ءبىزدىڭ كوك پاسپورتىمىزدى بۇكىل الەم تانيدى جانە قۇرمەتتەيدى - توقايەۆ
بۇل تۋرالى پرەزيدەنت قاسىم-جومارت توقايەۆ قاراعاندى وبلىسى جۇرتشىلىعىمەن كەزدەسۋىندە ءمالىم ەتتى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.
«بىرلىك، ىنتىماق، تولەرانتتىلىق، ءوزارا قۇرمەت، جاناشىرلىق جانە ءارقاشان ءبىر- بىرىمىزگە قول ۇشىن بەرۋگە دايىن بولۋ ءبىزدىڭ ءداستۇرىمىز بەن مادەنيەتىمىزدىڭ نەگىزىندە جاتىر. ءبىزدىڭ ۇلتتىق بولمىسىمىزدى قالىپتاستىراتىن بۇل بىرەگەي قۇندىلىقتاردى جاساندى يدەولوگيالىق قۇرىلىمدارعا تەلۋ وڭاي ەمەس. ءبىراق، مەنىڭ ويىمشا، بۇعان قاجەتتىلىك جوق. قازاقستان رەسپۋبليكاسىنىڭ كوك پاسپورتى ءبىزدىڭ ۇلتتىق بىرەگەيلىگىمىزدىڭ قاراپايىم، ءبىراق باستى كورسەتكىشى بولۋى كەرەك ەكەنىنە سەنىمدىمىن. بۇل قۇجات - ءبىزدىڭ مەملەكەتتىلىگىمىزدىڭ تىرەگىنە اينالعان وزىق قاعيداتتاردىڭ نىشانى. قازاقستان رەسپۋبليكاسى ازاماتىنىڭ پاسپورتى ىرگەلى قۇندىلىقتاردى بىلدىرەدى. سونىڭ ارقاسىندا ءبىزدىڭ ەلىمىز بۇكىل الەمگە ەتنوسارالىق جانە ءدىنارالىق تولەرانتتىلىقتىڭ جارقىن ۇلگىسى رەتىندە تانىمال بولدى. قازاقستان پاسپورتى - ادىلدىكتىڭ جانە ۇلتتىڭ بولاشاققا ۇمتىلىسىنىڭ سيمۆولى»، - دەدى ق ر پرەزيدەنتى كەزدەسۋدە.
سونداي-اق مەملەكەت باسشىسى ءبىزدىڭ كوك پاسپورتىمىزدى بۇكىل الەم قۇرمەتتەيتىنىن جەتكىزدى.
«ءبىزدىڭ كوك پاسپورتىمىزدى بۇكىل الەم تانيدى جانە قۇرمەتتەيدى. شەت مەملەكەتتەردىڭ ۆيزالارىن بەرۋدى قوسا العاندا شەتەلدە قازاقستاندىق پاسپورتقا قاتىستى قانداي دا ءبىر شەكتەۋلەر جوق. بۇل - ادىلەتتى قازاقستاندى قۇرۋعا باعىتتالعان ەلىمىزدىڭ تەڭگەرىمدى ءارى جاۋاپتى سىرتقى ساياسي باعدارى مەن ىشكى ساياساتىنىڭ تىكەلەي ناتيجەسى»، - دەپ تولىقتىردى مەملەكەت باسشىسى ءوزىنىڭ ءسوزىن.
