اباي وبلىسىندا قۇرىلىس قارقىن الادى
سەمەيدە 150 ورىندىق وڭالتۋ ورتالىعى، ال ءۇرجار اۋدانىندا دارىگەرلىك امبۋلاتوريا بوي كوتەرمەك. ءوڭىر حالقىن تولىقتاي تازا اۋىز سۋمەن قامتاماسىز ەتۋ دە جوسپارداعى ماسەلە. 2025 -جىلعا دەيىن 93 جوبا جۇزەگە اسىرىلادى. تولىعىراق ءتىلشى ماتەريالىنان وقىڭىز.
«25 جىل ىشىندە سەمەيدە تۇرعىن ءۇي قۇرىلىسى تۇرالاپ قالعانى راس. وسىعان وراي، الداعى ءۇش جىلدا 1 ميلليوننان استام شارشى مەتر تۇرعىن ءۇي پايدالانۋعا بەرىلەدى»، - دەلىنگەن وبلىس اكىمدىگى ۇسىنعان اقپاراتتا.
«قۋاتتى وڭىرلەر - ەل دامۋىنىڭ درايۆەرى» ۇلتتىق جوباسى شەڭبەرىندە 2023 -جىلعا كرەديتتىك تۇرعىن ءۇي قۇرىلىسى مەن ولارعا ينجەنەرلىك جەلىلەردى سالۋ، سۋمەن جابدىقتاۋ جەلىلەرىن سالۋ جانە رەكونسترۋكتسيالاۋ، وبلىستىق جانە اۋداندىق ماڭىزى بار جولداردى جوندەۋ كوزدەلگەن.
سەمەيدەگى ەكى كوپىردى جوندەۋ مىندەتى تۇر. ءۇش جىلدا ءبىتىرۋ تاپسىرىلعان جاڭا كوپىردىڭ قۇرىلىسى بيىل باستالىپ كەتتى. اۆتوكولىك كوپىرىن رەكونسترۋكتسيالاۋدى جالعاستىرۋعا رەسپۋبليكالىق بيۋدجەتتەن 2 ميلليارد تەڭگە ءبولىندى.
«مەملەكەت باسشىسى اسپالى كوپىرگە كۇردەلى جوندەۋ جۇمىستارىن جۇرگىزۋدى تاپسىردى. بيىل كوپىرگە جاپوندىق ماماندار زەرتتەۋ جۇرگىزگەن. ەندى جاپونيانىڭ كولىك مينيسترلىگىمەن ەكىجاقتى كەلىسسوزدەر جۇرگىزۋ جوسپارلانىپ وتىر. سودان سوڭ ەسەپتەۋلەر جانە زەرتتەۋ ناتيجەلەرى ۇسىنىلادى»، - دەيدى وبلىس اكىمى نۇرلان ۇرانحايەۆ.
اكىمنىڭ ايتۋىنشا، سەمەيدەگى بالالاردى ارناۋلى الەۋمەتتىك قىزمەتتەرمەن قامتۋ ماسەلەسى قاراعايلى شاعىن اۋدانىندا 150 ورىندىق وڭالتۋ ورتالىعىن سالۋ ارقىلى شەشىلمەك. بۇل ورتالىق قالا تۇرعىندارىنا عانا ەمەس، تۇگەل وبلىس حالقىنا قىزمەت كورسەتەدى.
«ەرەكشە قاجەتتىلىكتەرى بار بالالار ءۇشىن مەملەكەتتىك الەۋمەتتىك تاپسىرىس كولەمى 4 ەسەگە ۇلعايتىلادى. سەمەي قالاسىندا تىرەك- قيمىل اپپاراتى بۇزىلعان جانە پسيحونيەۆرولوگيالىق اۋرۋلارى بار بالالارعا ارنالعان 150 ورىندىق 2 وڭالتۋ ورتالىعىن سالۋ جوسپاردا بار»، - دەيدى ايماق باسشىسى.
