احمەت بايتۇرسىن ۇلى تۋرالى فيلمنىڭ شىعاتىن كۇنى بەلگىلى بولدى
تۋىندى ق ر مادەنيەت جانە سپورت مينيسترلىگىنىڭ تاپسىرىسى بويىنشا ۇلتتىق كينونى قولداۋ مەملەكەتتىك ورتالىعىنىڭ كومەگىمەن وندىرىسكە ەنگىزىلدى، دەپ حابارلايدى قازاقپارات.
جوبانىڭ ءتۇسىرىلىمى وتكەن جىلى الماتىدا باستالعان. بيىل ءتۇسىرىلىم پروتسەسىنىڭ نەگىزگى بولىگى سەمەي قالاسىندا جانە الماتى مەن اباي وبلىستارىنىڭ تابيعي نىساندارىندا ءوتتى.
قازىرگى ۋاقىتتا كارتينانى مونتاجداۋ كەزەڭى ءجۇرىپ جاتىر. ال فيلمنىڭ تۇساۋكەسەرى 2023 - جىلدىڭ 2-اقپانىنا جوسپارلانعان.
سەبەبى وسى كۇنى بايتۇرسىن ۇلى رەداكتور بولعان العاشقى كاسىبي «قازاق» گازەتىنىڭ 110 جىلدىعى تويلانادى.
فيلم ⅩⅩ عاسىردىڭ باسىنداعى قازاق ساياسي ەليتاسىنىڭ ەڭ جارقىن كوشباسشىلارىنىڭ ءبىرى، قازاق گرامماتيكاسىنىڭ نەگىزىن قالاۋشى، عالىم، اقىن جانە پۋبليتسيست ءومىرىنىڭ قىرىق جىلىن قامتيتىن شاعىن ەپيزودتاردان تۇرادى.
كينوجوبا باستاۋىش مەكتەپتىڭ قاراپايىم وقىتۋشىسىنان ۇلتتىڭ ۇستازىنا اينالعان احمەتتىڭ تاڭعاجايىپ تاعدىرىنا اسەر ەتكەن ماڭىزدى وقيعالار تۋرالى باياندايدى.
«الاش» پارتياسىنىڭ نەگىزىن قالاۋشىلاردىڭ ءبىرى، قۋدالانعان، بىرنەشە رەت قاماۋعا الىنعان.
ءبىراق سوعان قاراماستان تولىق دراما مەن تراگەدياعا تولى داۋىردە ادەمى ماحابباتقا دا ورىن تابا بىلگەن ساياساتكەر- كۇرەسكەردىڭ ارپالىسقا تولى ءومىرى كورسەتىلەدى.
باستى رولدە ازامات ساتىبالدى. سونداي- اق، فيلمدە داريا الەكساندروۆا، الەكساندر باگريانتسيەۆ، ەرلان كارىبايەۆ جانە باسقالار وينادى.
«احمەت بايتۇرسىن ۇلى - ءبىزدىڭ ماقتانىشىمىز. مەنىڭ ويىمشا، ءبىزدىڭ جاس ۇرپاق وسىنداي فيلمدەردى كورۋى ءتيىس. ويتكەنى، احمەتتىڭ جاساعان ءىسى، الاشوردا قايراتكەرلەرىنىڭ ەرلىگى - بۇگىن كەزدەسپەيتىن باتىلدىق. سوندىقتان سول كەزدەگى وقيعالاردى زاماناۋي كورەرمەنگە كورسەتۋ كەرەك»، - دەيدى باستى ءرولدى ورىنداپ شىققان ازامات ساتىبالدى.
ءتۇسىرىلىم توبىن رەجيسسەرلەر ەرلان نۇرمۇحامبەتوۆ پەن ەرگەن توقمۋرزين باسقاردى.
قويۋشى- وپەراتور - مارس وماروۆ. باس پروديۋسەر - داستان اتىعايەۆ. سەناري اۆتورى - عالىم دوسكەن.
