسكەن دۇرىس. ەگەر ۇيالى تەلەفون ارقىلى كەلىسسوز جۇرگىزۋ كەرەك بولسا، ءۇزىلىس جاساۋعا تىرىسىڭىز.

5. ۇيىقتار الدىندا تەلەفوندى ءوشىرىپ تاستاعان ءجون. وياتقىش تەلەفون ءسونىپ تۇرسا دا، وينايدى.

6. بالا اعزاسى ءالسىز، سوندىقتان ول ەلەكتروماگنيتتى ساۋلەلەنۋدەن بارىنشا الشاق بولعانى دۇرىس. بۇل جۇكتى ايەلدەرگە دە قاتىستى ايتىلعان.

7. تەلەفون ساتىپ الاردا قۋاتتىلىعى از ءتۇرىن تاڭداڭىز.