انالارعا كومەك بەرەتىن «باقىتتى وتباسى» ورتالىعى اشىلدى - فوتو
كوپبالالى، از قامتىلعان، مۇگەدەك بالا تاربيەلەيتىن انالار ەندى تەگىن كۋرستارعا قاتىسىپ، كاسىپكەرلىك نەگىزدەرىن ۇيرەنەدى. بۇل - ماسىلدىقتان ارىلىپ، تابىس تابۋعا مۇمكىندىك بەرەتىن جوبا.
ءىس-شاراعا اقتوبە وبلىسىنىڭ اكىمى ەرالى توعجانوۆ، ق ر پرەزيدەنتى جانىنداعى ايەلدەر ىستەرى جانە وتباسىلىق- دەموگرافيالىق ساياسات جونىندەگى ۇلتتىق كوميسسيا مۇشەسى ءنازيپا شاناي، كاسىپكەر- مەتسەناتتار، حالىقتىڭ الەۋمەتتىك وسال توپتارى ساناتىنداعى كاسىبىن اشقىسى كەلەتىن، ونىڭ ىشىندە «اۋىل اماناتى» جوباسىنا قاتىسۋعا ىنتالى ايەلدەر قاتىستى.
ورتالىق ومىرلىك قيىن جاعدايعا تاپ بولعان نەمەسە ونىڭ تۋىنداۋ قاۋپى بار وتباسىلاردى انىقتاپ، ولاردىڭ پسيحولوگيالىق، پەداگوگيكالىق جانە قۇقىقتىق كومەك الۋىنا مۇمكىندىك بەرەتىن ورىنعا اينالماق.
مۇندا بولاشاقتا ءوز بەتىنشە اقشا تابۋعا نيەتتى بارلىق اقتوبەلىك كۋرستاردى تەگىن وقي الادى.
كۋرستى ءتامامداعان سوڭ، قاتىسۋشىلارعا جۇمىسقا ورنالاسۋعا جانە ءوز كاسىبىن اشۋعا كومەك بەرىلەدى.
«وتانعا دەگەن سۇيىسپەنشىلىك وتباسىنان باستالادى. تۋعان شاڭىراقتان العان تاربيە - بۇل بارشا حالقىمىزدىڭ باقۋاتتى دا تابىستى بولاشاعىنىڭ كەپىلى. وتباسىن قولداۋ ورتالىعىنىڭ اشىلۋى - بۇل وڭىردەگى وتباسىلىق- دەموگرافيالىق ساياساتتى ىسكە اسىرۋداعى اۋقىمدى جۇمىستىڭ باستاماسى عانا. ءبىزدىڭ مىندەتىمىز - ومىرلىك قيىن جاعدايعا تاپ بولعاندارعا كومەكتەسۋ، ولاردىڭ وزدەرىنە دەگەن سەنىمىن ارتتىرۋ، دۇرىس باعىتقا باعىتتاۋ، تەك سوزبەن عانا ەمەس، ىسپەن دە قولداۋ. ءبىراق بىردەن ايتايىن، كومەك تەك باقىتتى بولاشاعىنا قادام جاساۋعا دايىن ادامدارعا بەرىلەدى. ءبىز ماسىلدىققا قارسىمىز. مۇنداي ورتالىقتار جاقىن ارادا قاندىاعاش، حرومتاۋ قالالارىندا، 2025 -جىلعا قاراي وتباسىن قولداۋ ورتالىقتارىن وبلىستىڭ بارلىق اۋداندارىندا اشۋ جوسپاردا بار»، - دەپ اتاپ ءوتتى وبلىس اكىمى ەرالى توعجانوۆ.
ورتالىقتا ۇيىمداستىرىلعان العاشقى شەبەرلىك ساعاتى قاتىسۋشىلاردىڭ قىزىعۋشىلىعىن تۋدىردى.
شاراعا ارنايىلاپ تاراز قالاسىنان كەلگەن، اقىل-ويدىڭ كۇشى مەن شەكسىز مۇمكىندىكتەردىڭ تابىستى ۇلگىسىنە اينالعان انار بەكسۇلتانوۆانىڭ شەبەرلىك ساعاتى اقتوبەلىكتەرگە ۇلكەن جىگەر بەردى.
