ق ر ەكولوگيا جانە تابيعي رەسۋرستار مينيسترلىگى قۇرىلدى
استانا. قازاقپارات - قازاقستان رەسپۋبليكاسىنىڭ مەملەكەتتىك باسقارۋ جۇيەسىن ودان ءارى جەتىلدىرۋ جونىندەگى شارالار تۋرالى جارلىققا قول قويدى.
وندا ق ر ەكولوگيا جانە تابيعي رەسۋرستار مينيسترلىگى قايتا قۇرىلاتىنى ايتىلعان، دەپ حابارلايدى اقوردانىڭ باسپا ءسوز قىزمەتى. قازاقپارات وقىرمان نازارىنا قۇجاتتىڭ تولىق ءماتىنىن ۇسىنادى.
***
قازاقستان رەسپۋبليكاسىنىڭ مەملەكەتتىك باسقارۋ جۇيەسىن ودان ءارى جەتىلدىرۋ جونىندەگى شارالار تۋرالى
2023 -جىلعى 2-قاڭتار
قازاقستان رەسپۋبليكاسىنىڭ كونستيتۋتسياسى 44-بابىنىڭ 3) تارماقشاسىنا سايكەس مەملەكەتتىك باسقارۋ جۇيەسىن جاڭعىرتۋ جانە ونىڭ تيىمدىلىگىن ارتتىرۋ ماقساتىندا قاۋلى ەتەمىن:
1. قازاقستان رەسپۋبليكاسىنىڭ ەكولوگيا، گەولوگيا جانە تابيعي رەسۋرستار مينيسترلىگى جەر قويناۋىن مەملەكەتتىك گەولوگيالىق زەردەلەۋ، مينەرالدىق- شيكىزات بازاسىن مولىقتىرۋ سالاسىنداعى فۋنكتسيالارى مەن وكىلەتتىكتەرى قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ مينيسترلىگىنە بەرىلە وتىرىپ، قازاقستان رەسپۋبليكاسىنىڭ ەكولوگيا جانە تابيعي رەسۋرستار مينيسترلىگى بولىپ قايتا ۇيىمداستىرىلسىن.
2. قازاقستان رەسپۋبليكاسىنىڭ ۇكىمەتى:
1) قازاقستان رەسپۋبليكاسى پرەزيدەنتىنىڭ اكىمشىلىگىمەن كەلىسىم بويىنشا مەملەكەتتىك ورگانداردىڭ جانە ولارعا ۆەدومستۆولىق باعىنىستى ۇيىمداردىڭ شتات سانىن قايتا ءبولۋدى؛
2) وسى جارلىقتى ىسكە اسىرۋ بويىنشا وزگە دە شارالار قابىلداۋدى قامتاماسىز ەتسىن.
3. قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ مينيسترلىگى بەرىلەتىن فۋنكسيالار مەن وكىلەتتىكتەر شەگىندە قازاقستان رەسپۋبليكاسىنىڭ ەكولوگيا، گەولوگيا جانە تابيعي رەسۋرستار مينيسترلىگىنىڭ قۇقىقتارى مەن مىندەتتەمەلەرىنىڭ ميراسقورى بولىپ ايقىندالسىن.
4. «قازاقستان رەسپۋبليكاسى ۇكىمەتىنىڭ قۇرىلىمى تۋرالى» قازاقستان رەسپۋبليكاسى پرەزيدەنتىنىڭ 1999 -جىلعى 22-قاڭتارداعى №6-جارلىعىنا مىناداي وزگەرىس ەنگىزىلسىن:
1-تارماقتاعى «قازاقستان رەسپۋبليكاسىنىڭ ەكولوگيا، گەولوگيا جانە تابيعي رەسۋرستار مينيسترلىگى» دەگەن جول مىناداي رەداكسيادا جازىلسىن:
«قازاقستان رەسپۋبليكاسىنىڭ ەكولوگيا جانە تابيعي رەسۋرستار مينيسترلىگى».
5. وسى جارلىقتىڭ ورىندالۋىن باقىلاۋ قازاقستان رەسپۋبليكاسى پرەزيدەنتىنىڭ اكىمشىلىگىنە جۇكتەلسىن.
6. وسى جارلىق قول قويىلعان كۇنىنەن باستاپ قولدانىسقا ەنگىزىلەدى.
قازاقستان رەسپۋبليكاسىنىڭ
پرەزيدەنتى ق. توقايەۆ
استانا، اقوردا، 2023 -جىلعى 2-قاڭتار
№ 80
