قازىرگى زاماندا جاستارعا قانداي تاربيە قاجەت؟

ەڭ اۋەلى تاربيەنى اتا-انامىز بەرەدى. مەكتەپ جاسىنا كەلگەندە بالا مەكتەپ، ۇستاز، وزگە دە وقۋشىلار، قوعاممەن بايلانىسقا ءتۇسىپ، ءوزىن تۇلعا رەتىندە قالىپتاستىرا باستايدى. بۇل كەزەڭ ادامنىڭ تاعدىرى ءۇشىن وتە ماڭىزدى ءرول اتقارادى.

وسى كەزدە بالا ۇلكەن ومىرگە دايىندىقتى باستاپ، ماماندىعىن تاڭدايدى. قوعامنان تاڭىلعان ءتۇرلى جاۋاپكەرشىلىك پەن سەنىمدى ارقالاي باستايدى. ءوزىنىڭ ورتاسىنا قاراي مىنەز-قۇلقى مەن امبيتسياسى، ارمان-ماقساتتارى، ومىرگە دەگەن كوزقاراسى قالىپتاسادى. وسى كەزدە تاربيەنىڭ دۇرىس باعىتتا بەرىلۋى ونى بولاشاقتا بولۋى مۇمكىن كەيبىر كەلەڭسىز جاعدايلاردان ساقتايدى. كوپتەگەن قاراۋسىز قالعان بالالار ءتۇرلى زياندى نارسەلەرگە، ويىن قۇمارلىق، ىشىمدىككە سالىنۋى، ۇرلىققا بارۋ سىندى جاعدايلارعا تاربيەنىڭ دۇرىس بەرىلمەۋىنەن ۇرىنىپ جاتادى.

دۇرىس تاربيە دەگەنىمىز نە ؟ ونى كىمدەر بەرەدى؟ وسى تۋرالى وربىتەر بولساق، ءال-فارابي اتامىزدىڭ «تاربيەسىز بەرىلگەن ءبىلىم - ادامزاتتىڭ قاس جاۋى» دەگەن سوزىنە ورالامىز. ياعني، ءبىلىم مەن تاربيەنىڭ ءبىر-بىرىنەن ءبولىپ جارۋعا كەلمەيتىن ەگىز ۇعىم ەكەنىن كورەمىز. ءبىراق اۋەلى تاربيە، ودان سوڭ ءبىلىمنىڭ ماڭىزدىلىعى ايقىن كورىنىس تاۋىپ تۇر.

تاربيە دەگەنىمىز - ادامنىن بۇكىل ومىرلىك ازىعى. ونىن ىشكى ويلارى، وزگە ادامدارمەن كوركەم قارىم-قاتىناس جاساي الۋى، بارلىق جاعدايدا دا ءوز بولمىسىن تانۋعا، اشۋعا بەيىمدىلىگى. وزىنە دە، اينالاسىنا دا مەيىرىمدى بولۋى، ءوزىن قورعاعانداي قورشاعان ورتانى قورعاي الۋى. بالا كۇنىندە دۇرىس تاربيە الا المادى، اتا-اناسى قاراي المادى دەگەن جاستار قيسىق وسكەن اعاشتاي ءومىر بويى قيسىق مىنەزبەن قالا ما دەگەن سۇراق تۋادى. جوق. اباي اتامىزدىڭ «ادامنىڭ مىنەزى وزگەرمەيدى دەگەننىڭ ءتىلىن كەسەر ەدىم» دەگەن ءسوزى بار عوي. ياعني ، ادام ءوزىن-ءوزى تاربيەلەي الادى. بۇل جول قيىنىراق، الدەقايدا جوعارى جاۋاپكەرشىلىكتى تالاپ ەتۋى مۇمكىن، ءبىراق ادام ءوزىن تاربيەلەي الاتىنى اقيقات.

تاربيەنى كىمدەر بەرە الادى؟

بۇگىنگى جاستاردى ، اشىعىن ايتقاندا تەلەديدار مەن بۇقارالىق اقپارات قۇرالدارى . ءبىز دۇنيەگە كەلگەن زامان - اتا-انامىزدىڭ كۇنكورىس ءۇشىن جانتالاستا كەتكەن سۇراپىل كەزەڭىمەن تۇسپا- تۇس كەلەدى. ياعني ولار ءبىزدى ۇيدە تەلەديدار الدىنا قالدىرۋعا ءماجبۇر بولدى. نەنى كورىپ، ەستىپ وسكەنىمىزدى جاستار جاقسى بىلەر. ەسەيىپ، ەر جەتتىك دەگەندە الەۋمەتتىك جەلىلەر مەن ءتۇرلى توپتار پايدا بولىپ، اركىمنىڭ جەتەگىندە ، سوزىندە كەتكەن جاستاردىڭ جوق ەمەستىگى بەلگىلى.

قازىرگى زاماننىڭ سيپاتىنا كەلەيىك، ءتۇرلى ءدىني ۋاعىزدار ايتىلىپ، ءدىندى بيزنەس، بيزنەستى ءدىن ەتىپ جاتقان توپتار مەن «ءومىرىڭدى وزگەرتەم»، «باي بولاسى»، «كەرەمەت ايەل بولاسىڭ»، «ءا دەگەندە بيزنەس اش» دەگەن ۇرانمەن قاپتاعان قالىڭ سەمينارشى، مارافونشىلار تورىمىزگە جايعاستى. اقپارات بەرىپ، اقشا تاباتن ادامداردىڭ زامانى دەرسىڭ. ولارعا وكپەلەي دە المايمىز. زامان تالابى وسى. ياعني بۇگىنگى جاستارعا موتيۆاتسيا ، تابىس تابۋ، ومىردە ءوز ورنىڭدى تابۋ اۋاداي قاجەت دەگەن ءسوز. ءبىز سۇراپ جاتىرمىز، بىزگە بەرىپ جاتىر.

ەندى جاستارعا قانداي تاربيە ءبىلىم، تۇلعا رەتىندە قالىپتاستىرا الامىز؟ ەڭ اۋەلى جاستارعا ءوزىنىڭ قۇندىلىقتارىن قالىپتاستىرۋدى، ودان سوڭ وتباسىلىق، ۇلتىق قۇندىلىقتاردى سۇيۋگە باۋلۋ كەرەك.

massaget.kz