باس پروكۋرور ازاپتاۋلارعا توسقاۋىل قويۋ جۇمىستارى جايىندا تۇسىنىك بەردى

استانا. قازاقپارات - بۇگىن پارلامەنت ءماجىلىسىنىڭ جالپى وتىرىسىندا ەلىمىزدەگى كولونيالاردا ازاپتاۋلارعا توسقاۋىل قويۋ باعىتىندا پروكۋرورلار ءتيىستى باقىلاۋ جۇرگىزىپ جاتقانى ايتىلدى، دەپ حابارلايدى قازاقپارات ءتىلشىسى.

دەپۋتات دارحان مىڭباي ەلىمىزدە ازاپتاۋلارعا جول بەرمەۋ باعىتىندا قانداي شارالار قابىلدانعانىن سۇرادى.

وسى ورايدا باس پروكۋرور بەرىك اسىلوۆ ارنايى پروكۋرورلار پوليتسيا مەن ۇلتتىق قاۋىپسىزدىك كوميتەتىنىڭ قىزمەتكەرىنە قاتىستى ءىستى تەرگەگەنىن ايتتى.

«ازاپتاۋ تۋرالى قىلمىستىق ىستەردىڭ باسىم بولىگىن سىبايلاس جەمقورلىققا قارسى ءىس- قيمىل اگەنتتىگى تەرگەدى. پروكۋرورلار نەعۇرلىم رەزونانستى جانە ادام ولىمىنە قاتىستى ىستەردى قامتىدى. ارنايى پروكۋرورلار پوليتسيا مەن ۇلتتىق قاۋىپسىزدىك كوميتەتىنىڭ 34 قىزمەتكەرىنە قاتىستى ءىستى تەرگەدى. الماتى وبلىسىنىڭ پوليتسيا عيماراتىندا 24 ادامدى ازاپتاۋ فاكتىلەرى تۋرالى ءىستى سوتقا جولدادىق. جالپى، ءبىز قاراعان ازاپتاۋ ىستەرى بويىنشا ايىپتاۋدان باس تارتقان دەرەكتەر بولمادى. بارلىعىن تەرگەپ، سوتقا جولداپ وتىرمىز» ، - دەدى ب. اسىلوۆ.

ونىڭ ايتۋىنشا، قازىرگى كەزدە ەلىمىزدەگى كولونيالاردا بەينەباقىلاۋ جۇيەسى ورناتىلعان. وسى جۇيە ارقىلى پروكۋرورلار ءتيىستى باقىلاۋ جۇرگىزە الادى.

«تەرگەۋ قالاي ءجۇرىپ جاتقانىن، سوتتالعانداردىڭ ءىس-قيمىلىن كورىپ وتىرمىز»، - دەدى باس پروكۋرور.

ءوز كەزەگىندە ق ر ىشكى ىستەر ءمينيسترى مارات احمەتجانوۆ ازاپتاۋلارعا جول بەرمەس ءۇشىن ۆەدومستۆو ءتيىستى شارالار قابىلداپ جاتقانىن ايتتى.

«ءار پوليتسيا قىزمەتكەرىندە بەينەباقىلاۋ جەتونى بار. سونىمەن قاتار، ءبىزدىڭ ورگاندارداعى اۋقىمدى جۇمىستار جايىندا الداعى ۋاقىتتا دەپۋتاتتارعا تولىق بايانداپ بەرەمىز. قازىر جەكە قۇرام ازاپتاۋ سەكىلدى تەرىس ارەكەتتەر پوليتسيا قىزمەتىنە ساي ەمەس دەپ سانايدى»، - دەدى مينيستر.

بۇدان بۇرىن حابارلانعانداي، باس پروكۋرور ب. اسىلوۆ قاڭتارداعى ازاپتاۋلار تۋرالى شاعىمدار بويىنشا 329 قىلمىستىق ءىس قوزعالعانىن ايتتى.