«اۋىل - ەل بەسىگى» جوباسى اياسىندا ەلدى مەكەندەردى دامىتۋ ءۇشىن ءۇرجار اۋدانىنىڭ ءۇرجار اۋىلىندا 10 توسەكتىك كۇندىزگى ستاتسيونار مەن 50 كەلۋشىگە ارنالعان دارىگەرلىك امبۋلاتوريا سالۋ جوسپارلانعان. ءۇرجار اۋدانىنىڭ تاسكەسكەن اۋىلىندا، اباي اۋدانىنىڭ كوكباي اۋىلىندا سپورت مودۋلدەرى سالىنادى. كەنتىشىلىك جولداردى ورتاشا جوندەۋگە قاتىستى 33 جوبا قولعا الىنىپ، 3 مەديتسينالىق نىسان، 4 ءبىلىم بەرۋ مەكەمەسى كۇردەلى جوندەۋدەن وتكىزىلەدى»، - دەيدى نۇرلان ۇرانحايەۆ.
«جايلى مەكتەپ» ۇلتتىق جوباسى اياسىندا 5 ورتا ءبىلىم بەرەتىن مەكتەپتىڭ قۇرىلىسىن باستاۋعا 9,2 ميلليارد تەڭگە قاراستىرىلدى. «اۋىلدىق دەنساۋلىق ساقتاۋدى جاڭعىرتۋ» پيلوتتىق ۇلتتىق جوباسى شەڭبەرىندە ەلدى مەكەندەردە 65 باستاپقى- مەديتسينالىق- سانيتارلىق كومەك وبەكتىلەرىن سالۋعا جوبالاۋ-سمەتالىق قۇجاتتامالار ازىرلەنبەك.
سونداي-اق، سەمەيدە جاڭا جىلۋ ەلەكتر ورتالىعى سالىنباق. ەرتىستىڭ سول جاعالاۋى مەن وڭ جاعالاۋىنداعى ەكى ۋچاسكە بۇعان دەيىن ەكى جىلۋ كوزىن سالۋ الاڭى بولىپ بەلگىلەنگەن. الايدا، جەو- نى ورنالاستىرۋ تۋرالى تۇپكىلىكتى شەشىم «سامۇرىق- ەنەرگو» ا ق تاراپىنان تەحنيكالىق- ەكونوميكالىق نەگىزدەمە ازىرلەۋ بارىسىندا قابىلدانادى.
ايتا كەتسەك، ايماقتى اۋىز سۋمەن قامتۋ باعىتىندا جوسپارلانىپ وتىرعان ءبىرقاتار جوبا بار.
«بۇگىندە ءوڭىر بويىنشا حالىقتىڭ تازا سۋمەن قامتاماسىز ەتىلۋى - %92,5. بۇل
كورسەتكىشتى %100 عا جەتكىزۋ ءۇشىن 2023-2025 -جىلدارى 52 مىڭ ادامدى قامتيتىن 93 جوبا ىسكە اسىرىلماق، ونىڭ 56 سى سەمەي قالاسىنا تيەسىلى»، - دەلىنگەن اكىمدىك حابارلاماسىندا.
«2022 -جىلدىڭ 11 ايىندا وبلىس ەكونوميكاسىنا %5,5 وسىممەن 329 ميلليارد تەڭگە ينۆەستيتسيا تارتىلعان. جىل سوڭىنا قاراي ينۆەستيتسيا كولەمى ارتىپ، ونىڭ ىشىندە سەمەي قالاسىنىڭ
ۇلەسى %44,5 بولدى. 981 جاڭا جۇمىس ورنىن قۇرۋمەن 13 ينۆەستيتسيالىق جوبا ىسكە اسىرىلىپ جاتىر. وڭدەۋ ونەركاسىبىندە 885 جۇمىس ورنىن قۇرۋمەن 4 جوبا جۇزەگە اسىرىلىپ كەلەدى. ونىڭ ۇشەۋى سەمەي قالاسىندا. بيىلعى جىلدىڭ I توقسانىندا «ءوندىرىس» يندۋستريالىق ايماعىندا قۋاتتىلىعى جىلىنا 600 توننا بولاتىن جارتىلاي ەت فابريكاتتارىن ءوندىرۋ تسەحىن ىسكە قوسۋ جوسپارلانىپ وتىر»، - دەلىنگەن وبلىس اكىمدىگى ۇسىنعان اقپاراتتا.
سونىمەن بىرگە، 2023 -جىلى جۇمىرتقا وندىرەتىن «Semey Qus» فابريكاسىن كەڭەيتۋ، 200 مالعا ارنالعان ءسۇت-تاۋار فەرماسىن قايتا جاڭعىرتۋ كوزدەلگەن.
اۆتور
تالعاتجان مۇحامەتبەك ۇلى
