قازاقستان تۇركى مەملەكەتتەرى ۇيىمىنىڭ جۇمىسىنا بارىنشا قولداۋ كورسەتەدى - پرەزيدەنت
استانا. قازاقپارات - پرەزيدەنت تۇركى مەملەكەتتەرى ۇيىمىنىڭ باس حاتشىسى كۋبانىچبەك ومىراليەۆتى قابىلدادى، دەپ حابارلايدى قازاقپارات بورت №1 تەلەگرام-ارناسىنا سىلتەمە جاساپ.
كەزدەسۋ بارىسىندا مەملەكەت باسشىسى، ەڭ الدىمەن، كۋبانىچبەك ومىراليەۆتى ۇيىمنىڭ باس حاتشىسى لاۋازىمىنا تاعايىندالۋىمەن قۇتتىقتاپ، الداعى قىزمەتىنە تابىس تىلەدى.
قاسىم-جومارت توقايەۆ قازاقستان ۇيىمنىڭ نەگىزىن قالاۋشى ەلدىڭ ءبىرى رەتىندە تۇركى مەملەكەتتەرىمەن كوپجاقتى ىنتىماقتاستىقتى دامىتۋعا مۇددەلى ەكەنىنە توقتالىپ، حاتشىلىقتىڭ جۇمىسىنا بارىنشا قولداۋ كورسەتەتىنىن جەتكىزدى.
مەملەكەت باسشىسىنىڭ ايتۋىنشا، بۇگىندە تۇركى حالىقتارىنىڭ ىنتىماقتاستىعى مەن بىرلىگىن نىعايتۋعا ارنالعان بىرەگەي الاڭ رەتىندە تۇركى مەملەكەتتەرى ۇيىمىنىڭ ماڭىزى ارتا ءتۇستى. حالىقارالىق ۇيىمدار مەن الەمنىڭ كوپتەگەن ەلدەرى تۇركى مەملەكەتتەرى ۇيىمىمەن ساۋدا- ەكونوميكالىق جانە مادەني-گۋمانيتارلىق بايلانىستاردى كۇشەيتۋگە نيەتتى.
پرەزيدەنت سونداي-اق ۇيىم حاتشىلىعىنىڭ الدىندا بيىل قازان ايىندا سامارقاند قالاسىنداعى سامميتتە قابىلدانعان ماڭىزدى شەشىمدەر مەن باستامالاردى ءتيىمدى جۇزەگە اسىرۋ مىندەتى تۇرعانىن ايتتى.
تۇركى مەملەكەتتەرى ۇيىمى 2009 -جىلى قۇرىلدى. ۇيىمنىڭ كەلەسى مەرەيتويلىق 10-سامميتى 2023 -جىلى قازاقستاندا وتەدى.
