ديماش قۇدايبەرگەننىڭ العاشقى ۇستازى ءوز تاڭداۋىن جاسادى

اقتوبە وبلىسى بويىنشا 517-سايلاۋ ۋچاسكەسى بار. ونىڭ 15 ى مامانداندىرىلعان ۇيىمداردا ورنالاسقان، ولار: مەديتسينا مەكەمەلەرى، اسكەري بولىمدەر، تەرگەۋ يزولياتورلارى. اسكەري بولىمدە جانە ۆاحتالىق كەنتتەردىڭ جانىندا ورنالاسقان ءۇش ۋچاسكەدە سايلاۋ تاڭعى ساعات 6:00 دە باستالدى. قالعان سايلاۋ ۋچاسكەلەرى ءوز جۇمىسىن تاڭعى 7:00 دەن باستاپ، ساعات 20.00-دە اياقتايدى.

ديماش قۇدايبەرگەننىڭ العاشقى ۇستازى كلارا قاجىعالييەۆا بۇگىن ءوز تاڭداۋىن جاسادى.

«بۇگىن ەڭ ماڭىزدى كۇن. قازاقستاننىڭ ءاربىر ازاماتى پرەزيدەنت سايلاۋىنا قاتىسادى دەپ ويلايمىن. ەلىمىز كەلەشەگى، ۇرپاعىمىزدىڭ بولاشاعى ءارقايسىمىزدىڭ تاڭداۋىمىزعا تىكەلەي بايلانىستى. ءوزىم ەلىمىزدىڭ بولاشاق ۇرپاعىن تاربيەلەۋدە ەڭبەك ەتىپ ءجۇرمىن. سوندىقتان دا قازاقستان رەسپۋبليكاسىنىڭ كەمەلدەنۋى، باقىتىنىڭ باياندى بولۋى - ءبىزدىڭ قولىمىزدا»، - دەدى كلارا قاجىعاليەۆا.

ايتۋىنشا، ول بۇعان دەيىن وتكەن بارلىق سايلاۋعا قاتىسىپ، تاڭداۋىن جاساعان. بۇگىن دە تاڭەرتەڭ ەرتە تۇرىپ، مەكتەپتە ورنالاسقان ۋچاسكەدە داۋىس بەردى.