الاش ارىستارىنىڭ كوزدەرى جوق سۋرەتتەرى بەينەلەنگەن كيىمدەر ساتۋ دۇرىس ەمەس - ءدىني باسقارما

الماتى. قازاقپارات - الاش ارىستارىنىڭ كوزدەرى جوق سۋرەتتەرى باسىلعان كيىمدەردى شىعارىپ، ساتۋ دۇرىس ەمەس.

بۇل تۋرالى قازاقستان مۇسىلماندارى ءدىني باسقارماسىنىڭ باسپا ءسوز حاتشىسى اعابەك قونارباي ۇلى فەيسبۋك پاراقشاسىندا مالىمدەدى، دەپ حابارلايدى قازاقپارات ءتىلشىسى.

الەۋمەتتىك جەلىدە الاش ارىستارىنىڭ بەينەلەرى سالىنعان كيىمدەر تۋرالى جازبالار جاريالاندى. كيىمدەردەگى ءمىرجاقىپ، شاكارىم، ماعجان، جۇسىپبەك سەكىلدى تۇلعالارىمىزدىڭ سۋرەتتەرىندە كوزدەرى جاسىرىلعان. اعابەك قونارباي ۇلى الەۋمەتتىك جەلىدە ۇلت قايراتكەرلەرىن بۇلاي مانسۇقتاۋعا بولمايتىنىن جازدى.

«مۇنداي كيىمدەر جەكە كاسىپكەرلەردىڭ ساتۋ ماقساتىندا جاساپ جاتقان دۇنيەلەرى بولۋى مۇمكىن. الايدا ۇلت قايراتكەرلەرىن بۇلاي مانسۇقتاۋعا بولمايدى. قازاقستان مۇسىلماندارى ءدىني باسقارماسى الاش ارىستارىنىڭ كوزى جاسىرىلعان كيىمدەردى شىعارىپ، ساتۋدىڭ دۇرىس ەمەس ەكەنىن مالىمدەيدى. شاريعاتتا ءتىرى جاننىڭ كوزىن سالماي، بەينەسىن عانا سالۋعا بولادى دەگەن ءپاتۋا جوق. ءمۇفتيات بۇعان قاتىستى ءپاتۋا شىعارعان ەمەس. ارىستارىمىزدى بۇلاي «دارىپتەۋگە» جول بەرىلمەۋى ءتيىس. ەل ءۇشىن جانىن پيدا ەتكەن احمەت، ءمىرجاقىپ، شاكارىم، ماعجان، جۇسىپبەك سەكىلدى قايراتكەرلەرىمىزدىڭ اسىل بەينەلەرىن قورلاۋعا بولمايدى. مۇنداي ارەكەتتەر - ۇلت قايماقتارىنا دەگەن قۇرمەتسىزدىك»، - دەپ جازدى ءمۇفتياتتىڭ باسپا ءسوز حاتشىسى.

ول، سونداي- اق قازىرگى ۋاقىتتا ادامداردىڭ، جانۋارلاردىڭ، باسقا دا تىرشىلىك يەلەرىنىڭ سۋرەتى سالىنعان كيىمدەر شىعىپ جاتقانىن، يسلام ءدىنى مۇنداي كيىمدەردى شىعارۋعا قارسىلىق بىلدىرمەيتىنىن جازدى.

«الايدا ءتىرى جاننىڭ سۋرەتى سالىنعان كيىممەن ناماز وقىماعان ابزال. مۇنداي كيىممەن ناماز وقۋ - ماكرۋھ. ال وسى ماسەلەگە قاتىستى سۇحبات بەرگەن ق م د ب ءتوراعا ورىنباسارى، شاريعات جانە ءپاتۋا ءبولىمىنىڭ مەڭگەرۋشىسى سانسىزباي قاجى قۇربان ۇلىنىڭ ءسوزىن كەسىپ، تەك ءبىر جاقتى باعىتتا پىكىر تاراتىپ، قوعامدا ەكىۇداي كوزقاراس تۋدىرۋ دۇرىس ەمەس»، - دەپ حابارلادى اعابەك قونارباي ۇلى.

ايتا كەتەيىك، بيىل قازاقتىڭ رۋحاني كوسەمى اتانعان الاش ارداقتىسى، ۇلت ۇستازى احمەت بايتۇرسىن ۇلىنىڭ تۋعانىنا 150 جىل تولىپ وتىر. سونداي- اق مەملەكەت باسشىسى قاسىم- جومارت توقايەۆ الماتىعا ساپارى اياسىندا احمەت بايتۇرسىن ۇلىنا ارنالعان ەسكەرتكىشتىڭ اشىلۋ سالتاناتىنا قاتىسقان بولاتىن.

فوتو: facebook.com/ اعابەك قونارباي ۇلى