قازاقستان قارۋلى كۇشتەرىندە قورىتىندى سىناقتار باستالدى - فوتو
اتالعان شارا بارىسىندا ءاربىر اسكەري قىزمەتشىنىڭ كاسىبي دەڭگەيى باعالاناتىن بولادى.
قورىتىندى سىناقتاردىڭ ماقساتى اسكەرلەردىڭ جاۋىنگەرلىك جانە جۇمىلدىرۋ دايىندىعىنىڭ ناقتى جاي-كۇيى مەن جەكە قۇرامنىڭ دايارلىق دەڭگەيىن ايقىنداۋ، سونداي-اق كومانديرلەرگە كۇندەلىكتى جانە وقۋ- جاۋىنگەرلىك قىزمەتتى ۇيىمداستىرۋ بويىنشا جۇمىس نىساندارى مەن ادىستەرىن جەتىلدىرۋدە پراكتيكالىق كومەك كورسەتۋ بولىپ تابىلادى.
باس شتابتىڭ، اسكەر تۇرلەرى باس قولباسشىلارىنىڭ، وڭىرلىك قولباسشىلىقتار مەن اسكەر تەكتەرى قولباسشىلارىنىڭ، اسكەري ءبولىم كومانديرلەرىنىڭ كوميسسيالارى قازان ايىندا بارلىق بولىمشەلەردى تەكسەرىستەن وتكىزەتىن بولادى.
- تەكسەرۋ بارىسىندا جەكە قۇرامنىڭ جاۋىنگەرلىك داعدىسىنىڭ دەڭگەيى، بولىمشەلەردىڭ ۇيلەسىمدىلىگى، جاۋىنگەرلىك ازىرلىكتىڭ جاي- كۇيى ايقىندالادى. قارۋ- جاراق پەن اسكەري تەحنيكانىڭ جارامدىلىعى دا تەكسەرىلەدى. تاربيە جۇمىسىنىڭ، قۇقىقتىق جانە اسكەري ءتارتىپتىڭ، سونداي- اق اسكەري قىزمەتتىڭ قاۋىپسىزدىك جاعدايى زەردەلەنەدى. وسى كورسەتكىشتەر بويىنشا باعىنىستاعى اسكەرلەردى باسقارۋدىڭ تيىمدىلىگىن ناقتى باعالاۋعا بولادى، - دەپ اتاپ ءوتتى تەڭىز جاياۋ اسكەرلەرى قۇراماسىن تەكسەرۋ جونىندەگى كوميسسيانىڭ ءتوراعاسى پولكوۆنيك اندرەي نيكيفوروۆ.
اسكەري قىزمەتشىلەر تاكتيكالىق، ارنايى، اتىس، ساپتىق، دەنە شىنىقتىرۋ دايىندىعىن، جاۋىنگەرلىك ماشينالار مەن اۆتوموبيل تەحنيكاسىن جۇرگىزۋ، رادياتسيالىق، حيميالىق جانە بيولوگيالىق قورعاۋ، اسكەري توپوگرافيانى قامتيتىن جاۋىنگەرلىك وقۋدىڭ نەگىزگى پاندەرىنەن سىناقتار تاپسىرادى. وفيتسەرلەر قۇرامىنىڭ كاسىبي دايىندىعىنا دا ايرىقشا نازار اۋدارىلماق.