انار بەكسۇلتانوۆا - دۇنيەگە ەكى قولسىز كەلگەنىنە قاراماستان، تىگىن سەحىن اشىپ، قىز جاساۋىن تىگۋ ارقىلى تابىس تاۋىپ، وزگەلەرگە كاسىپ اشۋدىڭ قىر-سىرىن ۇيرەتىپ جۇرگەن ەرەكشە قابىلەتى بار ادام.
ۇلتتىق ستيلدەگى بىرەگەي بۇيىمداردى قولونەرشى ەكى اياعىنىڭ كومەگىمەن تىگەدى.
«مەن بۇل ءىستى باستاعاندا، تانىمال بولامىن دەپ مۇلدە ويلاعان جوقپىن. جاقىندا ءبىز قولونەرمەن اينالىساتىن ايەلدەردىڭ باسىن قوسىپ، «شەبەر شاڭىراق» قوعامدىق بىرلەستىگىن اشتىق. بىرلەستىكتە كوپبالالى، ەرەكشە بالالاردى تاربيەلەپ وتىرعان جانە مۇمكىندىگى شەكتەۋلى انالار بار. مەن ولارعا مەملەكەتتىك قولداۋ شارالارىن قولدانا وتىرىپ، كەز-كەلگەن سۇيىكتى ءىسىڭدى پايدالى ىسكە اينالدىرۋعا بولاتىندىعىن كورسەتكىم كەلەدى. بيزنەس قۇرۋ كەزىندە باستان وتكەرگەن بارلىق تاجىريبەممەن ءبولىسىپ، اسىرەسە، قولداۋدى قاجەت ەتەتىن ايەلدەرگە كومەكتەسىپ، قاي باعىتتا داميتىنىن ايتىپ، ۇيرەتكىم كەلەدى. «باقىتتى وتباسى» سياقتى ورتالىقتار وتە قاجەت. ولاردىڭ دامۋىنا ءوز ۇلەسىمدى قوسقانىما قۋانىشتىمىن. وسىنداي قاجەتتى جانە ماڭىزدى باستامانى جۇزەگە اسىرعانى ءۇشىن ەرالى لۇقپان ۇلىنا العىس ايتامىن»، - دەدى انار بەكسۇلتانوۆا.
ەكى كۇننىڭ ىشىندە شەبەرلىك ساعاتتارى ۇيىمداستىرىلادى. كوپبالالى انا، تابىستى كوۋچ موتيۆاتور التىن كانيكار الەۋمەتتىك جەلىلەردە بيزنەس جۇرگىزۋدى ۇيرەتۋ قۇپيالارىمەن بولىسەدى.
«ەگىستەن سورەگە دەيىن» جانە «بالكونداعى سيىر» جوبالارىنىڭ اۆتورى گۇلمايرام بايماقوۆا اۋىلداعى جەكە قوسالقى شارۋاشىلىقتاردى دامىتۋعا ۇيرەتەدى.
«جالقاۋ بولۋدىڭ جانە بالالارىڭىزدى ماسىلدىققا تاربيەلەۋدىڭ قاجەتى جوق. ماعان سەنىڭىزدەر، كوپتەگەن جوبالار ۇلكەن كاپيتالدى قاجەت ەتپەيدى. بىردەن ۇلكەن كاسىپ باستايمىن دەپ شىعىندالماڭىزدار. الدىمەن شىعىنى از شاعىن ىسپەن اينالىسۋ قاجەت. كەز- كەلگەن كاسىپتى باستاعان ساتتە ساتسىزدىكتەر، قاتەلىكتەر بولادى. مەنىڭ جوبالارىم مۇنى دالەلدەدى. قازىر «بالكونداعى سيىر» بەس قالادا جۇزەگە اسىرىلۋدا. بۇل سوڭى ەمەس»، - دەپ اتاپ ءوتتى گۇلمايرا بايماقوۆا.
اۆتور
التىناي ساعىندىقوۆا
