قاسىم-جومارت توقايەۆتىڭ بيىل اتقارعان جۇمىسىنىڭ قورىتىندىسى جاريالاندى

ق ر پرەزيدەنتى باسپا ءسوز قىزمەتىنىڭ مالىمەتكە سايكەس، پرەزيدەنت ءوتىپ بارا جاتقان جىلدا 68 زاڭعا، 422 جارلىققا، 137 وكىمگە، 4508 قىزمەتتىك حات-حابارعا، 594 جەكە جانە زاڭدى تۇلعالاردىڭ جولدانىمىنا قاتىستى ءتيىستى شەشىمدەرگە قول قويدى. سونىمەن قاتار 60 جەدەلحات جولدادى. 30 مەملەكەتتىڭ توتەنشە جانە وكىلەتتى ەلشىسىنەن سەنىم گراموتالارىن قابىلدادى. 59 رەت تەلەفون ارقىلى سويلەستى. 4 رەت ۇندەۋ مەن مالىمدەمە جاسادى. 1 رەت جاريا تۇردە كونستيتۋتسيالىق زاڭدارعا قول قويدى. 59 جينالىس پەن كەڭەسكە، 31 حالىقارالىق دەڭگەيدەگى شاراعا قاتىستى. 298 رەت قابىلداۋ مەن كەزدەسۋ وتكىزدى.

پرەزيدەنت 2022 -جىلى ەل ىشىنە جانە شەتەلدەرگە ءبىرقاتار ساپار جاسادى. 147390 شاقىرىم قاشىقتىققا ۇشتى. 238 ساعات 55 مينۋت ۇشاقتا بولدى. مەملەكەت باسشىسى 16 رەت جۇمىس ساپارىمەن ەلىمىزدىڭ ايماقتارىنا باردى. قاسىم- جومارت توقايەۆ 14 ەلگە 25 رەت ساپار شەكتى. ولاردىڭ قاتارىندا قىتاي، رەسەي، وزبەكستان، قاتار، تۇركيا، يران، ساۋد ارابياسى، ا ق ش، فرانتسيا، ازەربايجان جانە باسقا دا ەلدەر بار.

پرەزيدەنت 19 ەلدىڭ مەملەكەت باسشىسىمەن كەزدەسىپ، كەلىسسوز جۇرگىزدى.

ولار: ر ف پرەزيدەنتى ۆلاديمير پۋتين، ق ح ر ءتوراعاسى شي جينپيڭ، ريم پاپاسى فرانسيسك، تۇركيا پرەزيدەنتى رەجەپ تايىپ ەردوعان، فرانسيا پرەزيدەنتى ەممانيۋەل ماكرون، وزبەكستان پرەزيدەنتى شاۆكات ميرزەيەۆ، قىرعىزستان پرەزيدەنتى سادىر جاپاروۆ، يران پرەزيدەنتى يبراحيم رايسي، قاتار ءامىرى شەيح ءتاميم بەن حاماد ءال ءتاني، ساۋد ارابياسىنىڭ كورولى سالمان بەن ابدەلازيز ءال ساۋد، ب ا ءا پرەزيدەنتى شەيح مۇحاممەد بەن زايد ءال ناحايان، ازەربايجان پرەزيدەنتى يلحام اليەۆ جانە باسقالارى.